(ini artikel genjer berbahasa Sunda)
Cenah mah hirup di kampung teh genah tur tumaninah. Rek barangdahar rek henteu sagala kabutuhan bakal kacumponan. Ah, kitu soteh ari keuna ka jelema nu boga, da pikeun kuring mah nu cicing di lembur saukur ngumbara taya gawe taya kaboga, angger we sagala hese. Sangsara kacida.
Komo ayeuna harga sagala naek, beas naek, gas naek, euweuh nu teu naek, nepi ka bangba bungbu ge nararekel. Lieur estuning mikiran kumaha ngabagi-bagi duit jang balanja ari poe pasar teh. Atuh da rek teu lieur kumaha, ari panghasilan taya anjokna, ari kabutuhan mani merejel taya pakemna. Tungtungna kuring nu lieur.
Balanja teh nu kaitung marurah we, siga mangkukna kuring ngan saukur meuli tahu, oncom tur genjer dua beungkeut jang deungen sangu. Kacipta tumis genjer di cikuran bari semu lada. Mana teuing pedo elomna ceuk si cepot na wayang bobodoran tea mah. Nya geus lila deuih keur mah kuring teh teu ngadahar genjer, asa ku sono jadina teh.
Jaman kiwari mah genjer ge meni kat kudu meuli, sabeungkeutna lima ratus perak. Padahal lamun daek ulin ka sawah mah, meni sakitu ngajejembrungna genjer teh. Ku nu boga sawah ge da tara diala, sok dihegaekeun malah mun genjerna diundeur teh. Atoh itung-itung ngurangan jukut, pajarkeun na teh.
Sok hayang seuri lamun dahar deungeun sanguna make genjer teh. Pedah eta sok kacaritakeun ari genjer mah asup kitu rupana, mengke kaluar na ge kitu-kitu keneh. Teuing enya teuing wadul da kuring mah tara nalingakeun. Nu puguhmah gura-giru beberesih we tara tungala tingali kanu geus dipiceun.
Di kampung mah genjer teh diaduna jeung oncom. Kawas sambel deui karasa cikur karasa cengek. Lamun taya oncom nya ukur dikulub kitu we jadi lalab coel sambel tarasi. Kolot baheula mah malah aya nu wani dilalab atah we, ngala harita di galengan sawah, dikumbah na cai solokan tuluy balakecrakan dahar di saung sawah. Kacipta daharna teh jeung sangu panganteuran.
Tapi ari di kota mah cenah diadukeuna teh jeung tauco. Teuing kumaha rasana da kuring mah can pernah ngasaan ari genjer diasakana jeung tauco mah. Sigana ke kabehditunakeun mah genjer ge bakal diadukeun jeung maones, keju atawa jadi pangeusi salad.
Heheuy deudeuh...! Sugan atuh Teh Usi anu aya di Amrik tiasa ngagembol genjer ka dinya? Upami tiasa wios lah abdi bade icalan genjer we di emper Patung Liberty, hahaha...
Ieu carita genjer teh ku kuring dijieun minangkala ngaramekeun acara Lomba Nulis Artikel Bahasa Daerah nu dialpukahan ku Teh Usi Saba Kota.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
