Lilin kang Murub ing Ati
Oleh: Suyito Basuki
Lilin kang dakgawa
Dakpandeng klawan njinggleng
Binarung lelagon adi suci
Pitakon kang dumeling ing ati:
Apa isih bisa murub nganti tumekeng ratri?
Kadhang kala urip rinasa saya rekasa
Kaya-kaya wegah mecaki dina-dina
Awit momotan kang nindhes
Sukma sambat ngaru-ara
Temah badan lesah karosan ilang murca
Nanging Sang Roh Suci kang miber-miber ing ndonya
Kuwi menehi daya
Gregeting urip dadi manjila
Kakuwatan pulih kaya Anjani Putra
Natkala kasinungan Aji Maundri, ngremuk Prabu Rahwana Raja
Lilin kang dakgawa
Dakpandeng klawan njinggleng
Binarung lelagon adi suci
Ora mung murub tumekeng ratri
Ananging bakal terus murub mangalad-alad nganti timbuling Sang Bagaspati
Kang madhangi bumi
Murub
Mbulat-mbulat ing ati!
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
