'Memaknainya 05'

SENIN, 14 OKTOBER 2024

"Teteh.. Enggal uih.."

"Teteh.. Enggal ka Bandung.."

Euis kacida pisan gundahna. Bulak-balik ngintipan janela, ningali Ama anu kacida nalangsana. Selang-selang teh narapeul kana panangannana, bari teras disuntikkan ku suster, ngilu. Bajuna sorangan ge acan disalin tina pasosore keneh, beungeutna kusut tur pinuh ci tangis. Kacida panikna pas Mang Udu nelepon yen Ama asup rumah sakit.

Hapunten Ama.. Euis lepat.. Euis hilap..

Asa kaduhung Euis damel di Cianjur teh, tisusut tidungdung milarian artos najan ka pun biang sorangan teu aya waktos. Enya we saur Apa sateuacan anjeuna mangkat teh, eungke mun geus digawe mah, bakal hese patepang jeung indung bapak. Euis teh emut deui ka Apa, mimiti bade ka Cianjur teh anjeuna diomatan, ulah hilap ka bumi sorangan, najan diluar muruhpuy duit tapi kolot nitah di imah mah nya matuh we di imah.

Tapi enya we budak teh merekedeweng, Euis tetep ka Cianjur lantaran usaha anu piduiteun. Teu kungsi balik sanajan Ama sok neleponan Euis kudu enggal uih ka Bandung.

"Teh, mangga ka lebet. Ibuna atos gugah." Saur suster. Bari nepuk pundak Euis anu katingali pisan keur ngalamun.

Euis teras asup, bau obat-obatan teh kaambung ku irungna. "Teteh.." sorana meni lemes pikarunyaeun.

"Teteh atos uih Ma. Ama enggal damang, urang ngariung deui di bumi.. Teteh mah moal ka Cianjur deui, bade sareng Ama di Bandung." Euis eurih-euriheun bari ngeukeupan Ama.

"Teteh.. Naha karek uih ayena.. Ama teh asa tiiseun teu aya Teteh di bumi." Beuki ngagedean bae ceurikna Euis. "Hapuntennya Ma.." sorana beuki gempeur sabab Ama ngusapan buukna.

"Kunaon Teh? Pok nyarios ka Ama.. Sangkan Ama teu deui nyangka-nyangka ka Teteh." Euis ngagideg, hate na jiga dicakaran ku taring.

"Teh.. Hapunten bilih Ama sok ngarepotan.. Hapunten bilih Teteh enya aya panyeri hate ka Ama.." Euis teu kawasa nahan ci tangisna, diusapan damis Ama anu oge cirambay ci tangis. "Teu kitu Ma.. Euis isin ari uih tapi teu acan bisa mawa ka bungah tur Ama.."

Eta dua jelema teh sangkan pakeukeup-keukeup, sieun kaleungitan. Dua jelema anu tos teu mikiran deui ripuhna dunya, aranjeunna mah sibuk ku dua sangkan tereh ngariung deui di imah.

***

Nelengnengkung- nelengnengkung 

Geura gede geura jangkung 

Geura sakola ka Bandung 

Geura makayakeun indung

Nelengnengkung- nelengnengkung 

Geura gede geura jangkung 

Geura bisa talang tulung 

Ka bapa reujeung ka indung

Euis cicing na pojokkan kamar, sirahna nunduk ka tuur. Meureun tunduh ngadenge lalagu tur budak dieyong. Tapi da eweuh budak.. Eweuh oge indung anu mepende budakna..

 

Ama.. Euis kudu kumaha.. Kuring kumaha saterasna Ama..

 

Ku indung dipunjung-punjung 

Ku bapa didama-dama 

Reup deungdeung talaga tisuk 

Reup sakeudeung nepi ka isuk