Patriot - Cerpen Berbahasa Bali

Ni Luh Putu Ratna nyingakin lawat pejalan kurenane ring peteng sane dedet punika. Yeh peningalane ngetel sigsigan sekata ia nawang kurenane lakar berangkat ka dura negara lan ningalin ia lan pianakne maka dadua.

"Luh, suudang monto ngeling. Bli jani lakar luas menek kapal lakar ka dura negara, ngalih pangupa jiwa apang pianak iraga ngidang masuk masekolah apang pianak iraga dados jatma sane wikan lan maguna," Kurenane, I Nyoman Suartha, nyuahang bok Luh Ratna adengadeng. 

Jerijine sane kokoh lan alus sekadi sunar Bulan ritatkala peteng sane dedet. Kapale ento suba padet baan anak-anake sane ngaba karung base genep, kain sutra, kain tenun, miwah barang dagangan sane lianan sane jagi kal adol ring dura nagara. Angin pasisine ngampehin bokne ane lantang lan leser. Kapal punika mamargi adeng-adeng. Jangkarne sube leb saking pelabuhan. Bulan purnama manyunarin jagate sane suung. Pedidiang jani Luh Ratna mengeling pedidi ngempu pianake asiki. 

Nanging, Luh Ratna tusing nyak dadi anak luh ane menceg. Ia setata kuat; sakadi kayu sane ten ampehan angin, semangatne sakadi bara api sane ngendih. Penyingakanne nyaksiang kapal sane mamargi adeng-adeng. Keinget Luh Ratna ajak hidupne sane sampun kelintang tua. Keinget dugasne ia nu bajang. Manahne mekeber ngindeng joh.

 *** 

"Luh, yen dadi anak lua punika sing dadi menceg! Harus jemet megae. Ade sing ane aluh ring hidupe puniki!" Memene Luh Ratna ngebeg kamenne ring tukad. Peluhne ngalimbak saking sirahne. Sinar suryane ngendih. Jagate panas sakadi api.

"Meme, tiyang dot care anake ane lianan Meme... Tolih nae timpal-timpal tiyange pada masuk masekolah ring kota. Tiyang dini, nu cenik suba maburuh!" Luh Ratna nyemuh kamen-kamenne ento di penyemuhane. Peningalane silau kene ai. 

"Luh! Sing dadi mamunyi buka kaketo! Sing ngerti carane ngaturang suksma ring Sang Hyang Prama Kawi? Iraga nu ngidang hidup gen suba pasuecan saking Ida Bhatara." Memene ngedeg, nanging ia mautsaha antuk mekenyem apang pianakne ngidang melajah nyalanan hidup. Luh Ratna sing biin memunyi apa-apa. Lantas Luh Ratna ngaturang canang saiban ring soang-soang Pelinggih. Nunas pengampura saking Ida Sang Hyang Prama Kawi, miwah nunas kerahayuan.   

Idupne sedina-dina tuah keto dogen. Sakadi jatma manusa lianan, Luh Ratna ngerasa med teken gegaene ane mulai ten ngerananin hasil sane setimpal. Sedek dina anu, Luh Ratna meblanja ke peken. Ditu ia nepukin Luh Ayu, misane uling pondokan sane suba nganten ke desa pisagane.

"Ih, Ratna!"

 Luh Ratna nu sedek nongkok milin-milin tabia ane luung bakal adoke malebengan ring paonne. Makipekan lantas Luh Ratna.  

"Yih, Mbok Ayu! Ngujang dini Luh? Kel meblanja napi madolan?" Luh Ayu lantas ngaukin Luh Ratna uli joh.  

"Tiyang jagi milin-milin tabia Mbok, suba tengai onden melebengan." 

"Mih, Luh Iluh! Jeg pragat keto gen gaene! Awak nu cenik suba ngitungan paon. Masekolan alu itungan, pang kayang ni dadi jatma sane sugih, apang bisa meli kene-keto lan sing biin pragat ngitungan kemo-mai!" Luh Ayu lantas ngajak Luh Ratna ngorto di warung dagang bubuh.  

"Engkenan men Mbok, be telah itung-itungan tiyange! Jani tiyang sedek mikirang engken carane pang ngidang dadi anak ane bisa masuk mesekolah cara timpal-timpal pasawitran tiyange sane liana," Luh Ratna bengong meplalianan sendokne di duur bubuhne.

Kenehne sedih. Yeh peningalane ngetel. Pedalem Luh Ayu nolih misane buka keketo. 

Nasib idup sing ade ane nawang. Suba lantas tengai, pekene suba ngancan suung. Dagang bubuhe gelis metutup.  Pajalan Luh Ratna kilang-kileng sakadi anak linglung. Idup suba ngajahin ia sing dadi ngambul lan manying. Nanging jani, sebet pisan pikobetne. 

Mejalan ia mulih. Sing nolih jalane, saget anake sane lianan makraik.  Luh Ratna kesiab mekipekan. Montor gede ngebut nabrak awakne. Anake ane lenan onyang negen Luh Ratna bareng-bareng.  

