Kadosipun sepele nanging wigati. Laden tamu boten sembarangan, waton bekta nampan isi gelas utawi pacitan lajeng dipunladosaken. Kawula mudha wiwit jaman rumiyin dumugi samenika kathah sinau babagan ngladosi tamu ing kelompok karang taruna. Ngayogyakarta kalebet Istimewa amargi karang taruna ing saben dhusun tansah regeng lan mlampah program-programipun, salah satunggalipun dados sinoman saben ewuh ing dhusun.
Ngladosi tamu wonten tata cara unggah-ungguhipun. Jaman rumiyin kawula mudha dipunsinau caranipun laden. Wonten gladhen lan praktek sesarengan rumiyin saderengipun dipuntugasi juru ladi tamu ing pawiwahan utawi sanesipun. Istilah samenika 'kelas melayani tamu' dipunwontenaken supados para mudha menika nalika ladi tamu boten nglelingsemi.
Ladi unjukan saha dhaharan menika kedah nggatosaken manek warni, antawisipun caranipun nyepeng nampan utawi tembor. Gelas-gelas ing nampan kedah anteng, sampun ngantos wedang ing gelas menika wutah dhateng nampan ingkang dadosaken gelasipun teles lan reged. Menawi sampun anggenipun bekta ugi kedah ngatos-atos lan inggil, saenipun nampanipun sejajar kaliyan tutuk utawi grana. Ancasipun supados unjukan utawi dhaharan ing nampan boten kewutahan toya saking tutuk utawi grana. Kadosipun sepele nanging menika kalebet tata kramanipun tiyang ladi.
Dumugi papanipun tamu, menawi tamu lenggahan ing kursi juru ladi menika saged ngaturaken unjukan utawi dhaharan kanthi ngadeg ing sisih kanan utawi kiringipun tamu. Menawi para tamu menika lenggahan lesehan, juru ladi kedah lampah dhodhok. Menawi kakung anggenipun mandheg ing sangajeng tamu saenipun sila lajeng ngladosaken unjukan utawi dhaharan, menawi putri saged kanthi lenggah timpuh lajeng ngladosaken unjukan utawi dhaharanipun.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
