Lapahda muloh Mang Pogat. Tidipa lagi. Kuruk lurung. Ngaliyu-i lambahan balak ronik, warung rik pok sanak bugurau gim PS.
Sangajo rogoh jak karito. Mang Pogat buhodak di warung kopi. Radu ngucapko salam, ya kilu kopi sangagolas umpun-umpun.
Mak unisina ratongda baibai gomuk. Marongut bagawoh. Mata sombab. Kilu pangatu rik sai ongka warung kopi  injami pai duit paranti sanak ambayar es pepe rik mongan.
"Makkung pacak bik. Modal nyak makkung muloh. Juk sipada?" Cak bakas bukumis. Ngaduk wai kopi, radusina dijukko rik Mang Pogat.
"Tulung nyak pingsansa juga Mang. Radu sina mak lagi nyak nginjam rik niku," cawadu baibai buwok karitingsa sambil miwang.
"Bibik mak parcaya. Liyakda na ..." Ambukak laci duit. Mih uwat logam lima ratus.
"Di lambahan mak ongka hoda Mang?"
"Uwat cutik. Guwai mongan sanak, bayaran sikolah, rik modal jualansa bik. Mun mak juksina bangkrut ..."
He he he he ...
Mak Kolu Mang Pogat ngaliyak baibai gomuk hanjona mojong losu di kabolah kirina. Dipodokina.
"Bu. Ibu mau pinjam uang ya?" Tanya Mang Pogat.
"B apak siapa? Bapak punya uang apa? si baibai mulana ragu. Tapi mih sangrobok. Ngaliyak Mang Pogat ngaluahko kartu pokna bugawe, jadi parcaya.
