Priwe kabare Lur? Moga kabeh pada bagas waras selamet ya. Aamiin. Inyong yakin njenengan kabeh mestine wis akeh sing pada ngerti. Menawa virus sing siki nyebar kue bahaya lan isa mateni. Apa mening ngger dewek ora pada matuhi.
Inyong sempet krungu kabar ngger nang kampunge rika Purwakerta kana jere ya wis ana sing ketularan. Tetep tenang ya Lur, inyong mudeng pisan kabar kue mesti gawe deg degan. Sebab adi-adine inyong juga pada urip lan golet pangan nang kana.
Winginane adine inyong sempet ngabari. Kanca-kancane wis pada bali. Wedi. Inyong kanda, aja panik tetep tenang nang jero umah. Ora usah mayeng mayeng, malah gur gawe masalah. Apa mening siki kerjane wis dipindah nang umah. Alhamdulillah.
Corona. Sepleret ncen apik jenenge ya. Ora nyangka ngger jebule kue jenis virus anyar sing isa mbahayani. Deneng isa kaya kue? Iya genah koh. Inyong juga ora ngira. Sing jelas siki dewek kudu waspada. Diakehi njaga awak lan aja kelalen wisuh tangan sing bener ya. Aja sembarangan ben viruse genahe ilang.
Sebab sing gawa lan nyebarna kan pada pada menungsa. Dadi cepet banget kaya muni pesawat jet. Wuuzzzz. Mula kue dewek kudu isa saling jaga. Aja sekarepe awake rika. Melas sing umure lewih tua lan rentan pisan karo penyakit sing bahaya. Ngger kena virus kie bakal dadi nambahi perkara.
"Pokokmen ben ora susah, sing pada betah ndekem nang umah. Dinggo ngusir viruse enggal kabur lan kabeh kuman mabur."
Terus kepimen ben viruse enggal mandeg ya? Ya wis, dewek para menungsa kudu mandeg juga. Ben viruse ajeg lan ilang dewek. Tetep betah ndekem nang umah ya Lur. Aja mayeng mayeng ngger ora ana perlune nemen. Lan aja kelalen mangan sing bergizi dinggo amunisi antibodi. Virus bakal klenger ngger dewek tetep buger.
Terus ngger terpaksa ketemu uwong kudu gawe jarak minimal semeter. Utawa sing dikenal karo istilah social discanting. Ben kenapa? Ya ben njagani viruse ora mlumpat sekang wong siji nang wong liyane.
Kan viruse cilik pisan ora bakal keton ngger ora dideleng nganggo alat khusus. Dadi dewek ya ora bakal ngerti wong ndi sing ditempeli. Mula aturan social discanting kie kudu bener-bener dipatuhi.
Oya aja kelalen nganggo masker ya Lur. Sesuai anjuran sing tembe metu anyaran. Sing munine, ngger wong sehat lan sakit pada wajib nganggo masker kabeh nek terpaksane garep metu umah. Kue nggo jagani ben viruse ditahan nang masker nggo si sakit. Lan nggo si sehat ben viruse ketahan ora mlebu nang awak.
Apa mening nek semisal dewek berpotensi carrier utawa pembawa virus isa ora ketara lho. Nah, sing penting dijaga baen ben viruse ra pindah. Dadi patuhi protokole nek terpaksane banget kudu metu sekang umah.
Ncen aneh lan angel pisan ya krasane. Padahal budaya wong Indonesia kan ngger ketemuan mesti salaman terus omongan. Merga darurat siki ya salamane mbatin lan omong-omonge dilongi dimin ya Lur.
Lan sing paling penting ndekem nang umah kue lewih dianjurna. Bosen? Ya mestine. Tapi kudu ditahan sit ya. Sing pada betah ben awake dewek ora susah. Nek ora patuh mengko suene sengsaya nambah. Melas sing wis kesuen pada nganggur nang umah merga tempate kerja terpaksa ditutup lan ra due pemasukan. Dadi ya lewih susah mbokan?
Tur ra tegel karo dulur sing berjuang nang garda depan. Nahan sekabehane nganti ikhlas nganggo klambi mirip astronot nggo njagani diri sekang serangan pandemi. Rela pisah karo keluarga sementara demi sumpah bekti sing kudu ditepati. Ngrawat sing wajib dirawat nganti pada sehat. Jan rasane mrebes mili tekan ati ra kuat.
Nek dewek ngeyel tetep mayeng mayeng, apa mening gawe kerumunan uwong, justru ra isa ngurangi beban. Sing ana malah wabah dadi ora rampung gur nambahi korban. Kan ya menungsane sing susah lan kesel mbokan. Ngger viruse sih malah seneng pisan. Isa terus eksis urip lan berkembang biak ra karuan.
Semisale dewek sabar, sadar lan ngerasa due kewajiban. Yuk gawe virus cepet pamitan. Nek pengin viruse enggal mati, dewek kudu patuhi. Anjuran pemerintah nggo mbasmi pandemi. Inyong yakin njenengan kabeh isa ngerteni.
Kie inyong juga jane bosen Lur nang umah baen. Nglekep arang kena udara seger. Dipepe ngger esuk gur 15 menit. Bar kue kudu mlebu umah krasane gur sedilit. Urung ngger bocahan pada reyang jaluk jajan utawa dolanan. Tapi demi kebaikan kabeh kudu ditahan.
Nek pengin enggal rampungan, ayo lawan bosene, aja kemrungsung pengin dolan lan jalan-jalan baen. Jan jane gampang ning kadang dewek cokan ngeyel, nah kue sing rada angel.Â
Pokokmen ben ora susah, sing pada betah ndekem nang umah. Dinggo ngusir viruse enggal kabur lan kabeh kuman mabur. Salam sehat nggo keluarga sekabehane ya Lur.
Niek~
Jogjakarta, 7 April 2020
