Kakus Mampet

"Dek, saking pundi kok namung piyambakan?" pitakone Mas Bayu. Kok ya ndadak mesem kang banget manise ngono lho. Maraakke aku ndredeg lan nganti olehku mlaku ora bisa jejeg.

"Saking pados kluban, Mas," saurku cekak.

Tujune tanganku kok ya pas nggegem gegodhongan, mboko kuwi sakjane ramban pakan wedhus. Aku wedi menawa Mas Bayu mangerteni saknyatane, aku dudu golek kluban ananging mari ngising ana ning ngisor dapuran pring merga kakus ning ngomah nembe mampet. Adhiku pancen ngeyel, wis bola-bali dikandhani kok panggah guwang pembalut ning kloset. Wis telung dina iki ngising ning dapuran pring amarga bapak lagi bali isuk iki saka Solo.

Olehku mlaku sansaya rikat, pengin cepet-cepet mlebu omah banjur ndelik ning kamar. Pokoke dina iki aku wegah nemoni Mas Bayu kang wis adoh-adoh mara saka Semarang.

"Kae Mas Bayu jarene arep ewang bapakmu negor wit pelem ngarep omah. Kana gek ndang digaweake unjukan."

Aku panggah meneng ning njero kamar. Ora let sue Ibu ndodog lawang.

"Mbok ora pekok ta, Din!" ngendikane Ibu luwih sero. "Wis gedhe kok malah kaya bocah cilik."

Aku metu seka kamar banjur lungguh ana ning dingklik pawon, nuli guneman, "Nek ngelak ben ngiras ngombe sumur kuwi, Bu."

Ibu gedheg-gedheg krungu gumenanku. Biasane menawa Mas Bayu dolan, aku mesti seneng banget sasate nganti kabeh panganan ana kulkas lan pawon arep tak suguhke kabeh. Ananging dina iki aku memeng kepara wegah nemoni, weruh wae wegah.

"Kowe kuwi ana perkara apa ta karo Mas Bayu? Wong biasane kowe grapyak, sumringah menawa piyantune mara rene kok saiki malih dadi nesu, Din. Ora becik ngono kuwi, Din." Ibu lungguh ning ngarepku. Namatake raiku kang peteng kawit ngerti Mas Bayu teka.

"Pokoke dina iki aku wegah nemoni Mas Bayu. Titik!" Aku nuli mlebu kamar karo ngatonake anggonku nduwe perkara kang ora bisa tak pratelaake marang Ibu.

Ibu meneng wae meruhi tingkahku. Pancen lagi iki aku katon nganeh-anehi, lha wong biasane aku gemati lan ndemenaake anggone among tamu. Ora eram yen mantan-mantanku mbiyen akeh sing pengin ajak balen, malah kepara keluargane menyang omahku supaya aku gelem karo anake. Ananging aku wis wegah yen kon balen. Tatuku ora bakal tak laleake, menawa balen padha wae ya mung arep mangan jangan nget-ngetan sing bisa uga wis ora enak utawa sayup.

"Diana gek pekok, Mas. Ya wis sak anane wae ya, Mas." Aku krungu Ibu ngendika karo Mas Bayu kang wis rampungan olehe negor wit pelem ngarep omah. Rasane sansaya gething nalika krungu Bapak Ibu malah nyeritaake bab kakus mampet. Adhiku kang dadi biang keladi, mbasan ngerti menawa bapak arep bali, dheweke dolan kawit isuk amarga wedi didukani bapak.

"Sakmenika kakusipun sampun saged dipunagem dereng, Pak?" pitakone Mas Bayu. Seka njero kamar rasane aku pengin ngruket setan lanang iku. Gemes! Ananging saiki aku weruh wae lagi wegah.

"Ya durung wong kemau paralone malah pecah, Le. Sisuk anggone arep tuku paralon. Saiki aku wis kesel." Bapak katon memeng banget. Ibu nggresula karo Bapak. "Pak, mbok enggal dibenerake. Nek ora gek dirampungke mending aku tak akon Lek Tukimin."

"Kula mawon ingkang tumbas paralon. Mangkih dipunrampungaken sareng-sareng nggih, Pak." Mas Bayu ngadeg banjur mak sranthal lunga golek paralon, persis wong ngelih kang wetenge nrantang. Katon olehe kesusu lan wigati.

"Wah jan pancen calon mantu idaman. Beda karo Bapakmu iki sing mbiyen malah seneng ngintip Ibu adus,"

Ning njero kamar aku teturon sinambi ngenteni Mas Bayu bali seka anggone tuku paralon. Bapak katone ijik panggah ning ruang tamu udud karo wedangan. Ibu nuli nguprak-uprak Bapak supaya nyawisake peralatan kanggo mbenerake kakus mampet.

"Iki mumpung Bayu isa ngewangi. Menawa nunggu kowe isa nganti tahun ngarep oleh e ngising ning dapuran pring, Pak!" Ibu terus nggresula kawit Bapak bali ngomah mau isuk supaya mbenerake kakus dhisik tinimbang negor wit pelem.

Sinambi nunggu Mas Bayu bali, aku ngrungokake lagu-lagu lawas kang nadane sante kareben kahananku cepet adem ayem, ora kacau maneh. Ananging reka-reka kuwi ora ketekan amarga kasunyatane aku malah keturon nganti erep. Mbasan tangi kabeh wis peteng, Mas Bayu wis bali Semarang, adhiku wis bali ngomah malah lagi wae rampungan diompyang bapak kareben ora guwang pembalut ning kloset maneh.

"Mas Bayu wis kondur, Bu?" pitakonku.

"Uwis, Din. Mau kowe ditunggoni sue nanging ora gek tangi. Kae Mas Bayu numbaske soto kudus, neng ya nek saiki wis adem merga wis kawit mau awan. Kana diangetake sik banjur dimaem. Digemateni lho kowe ki, Din. Kok malah kowe wegah nemoni. Lha tujune Mas Bayu ora nesu kok ngonoake kuwi."

Saiki giliran aku sing didukani Ibu merga aku cuek karo Mas Bayu. Aku persis adhiku sing meneng wae nalika diopyang wong tua. Aku bisane mung delag-deleg karo nyokot lambe. Ora krasa eluh enget netes saka mripatku sing ujug-ujug mbrambangi.

Klunthing! Hpku muni.

Dek, iki Mas wis tekan Semarang. Sampeyan wis tangi durung?

Kakus e wis dibenerke, Dek. Saiki wis kena dienggo kaya adate

Terus kemau sing ning ngisor dapuran pring wis tak urugi. Suk meneh oleh e ngurugi lemahe sing akeh kareben ora mambu ngambon-amboni!

Aku sayang sampeyan, Dek 😙

 

Rasane aku pengin nangis, nuli tak balesi, "Mas, aku kangen..... Kapan Jogja maneh?" 

Tanganku uga nggegem minyak angin obat gatel kang dicepakake Mas Bayu. Ealah pancen bener menawa aku kerah lugut!

Yogyakarta, 5 Agustus 2020