Geguritan : Aku Dudu Sapa-sapa

Dulur Kabeh sing dak tresnani,

Urip ing Donya Iki suwe Mijet wohing Ranti.

Paribasan mung mampir ngombe. 

Sakeplasan kaya impen sing wis lumayu ngadoh.

Mumbul ing ngawiyat ngideri jagad banjur ilang musna kasapu angin wengi.

Kabeh sing ana Amung semu 

Amung bisa gawe seneng sing sedhela.

Umur mung kaya wong sing nandur jagung.

Nanging ombyake jaman Saiki Kabeh sing dinulu mung arupa bandha Donya.

Prasasat ing saindhanging Donya mung mburu pangkat 

Nglirwakake sedulure sing kesrakat kaliwat-liwat.

Mangertiya menawa Kabeh mung jejer pacoban.

Dulur Kabeh sing dak tresnani.

Apa Kowe suthik Karo aku? 

Amarga aku Dudu Sapa-sapa.

Ora duwe apa-apa sing bisa di agulake 

Apamaneh mas picis raja Brana. 

Nanging aku isih duwe ati sing kuncara pindha damar. 

Cumlorot cahyane madhangi kalaning pepeteng.

Yaiku paseduluran sing tuwuh saka ati. 

Sing Wiwit langka ing jaman Saiki. 

Dulur Kabeh sing dak tresnani,

Aku Dudu Sapa-sapa,

Bisaku mung paring pemut 

Bab sejatining Urip. 

Bab lelakoninb Urip.

Kowe lan aku mung saderma jalma sing tinitah.

Ora duwe daya 

Amung saka welasing Gusti Kang Murbeng Dumadi.