Samodra kang jembar bawera kadya ngebaki jagad
Prau-prau kang awit pasang jala
Pra kadang nelayan kang awit muhung asung dedonga
Nyuwun nugraha Gusti kang Kasa
Supayantuk agunging mina
Sore iki... kapuranta warneng dirgantara
Nambah endahing swasana sapinggiring samodra
Sang Bagaskara awit pamit angslup manjing surup
Gumanti abyoring cahya kartika kang sinawur
Sumunaring candra kang awit ndadari mratandhani purnama pungkasan
Pra mudha taruna kang nganthi sisihan enggal asok rasa
Ngresepi endahing ratri ing sapinggire samodra
Gisik-gisik samodra lan perenging arga kadya paseksen brangta
Pra mudha taruna kang kapagut tresna
Angin sumilir nambah tentreming swasana
Swara ombak jumlegur mecahake samun
Sawetara. . .
Bebasan supena, aku mahanani kasunyatan
Lumaku bali ninggalake Parang Kusuma kang kebak crita. . .
Suruping surya, Soma Manis, Parang Kusuma Ngayogyakarta Hadiningrat
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
