"Sarung gue kan memangnye sudah tua ya, gue minta bini gue bawa ke tukang jait biar dirapiin dikit lah. Dagang keliling itu paling enak pakai sarung tua, semeriwing dan adem" lanjut Zonk.
"Besoknye sarung gue lihat kok berantakan, jaitannya nggak bagus. Bopeng sana sini" kata Zonk. "Gue langsung tanya ke bini gue, tukang jait mane nyang ngerjain? Gue mau protes, kerjaannya jelek. Gue mau gebok nyang bikin sarung gue bopeng"
"Eh ternyate, bini gue bosss nyang jaitin. Sayang sama lakinye mungkin yah, sama ngirit duit juga." Zonk berkata. "Abis itu rapet dah ntu daster, rapet serapet-rapetnye. Gue juga diusir disuruh tidur di bale luar. Biar nyamuk dapet donor dari gue yang bongsor, kate bini gue"
Bang Adi cuman manggut-manggut sambil mengelus muka nyang bonyok.
"Sudah ah Bang Adi, gue mau lanjut jualan" kata Zonk sambil jalan keliling lagi.
Jambu klutuk buah kedondong
Kalau batuk obatnye pasti kedondong
Dong Dong Dong
Lewat rumah Kong Abil, Zonk dipanggil. "Zonk dong dong, sini loh" teriak Kong Abil. "Kenape kong?" tanya Zonk. "Gue lagi batuk ini, lo tereak kedondong obat batuk kan. Gue mau beli tapi lo jelasin dulu cara pakenye" jawab Kong Abil.
"Gini kong, kedondongnya dikupas. Terus dagingnya dimakan, sisa biji kan yeh. Ambil benang, biji diiket. Biji dondongnya ditelen kong, sambil ditarik keluar masuk. Gue jamin, tenggorokan gatel dan batuk engkong pasti ilang." Zonk njelasin.
"Eh buju busyet, lo pikir gue apaan? Codot nyang gampang lo kibulin yeh. Dongok loh" Kong Abil ngamuk. Masuk ke dalem rumah sambil nyincing sarung dan keluar bawa golok.
