[Cerkak Banyumasan] Darpun Kewaregen

Darpun antob. "Hooiiigh..." Onine genah ngetarani deweke wis kewaregen. Atine bungah sekeliwat. Ing atase wong dudu sanak dudu kadang koh deampirna kon andon madhang. Mbangkanen sandingane ya ora baen-baen. Sayure tah ya kur jangan lengki, ningen lawuhe ana iwak ayam, ana pete, mendowan sepiring, ora keri sambel trasi. Darpun sing mung tukang rongsok genah ora nibani sewulan sepisan teyeng madhang sing kaya kuwe lawuhe. Mulane sewise antob, gagian deweke matur aring sing kagungan dalem.

"Aduh, pangapuntene niki, Pak..kula malah kewaregen sanget niki. Jan, maturnuwun sanget niki kula mpun disukani maem."

Pak Sandhur sing duwe umah katon seneng krungu ature Darpun.

"Iya, pada-pada. Sapa miki ko arane? O.., Darpun yah? Ya sukur angger ko wis wareg. Sekiye ayuh pada jagongan ngkana neng teras. Nyambi udud. Tes madhang tolih kepenake degawa udud. Kambi ngopi."

Batine Darpun gumun pisan. Apik temen kiye wong, malah egin tawa udud karo ngopi.

"Maturnuwun, Pak. Ampun dados repot lah" semaure senajan deweke ya menyat ngetutna sing duwe umah njujug aring teras.

"Ora papa..ora repot ora. Kae agi degawekena"

Sidane temenan. Neng teras Darpun deulungi rokok sing ana gabese. Deweke sing biasane kur teyeng nunut nglinthing aring tanggane ya banget senenge udud rokok gabesan cap ratu..ra tuku mangsude. Nembe baen cusss nyumed rokok, kopine teka. Darpun atine tambah bungah. Sejeroning batin deweke nyuwara, "Pokoke angger arep deprentah kon ngapa baen ya tek tutburi lah. Nggo males kebecikan."

Nembe baen cusss nyumed rokok, kopine teka. Ireng panas ngebul katon seger pisan. Kambi ngenteni kopine meneb, wong loro pada udud nglepus sinambi kandhah ngalor ngidul ndlepus pisan. Darpun sing rumangsane kaya agi demulyakena dina kuwe, nggulih ngladheni ngendikane Pak Sandhur ya dejaga temenan omong-seomonge. Seteyeng-teyenge ya detata nganggo basa.

Rokok seler gari tegesan, kopine wis katon meneb. Pak Sandhur nyruput ndisiti sambi nawani Darpun.

"Ayuh, kopine wis ora patiya panas kiye koh..kiye njikot maning nyah..wis ora papa, tenang baen..anu ora saben dina ikih."

Darpun tambah gumun. Batine jere, "Kiye wong koh jan apik temen aring inyong." Madan rikuh deweke ndudut rokok seler maning. Rek deanyorna, Darpun sidane kelakon udud nyepur. Udud rong ler, ora tuku, nyambi ngopi pisan. Darpun atine gedhe banget. Peraupane katon padhang. "Wong sugih koh apik temen yah..enggane inyong dadi kuline tah kayane begya ndeyan", Darpun atine ngarep-arep.

Weruh dhayohe katon bungah, dhehem sepisan Pak Sandhur miwiti ngendika serius.

"Pun.. Inyong arep ngomong semending. Mbok mengko ana lupute ya inyong njaluk pangampura. Sukur ya ora dadi atimu."

Darpun sing agi kebungahen mangsuli, "Nggih, Pak. Mangga kersa. Pangampura kepripun sih, Pak..kula sing mesthine kedah maturnuwun sanget."

Jane neng batin Darpun madan deg-degan. Mbok menawane arep detawani pegaweyan.

"Kiye kaya kiye. Mesthine ko kaget tur ya gumun. Ora tau-taune koh ko tek ampirna dadi dhayoh, malah tek jek mbatiri madhang pisan. Inyong kesuwun ko wis gelem mangan pangane inyong, ora ketang lawuhe ya seanane kaya kae miki. Mbatiri udud kambi ngopi. Mbok menawane ko mau kae agi kesusu arep maring ngendi ya pangampurane ya?!"

