Lilin kang Murub ing Ati
Dening: Suyito Basuki
Lilin kang dakgawa
Dakpandeng klawan njinggleng
Binarung lelagon "Ndalu Suci"
Pitakon kang dumeling ing ati:
Apa isih bisa murub nganti tumekeng ratri?
Kadhang kala urip rinasa saya rekasa
Kaya-kaya wegah mecaki dina-dina
Awit momotan kang nindhes
Sukma sambat ngaru-ara
Temah badan lesah karosan ilang murca
Nanging miyosing Sang Pamarta
Kuwi menehi daya
Gregeting urip dadi manjila
Kakuwatan pulih kaya Anjani Putra
Natkala kasinungan Aji Maundri, ngremuk Prabu Rahwana Raja
Lilin kang dakgawa
Dakpandeng klawan njinggleng
Binarung lelagon "Ndalu Suci"
Ora mung murub tumekeng ratri
Ananging bakal terus murub mangalad-alad nganti timbuling Sang Bagaspati
Kang madhangi bumi
MurubÂ
Mbulat-mbulat ing ati!
Jepara, Minggu Wage 24 Desember 2023
Katrangan:
Anjani Putra = Anoman
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
