Sesorah Babagan Wigatine Ngeluru Ngelmu
Assalamu'alaikum warahmatullahi wabarakatuh
Alhamdulillahi rabbil 'alamin, wa bihi nasta'inu 'alaa ummu riddun ya waddin, wa 'alaa alihi wa shahbihi ajma'in. Amma ba'du.
Bapak Ibu dewan juri ingkang kawula hormati, Bapak Ibu guru pendamping ingkang satuhu kinabekten, ugi para kadang kanca ingkang kula tresnani. Ingkang sepindhah, sumangga kita sami ngaturaken puji syukur wonten ngarsanipun Allah ta'ala ingkang paring rahmat, hidayah, saha inayahipun sahingga kita saget makempal wonten adhicara lomba sesorah siyang menika kanthi sehat wal afiat tanpa alangan satunggal menapa. Shalawat tuwin salam, konjuk kita aturaken dumateng Nabi Ageng Muhammad SAW ingkang kula-panjenengan sami tengga syafa'atipun ngantos dumugi yaumul qiyamah samangkih.
Salajengipun, kula minangka sesulih saking (nama sekolah) ngaturaken agunging panuwun, amargi wonten kalodhangan menika kula dipunparingi wekdal, sahingga kula saget ngaturaken sesorah kanthi babagan wigatosipun ngeluru ngelmu tumrapipun pagesangan.
Ngelmu iku kalakone kanthi laku,
Lekase lawan kas;
Tegese kas nyantosani.
Setya budya pangekese dur angkara.
(ditembangake kanthi paugeran Pucung)
Bapak Ibu saha para kadang kanca, tugasipun siswa ingkang utami inggih menika sinau. Enggih napa enggih? Lajeng, napa sampun cekap dumugi sinau serasan? Menawi sampun kathah anggenipun ngeluru ngelmu, napa sampun gugur anggenipun kita hanetepi kewajiban? Mboten.
Kados ingkang kula sebat kala wau, ngelmu menika kalakonipiun kanthi laku. Maknanipun menawi kula panjenengan sami sampun sinau, ampun ngantos ngelmu boten dipuntrepaken wonten pagesangan. Ngelmu ingkang boten dipuntrepaken menika ibarat lading ingkang boten empan; boten saget migunani tumrapipun pribadhi napa melih liyan.
Tuladhanipun, wonten setunggaling siswa ingkang wonten sekolahan sampun dipunwucal kaliyan Bapak lan Ibu guru menawi mbuwang sampah, kedah wonten papan panggenan ingkang leres inggih menika tempat sampah. Ananging, siswa menika wonten pagesangan boten ngamalaken ngelmu ingkang dipungadhah lan tasih mbuwang sampah wonten kalenan. Menika naminipun ngelmu ingkang boten manpangat. Sakjane ngerti, tapi ora pedhuli. Lali, apa pancen lali? Mliginipun, ingkang kados menika, ampun dipuntuladha nggih?
Nah, siswa ingkang sae inggih menika siswa ingkang nggadhahi kesadharan dumateng wigatosipun ngelmu, ingkang nggadhahi karep sinau, lan migunakaken ngelmu wonten margi kasaean. Margi ingkang sae menika utaminipun ingkang dipunridhoi dening Allah SWT.
Wonten setunggal hadis ingkang lafalipun:
Sabdanipun Nabi SAW, sinten kemawon tiyang kersa ngamalaken ngelmu ingkang dipunmangertos, mangka tiyang menika samangkih pinaringan anugerah dening Gusti Allah ngelmu-ngelmu ingkang dereng dipungadhahi.
Sumangga kita prenahi niat kula panjenengan sami, midhangetaken guru hanyinau agama lan ugemi, dados tiyang kanthi wonten donya dumuginipun akhirat pinaringan barakah-berkah, kanthi migunani.
Bapak Camat tindak Sala,
Tindak Sala piyambakan.
Menika cekap atur kula,
Mugiya dados seserepan.
Cekap semanten ingkang saget kawula aturaken, menawi wonten cicir cewet kuciwanipun anggen kula sesorah utawi tindak lan tanduk ingkang boten mrenani dumateng penggalih, kula nyuwun pangapunten.
Wa billahi taufik wal hidayah, wa ridlo wal inayah,
Wassalamu'alaikum warahmatullahi wabarakatuh.
