Stress

[caption id="attachment_203753" align="aligncenter" width="666" caption="dudu fotone sing nulis, sumpah! ilustrasi dijupuk saka rimanews.com"][/caption]

Dina sik isuk ning kanggo Paino rasane wis surup, peteng. Wong lanang sing biasane golek rongsokan keliling kampung iku milih uglak-uglik nang duwur lincak ngarep omahe. Wis telung dina iki dheweke kaya ngunu. Awake sing cilik ketok nglentruk, ora semangat. Males mung klentrak-klentruk nang lincak akhire wong lanang umur patang puluhan iku milih metu. Ditutup lawang omahe banjur mlaku. Tangga-tanggane isuk ngene padha umek karo kerjoane dhewe-dhewe. Pingin ngenakno atine sing lagi ora jejeg, Paino milih nang kali. Durung ngganti teka kali cilik nang kampunge Paino ndelok Tomin, wong lanang sing sik pernah ponakane lagek umek dhewe nang samping omah.

Paino   : Gawe opo, Min?

Sing dijak omong nyawang diluk banjur nduduhno pring nang tangane.

Paino   : Gawe layangan ta?

Tomin  : *Manthuk*

Ndelok Tomin asik dhewe Paino sing lagek ora ono kerjoan akhire melu lungguh, doprok nang sandinge.

Paino   : Kate diumbulno dhewe opo didol?

Tomin  : Nggo dolenan dhewe.

Paino   : Ou...Yok opo kabarmu, Min? Apik-apik ae ta? Masio omah cedek ketoke suwi kene gak tau ketemu. Kaet isuk wes mubeng golek rosok, muleh bengi, gak tau sempat dolen-dolen aku.

Tomin  : Apik, Lik.

Paino   : Urip ki ancen lucu yo, Min. Wong liyo dibelani, dulur dhewe dijarno. Anake wong dipakani, diramut, dulur dhewe digledakno.

Tomin  : *meneng ae, umek karo layangane*

Paino   : Diewangi gak ngerti wayah, lali dulur cek iso nukokno mbarang-mbarang malah mung ngene ae balesane. Kurang opo lekku mbelani dheweke. Dipikire mubeng golek rosok iku penak ta? Kesel, durung maneh yo isin. Ning lek isin sakjane wis gak tak pikirno, wes kebal aku. Sing penting lak halal ta, duwek apik.

Paino ambekan dawa. Sing dijak omong mung ngrungokno karo pancet umek dhewe.

Paino   : Sakiki anake digowo lungo. Gak mikir arek sik cilik, sik butuh bapake. Nesu sithik senenge minggat. Lha dipikir aku iki gak iso mikir ngunu ta? Gak pingin iso ngeweki opo sing dipingini. Lek iso ngunu yo dunyo iki tak tuku kabeh nggo de'e. Mung mergo gak ditukokno hp ae langsung minggat. Lha dipikir iso ta tuku hp gawe godong? Wong rosok sakmunu akehe isine mung kertas, botol-botol, payu piro sih lek didol? Dinggo mangan ae kerep tombok.

Tomin meneng. Ora nyauri opo-opo, dijarno pak lik'e iku terus ngomong.

Paino   : Min...Min, dijak omong kok meneng ae. Lha opo temenan omongane wong-wong iku? Oalah Min, nemen aku iki. Wong stress takjak omong. Suwi-suwi aku koyok koen sisan, edan.

Paino ambegan dawa maneh karo ngelus dadane.

Paino   : Oalah yo...yo nemen aku iki, arek stress ngene kok tak curhati, lak melu stress sisan aku ngko.

Paino sing ben dina nyasat ora tau leren lek kerjo lali lek ponakane iku stress. Ponakane iku jare wong-wong ngekleng sakjoke ditinggal bojone dadi TKW nang Malaysia. Krungu-krungu bojone ora gelem mulih nang omah, malah milih wong lanang liya alias duwe pacar maneh.

Paino   : Yo wes Min, aku tak muleh.

Paino pamit nang ponakane sing saiki ngguyu-ngguyu dhewe iku.

Paino   :  Duh Gusti, paringi waras, waras pikir.