Gagat isuk nang gunung sing ana luraeh.
Ora kaya biasane, matane inyong kedisitan melek merga krungu weduse tanggane mbaor-mbaor.
Mbe-mbe..... sing ngasi telake garing sing ndue ora ngempani bae.
Inyong sapa kae sapa, ya tetap ana bedane.
Angger inyong rika krasa, ya paling kemruwuk gagian digrujugi wedang kopi sing buket,kandaeh mbleketapet, mbanjur meneng karo ubles mambu obongan klembak.
Seteruse, inyonge ora kepengin kedisitan karo pitik trondol sing uga gasik gole koreh nang pekarangane deweke, mbari ngiras irus ekspansi mburi pedangane tanggane.
Ora let sue, Simad nongol sekang njero pedangane deweke mbari nyletuk,
“kang! mageh pada ongkek! mbok esih kepengin nyekek?”
Kae srengengene mbok wis mletek, apa arep njugur bae rikane?
Kepriwe? karo mandan nggradug sikil meja, inyong mbanjur gagian njengkirat.
Mbari mbalesi lewih ketus maning, Mad..Simad....
Mulane gagian ngarah bojo, ngko ngerti nek hawane atis kaya kiye kepenake kelon karo tanggane eh..karo bojone...
“Ya ora kaya kue kang?” rika mbok neng kene gurune inyong karo boca-bocah pada.
Lha wong ora kaya biasane, nek esuk wis prigel ngapa bae, lha isuk kiye malah ketungkul njugur, jane rika agi nglamuni apa kang... goeroe? apa lagi mikir anak-anake tanggane sing pada sinau nang kene?
La kue deneng ngerti, mbanjur kepriwe? jajal depikir sing temendil eh temenan...
Masa nyong diarani guru, ning samben? lha kepriwe maning, guru ya guru ning kudu bisa nyambi mbok.., anane lemah ora kudu disewa, gari-garine gelem gebrus mbanjur tandur lombok apa ora? anane wedus? kae dititipi ya kudu brayan samben golet ramban, mbesuk ngemben kena nggo agan sembelehan karo tangga-tanggane.
Karo nylinguk ngidul, inyong krungu suara srek...srek..kae bocah pada mangkat! kiye dong sapa gurune?
Simad sing urung mambu banyu karo odol akhire dadi guru, nggenteni gurune sing agi nyambi nggawe bedengan nggo nandur pare.
Keletan limang jam, mbanjur teka guru anyare Simad, monggo diaturi mucal kang guru, niko lare-lare meh telungwulanan kurang open guru sing temenan.
Inyonge terus diceluk nang Simad kon ngancani mbari dopokan.
Mbanjur panjenenganipun aweh peweling karo inyong, Simad lan kanca-kanca.
Sing jenenge bocah kue gampang niru karo sing mulang, dadi angger mulang pada sinau klamben sing rapi, ben bocah-bocah juga teyeng rumangsani, merga kelewihane deweke kue merga akeh kekurangane, dadi pada sing sumbut karo tujuane.
Oh guruku, tanggal 5 winginane dina ngemuti guru, muga-muga apa niate karo sumbut tujuane ora ilang merga ikhlase kudu mulang anake tanggane, mbanjur berkah sekabehane.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
