Narapisi wettunna tosipakaingE rigau patujuE nariappallebbangeng Lao ridi maneng makkedaE: Nasaba engkanna mompo lasa nasabari virus corona.
Parellui pada makkalitutu nennia topada jagai aleta. Narimakkoannaritu, Taparajaika addampeng nasaba maeloka pasenggi pitu gau iyya makaweddingE usampaikangngi virus coronaE, yanaritu:
(1) Mamulanna: Agi-agi pura tapegau yarega pura takarawa, tabissai laloi jaritta, tasabungi si paccing-paccingna. Wae massoloE tapake, pede malewei pede makessing.
(2) Maduanna: Rekkoa moreki iyarega barassingengngi. Tapakkeadei, sibole-boleta apakkegunangngi sikkuta, sampoi ingetta nennia timutta.
(3) Matellunna: Tajagai pallawangetta, aja tomaladde sitampe yarega riaddeperi padatta rupatau. Tawerenggi pallawangeng, gangkanna seddi yarega dua metere. Yanaro riaseng "Jaga Jarak". Makkotoparo ajana jolo natopada majjama, siampe lima.
(4) Maeppana: Rekkoa masemmengngi, olo kengngi, moreki. Yaregga tasedding engka lasa poleiki, sibole-boleta magatti mapparesangngi aleta lao ri Puskesmas'E.
(5) Malimanna: Rikoengka topoleta pole ri saliweng kampong, oncongpasi pole ri saliwenna Tana Bone. Parellu magatti riapparapekang lao ri Petta Desa yarega ri DottoroE na Puskesmas'E
(6) Maennenna: Addibolaki, ajana takalalao rekko detogaga gau masero parellu. Nekkia rekko liwai parellutta na tasalai bolata, appakeki masker passampo inge nennia timutta. Topada mannini degaga salana.
(7) Mapitunna: Pada marello doangki lao ri Puang SewwaE, mamuarei napallinrungngi atanna pole risininna lasaE yarega gau mappasolangE.
Makkoaniro wappasengang lao ridi maneng pabbanuangku ri Tana Bone. Mamuarei engkaki pada makkalitutui aleta, makkalitutui sempulolota, matutui sikampongta.
Nawedding matti Insya Allah namadising enrengE nasalama mannennuangeng wanua alebbiretta wanua ri Bone
