SOTR (sahur on the road)

sekarang lagi musimnye  sahur on the road (SOTR)

entu kegiatan emang ca'em be'eng, ngasi makanan buat kaum dhuafa, musafir ame orang nyang waktunye sahur tapi masih di jalan.

biasenye entu dijalanin ame orang atawe turu-turu nyang emang mampu, baek duit sendiri hate duit patungan.

kemaren ade berita kalo ade anak es em a (baru umur 17) jadi korban kecelakaan kelar SOTR di daerah mampang

kalo kate cerita, tuh anak-anak kelar ngebagiin makanan sahur mo balik ke arah pasar minggu.

die orang pade beboncengan naek mubil yaris, kagak tau nape, tuh anak-anak bawa mubilnye gancang banget, al hasil tuh gandaran oleng, lantas nabrak separator baswei.

--------

kebetulan saye tukang ojek nyang suka ngalong kalo malem,

kalo pas ade rombongan mubil atawe motor nyang ngebagiin makanan sahur, banyak banget kaum dhuafa (?) nyang ngantri, malahan sebelon tuh rombongan dateng tuh kaum dhuafa udeh pade ngegerombol di pinggir jalan.

begitu rombongan ngebagiin tuh makanan, orang-orang pade berebut ampe-ampe nasinye pade belarakan di tanah

----------

saye meratiin atu-atu orang nyang pade ngerubutin, ade nyang saye kenal, ade nyang kagak,

rate-rate orang nyang saye kenal emang orang suse tapi bukan orang nyang butuh sahur, lantaran saye tau persis kalo siang tuh orang kerjaannye cuman megangin kartu ame ayam aduan sambil makan minum seenak jidatnye, boro-boro kate puasa

----------

ngkali kudu dipikirin lagi ame temen-temen nyang emang punya niat buat ngadain SOTR, pegimane caranye biar makanan nyang kite niatin buat orang sahur jadi kagak mubazir

kalo menurut saye, kalo emang ade nyang punya niat buat ngadain makanan sahur, mending disalurin ke masjid atawe musholla nyang ade di kampung-kampung

jadi syiarnye malah keliatan

tenabang, 13 agustus 2011