"Mboten, Pak. Kula mboten kesesa ajeng pundi-pundi, koh. Malah kula jane lingsem sanget. Tiyang namung kados kula koh mpun wani maem ngantos kewaregen teng dalem mriki. Malah niki disukani ses kalih kopine sisan. Jan, estu kula sing maturnuwun sanget, Pak. Mbok Bapake ajeng dhawuh prentah ken napa mawon kula purun, Pak. Kula kepengin ndherek Bapake mawon, lah" Darpun wis kadung ngaturna pengarep-arepe. Mbokmenawane temenan ujare.

"Ya sukur angger kaya kuwe. Plekara ko arep melu nginyong tah gampang mengko angger ana pegaweyan ya ko tek celuk. Dina kiye tah inyong mung arep ngomongi ko pelkara liyane."

Darpun banget bungahe krungu deweke arep deceluk sewektu-wektu ana pegaweyan. Jere sekiyene arep deomongi plekara liyane, atine jane penasaran. "Nggih, Pak. Maturnuwun sederenge. Nuwun sewu, Bapake kersa ndangu kula prekawis napa nggih?"

"Kaya kiye. Mau kae sengaja ko tek ampirna, ya pancen ana mangsud lan tujuane. Sepisan inyong kepengin aweh pangan aring ko. Ora-orane inyong agi pamer panganan apamaning ngenyek aring ko. Sukur deneng ya wis kelakon inyong madhang bareng karo ko miki. Kepindhone, inyong arep nuturi aring ko supaya aja maning-maning mindho ping telu debaleni."

DEG!!! Darpun deg-degan. HHEEKKK!! Kukuse udud urung baen desebulna ndadak kapiselek. Tenggorokane krasa perih banget. "Nuwunsewu, kula salahe napa nggih?"

"Ko ora ngrumangsani lupute neng ngendi? Kiyeh kaya kiye. Mau kae pas ko agi liwat ngarep umah kiye tolih inyong takon, "Pun, arep ngendi?" terus ko semaur, "Ajeng ngriku wetan". Terus inyong takon maning, "Biasane ko tolih ngepit. Deneng sih mlaku?" Njuran ko semaure kepriwe? Kepriwe?"

Darpun nglegeg. ADUHHHH!!! "Nggih, Pak. Kula ngrumaosi lepat. Nyuwun pangapunten."

"Pangampura tah barang gampang. Gampang! Inyong mung kaya desepelekna deng ko! Ko sih sapah? Inyong ora agi njaluk deajeni, ora agi njaluk desembah-sembah. Mung ujarkua ya nggulih semaur sing enak derungu! Apa inyong cokan penjorangan aring ko? Apa inyong tau gawe luput aring ko? Untung baen sih sing menangi inyong sing ngreti ko sedina-dinane. Enggane wong liya, kepriwe jajalen? Apa ko ora depaido? Apa ko ora dearani ngenyek? Detakoni bener-bener koh malah semaure kaya ora ngregani temen aring sing takon. Penjorangan ya penjorangan, tapi deleng dingin karo sapa. Aja kaya kuwe! NGERTI APORA?"

Darpun ora semaur. Ndengkul ora wani maning adu arep karo Pak Sandhur. Rokoke neng asbak ora wani dejikot. Latune wis dawa pisan. Bokonge krasa panas. Ngajog sekeliwat, Darpun mbatin, "Kiyeh kaya kiye carane wong sugih nggulih ngomehi. Sing ap deomehi kon wareg disit."

"Anggep-anggepe koh... Ora aring inyong ora aring sapa baen. Semaur "Arep MBRANGKANG isin" kuwe ora patut. Ora ngregani aring sing takon. NGERTI DAPURMU???!!! AJA MANING-MANING!!! WIS NGANAH LUNGA!!!"

***

___________

catetan: dopokan kiye dekarang sewise maca setatuse Pak Hudaya Soemarno neng group FB Guyon Banyumasan.

katuran panjenengane, maturnuwun ide-ne, mbok mboten mranani kula nyuwun pangapunten..