Panduan Ntok Uhang Prabumulih yang Masok Zona Merah Covid-19

Baru beberapa hari kota Prabumulih ditetapkan sebagai zona merah Covid-19  di wilayah Sumatera Selatan. Penetapan zona merah ini bukan tanpa alasan, kota kecil yang berada ditengah-tengah provinsi Sumsel ini dilaporkan adanya temuan tiga kasus positif terbaru menyusul  1 kasus sebelumnya. Total ada 12 kasus positif di wilayah Sumsel.

Oleh karena itu, demi mengurangi penularan penyakit lebih lanjut, maka saya turut serta mengedukasi masyarakat melalui tulisan ini. Berikut saya bagikan panduan dan himbauan dalam bahasa daerah Prabumulih mengenai Covid-19 dan tata cara pencegahannya. 

***

Kepade wak, mamang, bibik, ninek, kakang, ngan adeng-adeng sekalian. Pedengan mungken la tau, ngape sekolah mak ini diliborkan? ngape uhang diajong mantap-mantap dalam huma? Ngape uhang datang ne jaoh-jaoh diajong beperikse dulu sebelum balek kehuma?

Sebabnye le ade namenye penyaket, nah name penyaket ini Covid-19 (Corona Virus Disease) ngape ade 19-nye? lenye taon pertame penyaket ini muncol di Wuhan, negara Chine taon 2019. Nah, name virusnye CORONA, macenye pakai 'k' jadi korona.

Penyaket ini dateng ne virus, base virus dekde kinak'an ngan buhak mate, enggolah tubo jegel-jegelkan. Die ni kecek palengan. Le die kecek jadi sare tubo nak melilek'i men tibe betegah. Itulah ngape kite diajong mantap di huma ngan dek jadi kebawa. 

Lenye penyaket ini lom atek ubatnye. Lom atek pil lok macam bo#rex yang dijual di warong. Dokter juge dek atek ubatnye, enggo pacak diubati sare ngan lame waktunye. Engke pule sifat virus ini ningke'i penyaket yang la ade sebelomnye. Jadi mon wang la saket tambah saket dibuatnye. Nyela laju ninggal sebelom sempat diubati.

Ciri-ciri wang kene penyaket ini saket kelungkongan,  kenengat dek beudem, demam, ngan sesak napas mon la parah nian. Biasenye muncol misal mpai ne bepegian jaoh atau ke wada yang virus itu dang rami, kidaknye wang kepindahan le beparakan ngan uhang kene virus atu. Men yang ngehikan, die lok dek saket pedie2 alias dekatek gejala, padahal virus tadi la banyak dalam paru-parunye.

Virus ini mindah liwat droplet, men base dusonnye pehecek'an aeh, pacak ne lioh kidak seleme wang galak behesen. Jadi die ni bukannye lok angen pacak ngelebabe. 

Wang kene tan ini men die megang ke barang-barang virusnye tinggal. Men tepegang le tubo engke droplet tadi dek sengaje masok ke dalam mulot, ke mate, kidak ke idong laju pacak mindah. Itulah ngape kite dek jadi beparakan ngan baseng uhang, diajong bemasker men dang saket, dan selalu basoh tangan men ne luah huma.

Cuma jangan takot ngan penyaket ini. Misal kite hajen bebasoh tangan ngan sabon yang benah, pasti virus ini juge lenget. Teros kite juge jangan neman ige megang muke, idong, ngan mate. 

Dek usah dulu salam-salaman ngan segale uhang, juge kurangi bekeliling karang kampong le nak jalan-jalan bai katek gawian. Kecuali uhang yang memang begawi, uhang tu endaklah di huma nguleng, cuma dek pacak makan mon nak lok atu.

Yang paleng penteng, kepade bibik, ayuk, mamang, ngan uwak yang empai ne bejalan jaoh lok ke Jawe, Batam, ape daerah yang dang parah-parahnye. Jangan sungkan beperikse ke puskesmas terdekat atau ke huma saket ngan bekurong di huma 14 ahi. Engke mon dek pule penteng nian, dek usahlah balek dulu ke duson. 

Kesian ngan pe ninekan, adeng-adeng, yang tue ngan gi kecek mudah kene tan atu. Saleng pikerkan kite men memang sayang, isok men tan ini la selesai pacak betegah.

Selame maseh statos PDP (Pasien dalam Pengawasan) ngan ODP (Orang dalam pengawasan) dek usah dulu keluah huma selagi lom dipastikan bebas Corona. Percayelah, ilok tubo mencegah ndai kan mengubati. 

Sikok lagi, kene corona bukan aib, bukan hal memalukan, jadi misal pedengan tau ade wang kene, minte tulong nian jangan digudak'i, jangan dihina, cukup dijauhi dulu ngan dienjok dukungan engke die cepat semboh. Men die semboh, berarti rantai penyebaran penyaket bekurang.

Segale uhang dek galak kene corona, dek atek wang kepingen kene, tapi takdir Allah men kan kene maseh kene tula. Cuma dengahkan ye, takder laen ngan naseb, naseb pacak dibuat. Mon pedengan sengaje bejalan-jalan petang ngelilengi pasar awak atek gawi, dek bemasker, bekumpol-kumpol ngan uhang ne jaoh2, dek galak bebasoh tangan, atu berarti memang nak nyakah mati nian. Nyakah nian balak, men mati nak ngajak2. Parak'i bai mubel truk minte tumborkan, jadi mati suhang. Abes cerite.

Ude ye, ayo same-same kite saleng jage sanak di mane bai mak ini. Saleng ingatkan, saleng tulong, temasok men die dang suntok. Terime kaseh la bace.

-329