Perjuangan dan kesungguhan usaha dalam mengelola lisan/meng-up date status/mem-posting komentar tidak kalah beratnya dengan upaya untuk merawat dan menjaga kemaluan!
Ibu, bapak, para sedherek rahimakumullah, ... mangga kula panjenengan sedaya tansah ngindhakaken raos taqwa wonten ngarsanipun Allah Azza wajalla, ingkang sampun paring anugerah werni-wernining kanikmatan sahengga kula panjenengan saged ngayahi agesang tanpa setunggaling alangan. Shalawat saha salam mugiya tansah lumeber katur Rasulullah Muhammad saw., ingkang sampun ngasta ajaran agami ingkang leres, nun inggih ajaran agami Islam.
Para kadang rahimakumullah, Gusti Allah ngripta manungsa punika pun kantheni kaliyan maneka kanikmatan, antawisipun: nikmat kasarasan, kalodhangan, raos aman, gesang tentrem. Saking sedayanipun, mbok bilih dipunutus ngetang, kula panjenengan mboten badhe saged ngetang setunggal mbaka setunggal. Allah swt. dhawuh ingkang tegesipun:
“Lan kalamun sira kabeh padha ngetung-ngetung nikmati Gusti Allah, sira kabeh tan bisa nemtokake gunggunge. Sejatine gusti Allah iku yekti Zat Kang Agung pangapurane lan Agung welase” (An Nahl/16: 18).
Ing antawisipun werni-wernining kanikmatan ingkang sampun diparingake Allah dhateng kula panjenengan nun inggih ing saklebeting badan wadhag pun anugrahi lesan. Kanthi kanugrahan punika, sampun dados kuwajiban mungguhing kula panjenengan kangge tansah nyukuri klawan njagi lesan saking sakwernining babagan ingkang pun karamake Allah saha Rasulipun, dhasaripun:
“Saking Sahl bin Sa’ad, panjenenganipun ngendikan: Rasulullah dhawuh: sing sapa wonge menehi jaminan marang awakku atasing kaslametane apa sing ana ing antarane saklorone balung tutuke lan apa sing ana ing antarane pupune sakloron, mula aku wani menehi jaminan suwarga marang dheweke.” (HR Bukhari & Muslim).
Saking wigatinipun lisan, ngantos-ngantos Rasulullah paring jaminan suwarga dhateng sok sintena kemawon ingkang saged njagi.
Lumantar lesan, kula panjenengan saged ngendikan kanthi sae; kula panjenengan saged ngginakaken lesan tumrap tumindak ingkang maedahi mungguhing pribadi saya tiyang sanes, kadasta kangge dhakwah, mucal, tutur-tutur, lsp.
Ngrumaosi utawi mboten, kula panjenengan asring nyiyak-nyiyakaken lesan; kanthi mboten kraos kula panjenengan asring migunakaken lesan kangge setunggaling tumindak ingkang mboten manfaati malah ugi migunakaken lesan kangge tumindak ingkang mboten diparengaken dening agami.
Para kadang kinasih rahimakumullah, Allah paring kanugrahan lesan dhumateng kula panjenengan punika mboten kangge digul-gulke klawan ilmu ingkang kula panjenengan gadhahi, mboten kangge ngapusi, mboten kangge ngenyek saha mboten kangge ngolok-olok; ananging kedah dipunginakaken kangge sakwernining perkawis ingkang sampun dipuntuntunaken dening Rasulullah.
Allah dhawuh ingkang suraosipun:
“He wong-wong kang padha iman, aja nganti suwiji kaum ngenyek marang kaum kang liya (jalaran) isa uga kaum (kang dienyek iku) luwih apik tinimbang kaum (kang ngenyek) lan uga para wanita aja padha (ngenyek marang) wanita-wanita kang liya (jalaran) bisa uga wanita-wanita (kang dienyek iku) luwih becik tinimbang wanita (kang ngenyek) lan sira kabeh aja padha madani awak ira dhewe (sapadha-padhane wong mukmin) lan sira kabeh aja padha ngundang siji lan sijine klawan paraban-paraban kang ala. Saala-alane pangundang yaiku pangundang kang ala sakwuse iman (pangundang kang ora disenengi dening sing diundang), lan sapa wonge kang ora mertobat, mula dheweke kabeh iku kalebu wong kang kaningya.” (Alhujurat/49: 11).
Kadang kinasih rahimakumullah, lisan saged dados sumber kaawonan ananging nggih saged dados sumber kasaenan, gumantung tumindak kula panjenengan. Ananging perlu dimangertosi, njagi lesan punika mboten ateges mendel mboten ngedalaken pacelathon sakedik-sakedika. Njagi lesan ateges manfaatake lesan kengge babagan ingkang sae, kangge mbudidaya perkawis dakwah kangge nggayuh mimpangipun umat Islam ing saklebeting mbangun kekiyatan sahan kemajengan sahengga umat Islam dados umat ingkang tansah ngrembaka laras kaliyan owah gingsiripun jaman.
Para sedherek rahimakumullah, pamundhut aturipun inggih punika: napa ta kula panjenengan sampun sami njaga saha manfaatake lesan ing saklebeting kasaenan? Mangga samiya tansah ikhtiyar kangge menggalih lajeng caos syukur awit saking kanikmatan punika kanthi njagi lesan ingkang sampun dipun augrahaken dhumateng kula panjenengan saksae-saenipun amrih tansah ing saklebeting paugeran syariatipun.
Kadang kinasih rahimakumullah, mangga kula panjenengan manungku puja saha ngeningake manah nyenyuwun wonten ngarsanipun Allah swt. amrih kula panjenengan tansah pikantuk hidayah saha panuntun ...
