Nawala Saka Ibu Bumi

Manungsa, majune teknologi jaman iki kudune bisa dadi salah sawijining piranti pambiyantumu kanggo ngolah alam lan lingkungan kanthi tumindak sing bener. Nanging kowe padha lena lan lali, saengga kabeh mau suwe-suwe malah dadi prahara. Sawangen kae, kalen, pinggir-pinggir dalan, sawah, lan lemah ing ngendi wae wis kecampur plastik. Lemah wis dadi cengkar. Tanduran pangan wis ora bisa urip subur, panenan mung sithik, lan akeh bangunan-bangunan anyar ngadeg ing sandhuwuring lemah.

Anakku, gelombang panas sing ngantem aku ing abad selikur iki udu mung ethok-ethok. Kuwi kedadean tenanan, saiki aku wis nandang pemanasan global.  Yaiku kahanan kang ora imbang ana ing ekosistem amarga munggahe suhu ing atmosfer, segara, lan daratan sing ana awakku. Kabeh mau ya amarga polahmu sing ngawur negori wit-witan saengga marai suhu panas. Sing gawe sadhengah penggawean saengga gas rumah kaca dadi dhuwur, anane emisi gas buwang kendaraan, limbah rumah tangga, limbah pabrik, limbah pertanian lan peternakan, boros listrik lan sisa pangan.

Saka sajroning ati aku duwe pangarep-arep supaya kowe kabeh enggal pada tumindak sing nyata kanggo nyegah remuking awakku   jalaran saka pemanasan global lan polusi. Dak elingke, menawa akibat saka pemanasan global lan polusi kuwi saiki wis asipat lokal. 

Bakal ana ketiga nglangka ing sadhengah papan.  Owah-owahan iklim uga bisa nyebabake kabeh awakku banjir, mudhune asil tetanen, lan munggahe banyu segara. Karana kedadeyan iki, bakal ana karusakan ekologis-klimatologi sing bisa nyebabake kerugian ekonomi gedhe.

Mula saka iku, enggala ngurangi gas rumah kaca, ngurangi bahan bakar fosil kanggo kendaraan lan industri, lan ojo boros listrik. Padha nandura akeh wit-witan utawa tanduran sing bisa kanggo ngeyup lan ngasilake woh sing bisa kanggo bahan pangan. Jaganen lingkungan sakiwa tengen omahmu supaya tansah ijo royo-royo. 

Ojo kakean migunakake plastik lan rabuk non organik. Ojo mbuwang sampah utawa limbah ana ing kali. Tindakna kabeh mau, ora mung mligi kanggo aku. Nanging uga kanggo kowe kabeh awit kowe bakal oleh pangan, sandang, lan papan. Kowe bakal ngundhuh hawa adhem, resik, lan seger. Lestarine sumber iline tuk banyu, eyup, lan nyipta iklim mikro. Pungkasane kabeh kuwi mau uga kanggo kepentingan uripe manungsa.

Ing tlatah Ngayogyakarta kowe padha duwe tradisi sedhekah bumi. Ana sadranan, gumbrengan, rasulan, lan sapanunggalane. Sedhekah bumi kuwi aja mung mbok mangerti krana ritual wae. Sedhekah bumi sing ana masyarakat kuwi sejatine dadi simbol harmonisasi antarane manungsa lan aku.

Kowe kudu mangerti yen kabeh sing mbok wenehake aku bakal bali minangka rejeki kang apik kanggo kowe uga.  Aku bakal menehi ngerti saperangan kabiasan padinan sing bisa mbok tindakake lan migunani banget kanggo aku. Tumindak sepele sing mbok wenehake aku kuwi bakal dadi amal murni kanggo aku. 

Menawa kowe padha nyuda migunakake plastik, ngirit listrik, nandur wit akeh supaya manuk utawa kewan liyane mangan woh saka wit sing ditandur, utawa ngresiki sampah ing kali cedhak omahmu, iku cara prasaja menehi sedhekah marang aku.  Sedhekah saka kowe sing kaya mangkono iku  sing wigati banget kanggo aku. Nanging minangka bumi aku bakal dadi sing tansah menehi tanpa ngarep-arep bali. Prasaja. Kaya ngono wae.