"Udeh lame ngojeknye, Bang?" tanyanya sesaat motor mulai melaju.
"Baru seminggu. Kalo dipikir, berat rasanye. Setelah 16 tahun kerje, gare-gare krisis moneter, perusahaan gulung tikar dan kite terpakse kene PHK masal. Parahnye pesangon kagak dapet. Alasannye perusahaan terlilit utang ," keluhnya.
"Aye ikut prihatin dengernye, Bang. Mudah-mudahan cepet dapet gantinye ye," imbuhnya.
"Sekarang usie udeh gak mude lagi. Anak-anak makin gede. Kebutuhan juge bertambah. Perasaan hidup di zaman Orba atau Orla kagak jauh beda. Malah tambah suseh. Tapi gak tahu nih Orde Reformasi yang sekarang nih. Siape tahu nasib rakyat kecil kayak kite bise berubah," urainya.
"Banyak yang berpikir dan berharap gitu termasuk aye, Bang. Tapi harga BBM naik. Sembako juge melambung. Rupiah merosot. Kerusuhan dimane-mane. Kok jadi kacau-balau gitu ye?" tukasnya.
"Aye juge jadi berpikir kenape tiap kali bangse nih mau berubeh ke arah yang lebih baek harus berdarah-darah. Ape memang gitu carenye? Tapi setidaknye rezim Orba dan kroninye yang sarat KKN udeh disikat abis semue," timpalnya.
"Omong-omong, gimana kerjaan lu, Man? Masih nyopirin Tuan Mukti?" sambungnya.
"Masih, Bang. Gak terase udeh hampir tige tahun. Semue berkat Mpok," sahutnya.
"Syukur deh. Seneng aye dengernye. Omong-omong, selame tige tahun kerje, gaji naik gak?" guraunya.
"Belum sih, Bang. Tapi kadang aye suka dikasih tambahan sama Nyonye," tuturnya.
"Oh gitu. Oh iye, kabarnye si bos mau nyaleg ye?" tanyanya.
