Ba Nostalgia Kenangan Masa Kecil di Bulan Ramadan

Pokoknya pagi yang cerah torang mo ba keliling dari ruma ka perumahan baru abis itu lewat kamari di lorong masjid almubalighin ba putar di skola sd baru mo pulang adakalanya lewat di lorong awat kalo bukan nanti di jalan raya. Kalo bukan ba jalan kaki torang mo nae speda. Mo lewat ba kase palato pa anjing padahal tako. Mo ba keliling sampe sampe tiga ampa kali, pokoknya mo ulang-ulang, kalo bosan da torang mo kase variasi depe jalur yang mo lewat akan. 

Pulang kamari sampe di ruma mo barmain bola. Depe gawang yang torang mo kase maso akan bola antara tiang ruma deng pohon nangka, pokoknya baku baku ganti orang yang mo ba tendang deng yang ba jaga gawang. Baru depe siang tida mo tidor cuman mo makan, hahaha bo puaseka. Ti mama mo beken akan susu baru dia mo suru minom di kamar, tan kinapa olo musti mo nimom di kamar juu. Paling sanang torang kalo somo waktu ba buka puasa itu baru ti uma mo kase kamari lalampa uhh enak skali depe lalampa.

Baru kalo mo ba sholat di masjid cuma mo ba lia ti ka I deng ti Y, ti kaka yang somo ba komando kamari. Abis ti k I deng ti ka Y so tida ada di desa ihh kalo sholat tarawih aku cuma mo baku baku iko deng ti mama, kalo ti mama pigi ka masjid mo baku iko kalo tida pigi da tida pigi olo.

Pas 2011, di kamar balakang itu torang ada bekeng mushala, ada kase bersih kong sampe ada bekeng depe hijab lagi, ada kumpul samua sajadah di ruma ada kase ba jejer disitu ih padahal orang di ruma cuma 4 orang, kocak. Wau salalu kalo ti kaka ti papa mo suru ba qomat cuma dia mo suru pa aku jo, maksudnya... tingga aku parampuan masa mo ba qomat kong masi ada laki-laki, depe alasan capek kata bo dia dia turus yang ti papa jaga suru.

Pas 2012, torang jaga ba nonton film Umar Bin Khattab, wihh torang suka skali it, rela rela mo ba tunggu depan tv supaya mo dapa lia depe intro lo film, rupa gaga skali mo lia olo dang itu dia, rupa asli-asli skali.

Ihh gaga skali tayangan di tv waktu dulu, sahur torang mo putar akan OVJ Sahur ba lia dorang te Sule, Andre, Parto, Aziz, Nunung. Abis itu di siaran sabla mo ba nonton PPT (para pencari Tuhan). Pokoknya dulu olo itu abis subuh sampe pagi pagi bagitu ada kartun kisah kisah Nabi yang kalo tida salah depe animasi itu dari tanah liat ato dari apa sto itu.

Baru kalo somo dekat dekat hari raya di sini ada malam Tumbilotohe, malam ba pasang lampu, ihh pokoknya gaga skali waktu itu minyak tanah masih murah, jadi tiap tiap ruma pasti mo ba pasang yang bagitu. Kong depe pagi abis subuh torang mo ba keliling ba tiup tiup lampu, supaya dorang pe minyak tanah tida mo rugi, adakalanya olo mo ba bantu ba ator ator lampu supaya kalo lampu yang cuma ta taro di pagar begitu ayam ato kucing tida mo dapa sontong.

Banyak sekali lagi kenangan masa kecil yang tidak bisa diungkapkan lainnya, bukan karena tidak ingin diceritakan tapi karena kalau pun diceritakan mungkin kita tetap tidak akan bisa balik ke masa itu lagi. Lagu-lagu bisa kau putar, tapi tidak dengan kenangannya.