Urip Bareng

  "Teman hidup, ning gak hidup bersama ki aku gak iso."

            "Kan mung sementara. Sampek cukup tabungane dingge mbuka usaha dhewe."

            "Yo aku melu."

            "Lek awakmu melu butuhe luwih akeh maneh. Iki kan cek aku iso nabung luwih akeh."

            "Lha trus selama mbok tinggal opo aku gak mangan, gak butuh tuku-tuku sabun?"

            "Lho yo butuh, ning kan gak akeh. Lha lek awakmu melu, brarti kan kene butuh omah, sak enggake kosan sing luwih gede cek iso dingge wong loro. Iku kan biaya."

            Ratri ambekan dowo. Arek wedok iku sik durung iso ngerti opo sing dipingini bojone. Ardi pingin kerjo nang luar kota, ono tawaran soko kancane. Pingine Ardi dheweke dhewe ae sing budal. Wong lanang, panggonan anyar, nang proyek sisan, luwih gampang lek ngurus awake dhewe. Ratri dikongkon nang omah ae karo wong tuwane, ben sasi ngko dikirimi duit dingge celengan karo kebutuhan sehari-hari, ning areke durung gelem. Ratri njaluk melu.

            Wis meh seminggu sakjoke Ardi ditawani kancane, wong lanang iku langsung ngomong nang bojone. Ning sampek saiki durung iso nyakino bojone cek gelem ditinggal. Sakjane yo ora adoh-adoh banget, Surabaya-Jakarta, ning Adi durung siap nggowo bojone. Durung ngerti gaweane bakal koyok opo, panggone yok opo.

            "Sesasi sisan lek iso tak usahakno mulih. Lek gak ngko lek wis ngerti panggone koyok opo yo awakmu ae sing moro. Ning saiki gak usah melu dhisik."

            "Awale yo mesti ngunu. Ngko alasan gak iso mulih, repot jare, tibake onok sing liyo."

            "Gusti, pikiranmu cek eleke sih. Aku ngene iki yo dingge sopo, dingge masa depane awake dhewe."

            "Lek ancen dinge aku, masa depane kene, lha lapo aku gak oleh melu?"

            "Guduk gak oleh, ning kan ndelok keadaane dhisik yok opo. Nang kono ki mbarang-mbarang larang. Kan lumayan cukup aku, aku iso mangan opo ae. Lha awakmu? Wong lek gak enak ae gak gelem. Nang omah kan iso mangan opo ae, murah."

            Ora nemu sepakat. Wong loro iku akhire ngalih dhewe-dhewe. Ratri metu, embuh nang ndi. Ardi milih dolan nang nggon kerjoane Diman.

            "Yok opo yo, Mas?"

            "Yok opo yo, jenenge rumah tangga yo kudu digoleki solusi bareng sing podo-podo enake."

            "Lha de'e ki njaluk enake dhewe."

            "Mungkin gurung paham ae karo niatmu, karepmu."

            "Wis tak jelasno, Mas. Lha iku lho melu proyek. Sampeyan ngerti dhewe lek nang proyek yok opo. Turu ae sembarangan, mangan yo sakonoke cek iso ditabung. Lha mosok aku seneng-seneng dhewe katene."

            "Yo mungkin iku sing bojone rung iso nrimo, gurung ngerti. Dikei ngerti alon-alon."

            "De'e ki cemburu asline, Mas. Dipikire aku sengojo golek kerjoan adoh cek iso gendakan."

            "Lha ngunu opo gak?"

            "Yo gak lah."

            "Yo iku sing kudu dibuktikno."

            "Lha yok opo mbuktikno lek aku gak lungo, Mas? Wong iki kate budal ae digandoli."

            Ardi ketok mangkel. Wong lanang iku sik ora iso ngerti karo pikirane bojone sing ngeyel pingin melu kerjo nang Jakarta.

            "Masalahe sasi ngarep aku kudu wis budal lek ancen pingin melu. Iki aku gurung jawab, ning lek kesuwen wedi lek dijupuk arek liyo."

            "Njajal dijak omong alon-alon. Awakmu ojo emosi. Lek perlu dijak nang proyekan kae lho, cek bojomu onok pandangan."

            "Proyekan ngendi?"

            "Proyekan jembatan kae lho. Iku lak yo akeh wong proyek."

            "Wooo ambyar."

            "Heh?"

            "Malah selot gak oleh, Mas."

            "Lha lapo?"

            "Lha kae arek-areke gendeng kabeh. Iku lak arek nom-noman akehe, jare senenge 'njajan' podoan."

            Diman ambekan dowo.

            "Yo mungkin iku sing dingerteni bojomu. De'e ngerti arek-arek kae, dipikire ngko awakmu yo koyok ngunu lek adoh soko omah."

            Ardi sing mau emosi, saiki rodo mudun. Wong lanang iku mulai paham. Bojone mungkin ngerti utowo krungu polahe arek proyek nang kampunge sing lagi garap jembatan anyar.

            "Tapi kan gak kabeh wong proyek koyok ngunu, Mas."

            "Yo ancen gak. Ning iso ae bojomu ngertine sing kebetulan 'nakal' dadi kabeh dianggep podo."

            "Iyo sih. Lek menurute sampeyan yok opo, Mas? Aku ki pingin njajal dan gajine ki jare lumayan, Mas."

            "Pingin yo dijajal, ning sing ditinggal yo dikei ngerti sik. Ojo ninggal dalam keadaan gak ikhlas, gak apik. Niate pingin nyenengno bojo, ning lek bojomu gak lilo yo gak nyampek ngko."

            "Ho oh. Sik, ngko tak pikire maneh."

            "Ho oh, sing penting tenang. Dipikir temenan, dijak diskusi, golek solusi bareng. Iku jengenge hidup bersama, rumah tangga."

            Ardi manthuk-manthuk.

            "Sampeyan tahu LDR karo Mbak Wiji?"

            "Tahu."

            "Yok opo rasane?"

            "Ngelu," suare Diman."

            "Heh, ngelu yok opo?"

            "Kae ngunu lek ketok kadang ngejak gelut ae, ning lek gak ketok ngangeni. Aku sing gak kuat."

            "Hahhahahaa..." Ardi ngguyu banter.