*** 

Peteng dedet sane Luh Ratna tepukin sesampune ia kedat di rumah sakit. Suung pesan kamar rumah sakite ento, padidian Luh Ratna sing ade anak ane nongosin. Bulane manyunarin saking kaca jendelane.  

Apa men ane tiyang elingan jani? Sube pragat sing ade apa. Buka parribasane mangorahang, sakadi ngentungan uyah ka sagara. Sakadi ngentungan bias di pasisi. Sia-sia suksman ipun.  Dot masi tiyang masuk masekolan cara timpal-timpal tiyang ane lenan. Sing ade ane ngenehang buin mani buin puan nu ngidang madaar apa sing. Sing ada ane ngenehang buin mani buin puan nu ngidang idup apa sing. Tiyang sakadi kebo mebalih gong nyingakin timpal-timpale masuk masekolan. Pedidian tiyang ngeling mesigsigan di bungut paone. Siep! Tiyang ngeling siep apang Meme tiyange sing ningehang pianakne ngeling masig-sigan.  Nanging, tiyang sing dot nyerah teken keadaan. Sing dadi ngeling mencep. Idup ngajin tiyang apang ngidang kuat. Mejujuk tegap rikala jagate maguncang. Ngeling siep nanging satata mautsaha becik.

***

 "Tiyang lakar nulungin Luh, nanging buin pidan Luh harus nyak masih nulungin tiyang. Nyak Luh dadi kurenan tiyang?" I Nyoman Suartha negak ajak dadua ngajak Luh Ratna di pasisi sambil madaar lumpia.  

"Becik pisan suryane keleb ring kauh nggih, Bli?" 

"Iluh de nganti topik orta. Nyak sing Luh dadi kurenan Bli?" 

"Bli Man... Bes selid Bli Man ngorto keni. Iraga nu dadi seka teruna di Banjar, nu cenik dadi sing matunangan. Apa buin makurenan!" Luh Ratna usil mecanda teken Suartha. Nanging Suartha sing nyak macanda.

 "Tiyang serius niki Luh. Kone Luh ngorang mekite masuk masekolah. Bli je ane mayahang biaya sekolah Iluhe. Nanging ada syarat. Bli Man yakin Luh Ratna ngidang nyanggupin syarat Bline." 

"Bli Man! Suud monto ngorto keni! Jeg, jejeh tiyang baane. Tiyang onden siap dadi mantu. Tiyang nu mekeneh melali ngitaring Bali, Jawa lan gumi Indonesia. Lemah nu lantang Bli Man." Luh Ratna ngesopin Suartha lumpia mabasa kecap misi tabia gadang.  

"Yih! Seken-seken ni Luh!" "Tiyang masih seken-seken ni Bli! De pisan Bli maksa-maksa keneh tiyange. Sawireh, tiyang sane ngajalanin idup tiange padidi!" 

"Bah, bengkung gati Iluh niki puk!" I Nyoman Suartha nyolek basa kecap di pipine Luh Ratna. Macande mesra makadaduan. "Bah, Bli Man..."

Suryane sampun keleb. Pasisine sakancan nyuungan. Bawak satua, jani Luh Ratna lan I Nyoman Suartha negakin montor mulih. Jalane suung lan dingin. Luh Ratna neked jumahne. Ngucapin suksma lan ngalambaingan limane. Berpisah teken Suartha lakar mulih. 

***  

Munyin gamelane sane becik pisan, lengut, tur ngelangunin ngiringin upakara pawiwahan I Nyoman Suartha lan Ni Luh Putu Ratna. Rame pisan pisagane lan pasawitran sane makundangan iriki.  Liu pisan ada deadaran. Tamiu-tamiune pada demen teken upakarane sane sakral lan girang.  

"Bih, Luh Ratna sampun masuk Grhasta Asrama. Suba ngelah somah. Jani Luh Ratna suba ngelah gelar sarjana, masuk di sekolahan sane becik, lan jemet megae. Demen pisan atin Mbok Ayu nyaksiang!" Luh Ayu meluk Luh Ratna. Pada-pada girang. 

"Nggih Mbok Ayu. Suksma pisan tiyang aturang teken Ida Sang Hyang Widhi Wasa sampun ngicenin keluwihan ring kahuripan tiyange. Jani, tiyang lakar ngawit mebanjar bareng-bareng ajak kurenan tiyange." 

"Nah, keto bo, Luh! Hidup niki nak ngejalanan karma iraga ipidan. Jani iraga mautsaha apang ngidang ngamolihang Moksartam Jagathita Ya Ca Iti Dharma. Lan bareng-bareng iraga sareng sami melajah apang ngidang dadi jatma sane luwih, becik, religius lan demen manyama-braya."

"Lan-lan Mbok Ayu! Jeg semangat pisan Mbok tiyange iriki nok..." Kahuripan nike mamargi antar lan becik; liu sukacita, kerahayuan lan kerahajengan saking Ida Sang Hyang Widhi Wasa sane sampun kapicayang. Jagat gumine puniki luwih, lengut, tur ngelangunin. Bagia pisan kenehne Luh Ratna teken I Nyoman Suartha. 

