KDRT

"Karepmu saiki opo? Njaluk pegat, heh?"

Paini nangis. Wong wedok iku ora nyauri bojone.

"Kurang opo aku iki mbelani koen? Jaluk opo-opo ditukokno. Panganan, sandangan ora tau kurang. Wong wedok kok gak onok cukupe."

Tomin nangis karo gandolan mak'e. Arek cilik iku wedi ndelok bapake ngamuk-ngamuk. Adike nang kamar yo nangis ning dijarno karo wong tuwane.

"Saiki opo alasanmu, heh? Gurung ditukokno speda montor? Mbok pikir lek koen gelem karo lananganmu iku trus langsung ditukokno speda montor? Yo njajal kono. Anak wes loro, pengawean nesu ae, tukang njalukan, opo mbok pikir iso betah wong lanang karo koen. Jajal kono, aku pingin nontok. Pirang suwi kuat ngladeni koen."

Tomin sing ora kuat ndelok mak'e nangis karo ndelok bapake sing kaya wong kesetanen mlayu metu. Arek cilik iku mlayu nang mburi omah trus njogrok karo nangis.

"Delok kae anakmu. Gak sakno koen karo anakmu?"

Paini sik meneng. Wong wedok sing biasane tukang ngomel iku meneng cep, ora iso omong. Atine lara, ora mung mergo omongane bojone ning yo mergo pipine abang mari dikaploki bojone. Rambute acak adul. Tangga-tanggane sing krungu ono rame-rame nang omahe mung inguk-inguk nang ngarep lawang karo sanding cendelo. Ora ono sing wani nyedek.

"Ayo, lapo meneng ae? Ngroso salah koen saiki? Nyesel? Wong wedok dijarno ae kok malah nglunjak, gak ngajeni wong lanang."

Paijo sing kaet mulih kerjo ndelok rame-rame nang omahe Paini melu mampir. Bareng ngerti masalahe wong lanang iku mlebu.

"Wes mas, gak enak karo tonggo. Sakno anakmu sisan. Delok kae nangis nang kamar dijarno ae. Tomin yo ngguguk nang mburi omah kae," omonge alon nang Pak'e Tomin.

"Ojo melu-melu. Wong wedok koyok ngene iki gak iso dijarno ae, nglunjak wisan!"

"Gak melu-melu mas tapi mbok yo diomongno apik-apik. Ngene-ngene iki yo mak'e anak-anakmu, bojomu."

Mari Paijo mlebu, wong-wong sing mau mung nang njaba siji loro melu mlebu. Salah siji wong wedok nyedeki Paini trus ngewangi wong wedok iku ngadeg. Dituntun Paini mlebu kamar. Pak'e Tomin sing mau emosi saiki rada mudun. Paijo ngajak wong lanang iku lungguh.

"Lha iyo Jo, kurang opo aku iki cobak? Mben dino kerjo ngge anak bojo, mbarang-mbarang dituruti kok malah kecantol lanangan liyo. Loro atiku."

"Sabar sik mas, gurung mesti koyok ngunu. Digenahno dhisik. Wong rumah tangga iku lak kudu iso komunikasi sing apik ta, gak langsung maen tangan koyok ngunu."

"Mangkel aku, Jo. Gak ndelok awake koyok opo. Anak wes loro, ayu yo gak, pinter opo maneh. Isone mung njaluk duit, ngrengik. Dipikire aku rugi ngunu ta lek de'e lungo, gak blas. Malah seneng aku."

Akhire Paijo ngancani wong lanang sing lagek lara atine mergo nemoni bojone selingkuh. Sakjane yo ora iso diomongno selingkuh wong durung genah perkarane. Paini sing wingi mari melu pelatihan limang dina nang kecamatan ngesiri salah siji petugas pelatihan. Wong wedok sing wis oleh nomer telepone langsung smsan. Mulane mung alasan pingin nakok perkara pelatihan sing wis dikekno, suwi-suwi teka ndi-ndi. Ndilalah isuk mau kok ketemon bojone smse.

Nang omah, Narti sing lagek mari lek resik-resik omah lungguh nang pinggir kasur karo ndodomi suwale bojone sing bolong.

"Mak'e..."

Ndemin 1 moro-moro mlebu kamar karo ditekuk raine.

"Lapo?" saure Narti.

Ora nyauri mak'e, arek cilik iku langsung munggah nang kasur karo ngrangkul mak'e.

"Wou, kecubles dom mbuh koen ngko. Mak'e sik dondom iki lho."

"Aku sayang mak'e," omonge lirih nang kupinge mak'e.

Ndelok anake tingkahe aneh Narti bingung ning meneng ae.

"Bobok kono, kui adike wes bobok."

Ndemin 1 manut. Disanding adike sing wis angkler lek turu. Glibak-glibuk arek cilik iku ora iso turu ning meneng ae. Matane nyawangi mak'e sing sik umek dondom.

Paijo teka omah langsung mlebu kamar. Mulih kerjo karo mari ngrungokno curhatane Pak'e Tomin garai raine wong lanang iku ketok kucel. Ndemin 1 sing ndelok bapake langsung tangi. Arek cilik iku ngrangkul mak'e saka mburi. Tangane gemeteran. Lambene membik-membik kate nangis. Ndelok anake aneh, Narti selot bingung.

"Lah arek iki lho, lapo koen iku?" takone Narti.

"Lapo? Kate nyuwun jajan ta?" takone Paijo.

Ditakoni mak karo bapake, arek cilik iku ora kuat ngempet maneh akhire nangis. Narti karo Paijo sing ndelok Ndemin 1 dadi bingung. Ditakoni ora gelem nyauri mung nangis ae. Dicandak bapake ora gelem. Mbarang Narti sing gendong arek cilik iku gelem masio sik nangis. Ora suwi arek cilik iku ngomong.

"Pak'e gak oleh ngajar mak'e. Masio tukang necu, tukang ngomel, mak'e gak nakal. Aku yo gak nakal. Pak'e gak oleh nakal karo mak hu...hu...hu..."

Narti sing ora ngerti maksude anake meneng bingung. Paijo sing ngerti langsung mesem. Anake iku mesti mari krungu kedadean nang omahe Tomin.

"Gak no. Pak'e gak nakal, pak'e lho ngganteng," omonge Paijo karo mesem trus ngambung gundule Ndemin 1.

***