"Job apa sih?" Mas Dana kepo. Aku mangkel karo wong sing sok-sokan ngomong bahasa Indonesia. Dheweke lahir ning Jogja ananging manggon ning Jakarta. Karepku yen omongan karo aku nganggo basa Jawa wae.
"Mengko njenengan pirsa kok, Mas," saurku kanthi alus sanajan jengkel.
Nalika tekan alamat, Mas Dana sansaya gumun. Dene aku panggah cengengesan bungah. Banjur Mas Dana tak aturi ngadeg ana salah sijining panggon. Aku ngawe-awe kancaku sing aran Sujiman supaya mara. Dheweke sing bakal ngancani Mas Dana saksuwene tak tinggal nge-job.
"Njenengan ning kene wae. Aja tindak ngendi-ngendi ya."
Mas Dana tak tinggal lunga banjur aku nyepakake uba rampe. Job iki salah sijine caraku mengekspresikan diri. Pikiran lan awakku bisa relax. Mula ora mokal saksuwene pandemic pikiranku buneg lan ruwet.
Dung! Tak! Gleng!
Aku njathil sakmaremku. Klinthing sing ning sikilku tak gedruk-gedrukke. Jarang kepang tak obat-abitke kiwa tengen. Aku yen kadung ndandi angel tambane, bisa mangan beling, menek wit-witan kaya kethek. Yen carane Mas Dana dugem iku carane seneng-seneng, kanggoku njathil nganti ndadi.
Aku blaka sakabehe marang Mas Dana. Salah sijine yen aku penari jathilan. Karepku sakwise dheweke ngerti aku njathil banjur wonge ilfil lan ngadoh saka aku. Ananging jebul malah ora.
Rasane mangkel campur gemes nalike weruh Mas Dana keplok-keplok lan nyuraki aku saka pinggir lapangan. Dheweke uga mideo. Singa gawe aku sansaya muntap kaya arep-arep tak gebug yaiku nalika wonge takon,
"Dek, baju yang kamu pakai tadi bagus banget. Belinya dimana? Aku suka!"
Coba bayangno pacarmu ajak dolan banjur wonge macak jathilan.
