Pogat (1) : Asu Angguk-guk Jak Rawang

Pogat (1) : Asu Angguk-guk Jak Rawang
Oleh Aminuddin

I

BUCALANA  halom ronik di bah, bukawai handak ngarimbai-rimbai, Mang Pogat luwah jak rawang lambahan. Ngingking sangarobok ngambahko katiyak bubulu landok. Radu sina rogoh jak ijan. Mak ulah-ulah. Diantak anggomanna  podok pok bubasuh kukut. Budadah cutik. Cium pipi kabolah mangabolah, Mang Pogat andurung karitona tungguk di rang raya balak.
Togak sangarobok. Ngonako kacamata halom rik topi.

Kriiiing ...

"Dadah Mama ...!"

"Dadah juga papa!" balos anggomanna, maha cutik.  Cakak ijan muloh.

Tidipaya Mang Pogat kitaja oi iyo?

Makwat tidipa-tidipa. Pagi kuruk kantor. Mak uniga. Ngabsen. Wat rapat, yu iyot rapat. Mak ongka, langsung lapah.
Tiap harani Mang Pogat ratong ti kantor. Tolah kantorna: CV Minjak Mulak. Kuruk pagi, dibina ngalapor lagi, samakkung mulang tilambahan.

Pok bugawina ruwa tingkat. Di bah, karyawan bagian lom, tolahna. Gawina mih ngurusi luwah kuruk surat menyurat, ngalayani tamu sai ratong, rik urusan api jugaya terkait karidit ronik balak.

Karyawan bahsa rata-rata bai kaunyin. Wat sai mouli, wat hoda ompai bulaki. Pudakna hoda. Wat sai holau, wat ya pas-pasan. Dunggak cutik jak pudak kora.  Tiyanja mak ulah luwah. Kintu luwah, mak ya mongan rik mulang tilambahan sangrobok, atau urusan kantor sai mak pacak diwakilko.