A warsa kalintang suba, Luh Ratna beling lan ngelekadang panak muani. Adanange panak muani asikine ento I Gede Suputra. Sinah pianak punika bakal tumbuh sakadi anak sane suputra, ngemolihang bagia lan girang ring jagate sami. 

***

"Iraga sing ade pilihan ane len buin Luh. Nyen ane sing ngalaksanayang titah raja lantas bakal padem!" Keto munyinne I Nyoman Suartha semengan puniki. Ngetug tangkahne. Mare ukane ia ka uma, nanging lacur suba katangkap olih tentara.  

"Bli, sing dadi buungan titah punika Bli? Ani jeg iraga konyang kene dadine?!" Luh Ratna mesimpuh ngeling sig-sigan di bungut paone. 

"Engken buin Luh, jaman jani suba jaman perang. Mekejang anak lanang sane sampun kalintang yowana wajib milu mayuda ngebela pati gumi Baline! Iraga sekadi putra Bali sing dadi kalah!" I Nyoman Suartha mejujuk.  

"Sujatine, tiyang takut Bli. Pidan jamane perang dunia, liu anak Baline padem ring ambarawa. Sakadi paksi; para tentarani mamargi nyujur sunya loka surgawi. Tiyang takut Bli. Iraga pada-pada nu ngelah panak muani asiki. Tiyang ten nyidang mautsaha ngidupin pianak pedidi!"  

"De jeg mamunyi buka keto Luh!" 

"Men engken Bli?! Tolih nae di beritane, mungkin korban jiwa sawusan mayuda." 

"Bli nawang Luh! De je mesatua ane tedong-tedong! Ida Bhatara makasami jagi ngelindungan iraga sareng sami." Sawusan kurenane ngorahang munyi buka keto, telah yeh peningalane Luh Ratna. Gelisan Luh Ratna malebengan di paon. Lantas madaar bareng-bareng sambilanga mapuikan. Nanging sujatine I Suartha uning, yening Luh Ratna sayang teken kurenan lan pianakne.  

"Iraga patut dadi jatma sane madue rasa patriotisme Luh..." I Nyoman Suartha ngadukan gelas kopine. "Iraga patut mabela pati teken jagat Bali sane iraga tresnain puniki. Sampunang Iluh sebet, minakadi Bli lakar mayuda ngabela pati tanah iraga sareng sami." 

"Bli, sujatine tiyang takut teken masa depan pianak iragane Bli..." "Suudang ngenehang to Luh, sawusan yudane kalintang, Bli suba ngelah rencana antuk pianak iraga I Gede Suputra buin pidan."

***

Ni Luh Putu Ratna nyingakin lawat pejalan kurenane ring peteng sane dedet punika. Yeh peningalane ngetel sigsigan sekata ia nawang kurenane lakar berangkat ka dura negara lan ningalin ia lan pianakne maka dadua. 

"Luh, suudang monto ngeling. Bli jani lakar luas menek kapal lakar ka dura negara, ngalih pangupa jiwa apang pianak iraga ngidang masuk masekolah apang pianak iraga dados jatma sane wikan lan maguna," Kurenane, I Nyoman Suartha, nyuahang bok Luh Ratna adengadeng. 

Jerijine sane kokoh lan alus sekadi sunar Bulan ritatkala peteng sane dedet. Kapale ento suba padet baan anak-anake sane ngaba karung base genep, kain sutra, kain tenun, miwah barang dagangan sane lianan sane jagi kal adol ring dura nagara. 

Angin pasisine ngampehin bokne ane lantang lan leser. Kapal punika mamargi adeng-adeng. Jangkarne sube leb saking pelabuhan. Bulan purnama manyunarin jagate sane suung. Pedidiang jani Luh Ratna mengeling pedidi sambilanga ngempu pianak muanine asiki. 

Nanging, Luh Ratna tusing nyak dadi anak luh ane menceg. Ia setata kuat; sakadi kayu sane ten ampehan angin, semangatne sakadi bara api sane ngendih. Penyingakanne nyaksiang kapal sane mamargi adeng-adeng. 

Keinget Luh Ratna ajak hidupne sane sampun kelintang tua. Keinget dugasne ia nu bajang. Manahne mekeber ngindeng joh. I Gede Suputra jani lakar titipanga ring umah pekakne. Apang ia aman lan ngamolihang sekolahan sane becik ring Bali. I Gede Suputra bengong nolih memene. 

Ring pasisi, I Gede Suputra mamunyi. "Meme, sujatine sakadi panjak Bali, sampun sepatutne iraga medue rasa patriotisme. Dumogi pejuang tanah Bali ngamolihang jayanti. Mangda jagat Bali merdeka saking penjajahan. Dumogi Ida Sang Hyang Widhi Wasa ngicenin iraga sareng sami kerahayuan." [] 

Denpasar, 16 Mei 2024