Gombal Amoh, Gak Nggombal Yo Mesti Amoh

[caption id="attachment_119042" align="alignnone" width="500" caption="Gambar disilih ko kene --> edwien.wordpress.com"][/caption]

Sing jenenge gendakan, bebojoan mesti gak adoh-adoh soko acara gombal menggombal. Mulai soko gombal alus, wedhus gombal, gombal jepit sampek gombal amoh, lah. Sing jelas lek jare Cak Paimo, "Gak gombal yo mesti amohe." Delok ae lanangan sing gak iso nggombal, lak amoh raine polahe sering dikabruk wedokane. Nang ngisor iki cerito-cerito gombal sing mungkin biasa mbok rungokno soko bojomu utowo malah biasa mbok kekno nang gendakanmu.

BOBOK

Paimo, joko mateng kebablasen alias setengah bosok lagi dolen nang omahe pacare, Sutini, rondo sing kaet ditinggal mati bojone pitung sasi kepungkur. Paimo sing janji kate teko jam songo isuk telat telung jam polahe keturon. Sutini sing wes siap kaet mau asline rodo mangkel tapi dudu Paimo lek gak pinter ngrayu wedokan.

Paimo  : Dek, kon kok ketok ayu yo awan iki. Meh pangling aku mau lek koen gak mesem.

Sutini   : Alah, kumat gombale *epok-epok mrengut*

Paimo  : Sumpah, gak mbujuki aku dek. Gak salah ancen pilihanku.

Sutini   : *Abang ireng raine, isin*

Paimo  : *Moro-moro angop*

Sutini   : Ealah, wes bosen ta kok angop ae. Semunu thok ternyata sampeyan nang aku, Mas *gelo, mrengut maneh*

Paimo  : Gak lah, mosok iso aku bosen nyawang awakmu.

Sutini   : Lha kok angop lho, ngantuk?

Paimo  : Mbuh yo dek, lek ndelok awakmu kok aku langsung ngantuk, pingin bobok. Rasane kudu ngletakno ae.

Sutini   : Asyu, ayo lek ngunu!

red       : #eaaaaa!

KENANG-KENANGAN

Ndemin karo pacare Nonik wes bola-bali putus. Yo koyok lagune bebebe sing putus nyambung, nyambung putus maneh, mari putus yo disambung iko. Masalahe mesti sepele, mulai soko guyonan, klambi sing gak tepak sampek acara gombal-gombalan ae iso dadi perkoro sing garai putus. Koyok bengi iki, Ndemin sing wes mbelani ngebut polahe gak pingin telat teko nang omahe Nonik sik ae kenek semprot. Goro-gorone Ndemin lali gak katokan.

Nonik              : Wes mbuh, kesel aku ngandani koen iku, Yang. Sakjane utekmu iku mikir opo, mosok kate kencan ae lali gak katokan?

Ndemin           : Sumpah, aku lali, Beib. Perasaan mau yo wes tak gawe tapi kok tibake ora. Pantes kok isis nang dalan mau.

Nonik              : Yok opo gak isis, wong mung boxeran ngunu ae. Trus ngene ki yok opo? Sakjane koen iku sayang aku gak sih? Kesel aku ben dino ngomeli koen.

Ndemin           : Yo gak usah ngomel lek ngunu. Aku yo jelase sayang, mosok sik ditakokno ngunu iku?

Nonik              : Sayang kok koyok ngunu! Wes ah, bosen aku ngene ae. Awake dewe putus ae!

Ndemin           : Alah, diluk-diluk kok mesti ngejak putus.

Nonik              : Bahno! Iki sing terakhir, ojok ngejak balen maneh, bosen!

Ndemin           : Sik ta, Beib, sabar.

Nonik              : Males! Iku, kaos sing lekku ngewei wingi, anggep ae kenang-kenangan sing trakhir. Simpenen.

Ndemin           : Emoh. Lek ngunu tak balekno ae.

Nonik              : Ojok! Barang sing wes dikekno iku yo gak oleh dibalekno!

Ndemin           : Atiku wes tak kekno koen, lek ngunu yo ojo dibalekno.

Nonik              : *Krungu omongane Ndemin sing kiwir-kiwir langsung meleleh atine* Ow, co cuit *mesam-mesem karo njejeki Ndemin*

Ndemin           : Hehehe. Gak sido putus yo?

Nonik              : Hooh, gak sido.

Red     : #eaaa, maneh.

PODO AE

Cak Paiman, sopir angkot sing kadang nyambi nyopet lek lagi sepi penumpang lagi galau. Wes telung dino de'e gak narik angkot mergo penumpange sepi, gak nutut nggo tuku bensin. Kate nyopet yo lagi akeh operasi. Malah trakhir wingi pas kate nyopet emak-emak nang pasar meh ae de'e ketemon. Yok opo gak ketemon wong dompete sing kate dicopet iku nang njero kutang. Untung de'e iso mlayu banter, lek gak wes entek diajar wong sak pasar.

Paiman            : *Lungguh nang amben karo rokokan*

Parti                 : Enake rek, yahmene klepas-klepus, koyok juragan ae.

Paiman            : Opo sih, Dek?

Parti                 : Gak popo, iku lho tonggo sebelah. Yahmene nyangkruk, kok ketok enak temen uripe. Gak mikir beras, gak mikir gulo, opo maneh mikir anake sing durung mbayar sekolah.

Paiman             : Gak usah nyindir. Aku ki ketoke meneng tapi asline ngene ki mikir, Dek.

Parti                 : Loh, sopo sing nyindir? Aku ngerti kok lek sampeyan lagi mikir, ancen urip iku lak kudu dipikir. Mikir terus, mbuh kapan nglakonine.

Paiman            : *Mangkel karo sindirane bojone akhire ngadek, ngaleh* Omah kok howone panas, opo onok setane yo?

Parti                 : Setan ndas ireng, sing senengane kopi karo rokok *gak gelem kalah*

Males ndelok raine bojone sing sepet, mecucu ae, Paiman pindah nggon. Moro nang Watik, gendakane. Lumayan pikire, ndelok sing luweh bening cek atine gak tambah ruwet.

Watik              : Wes suwe, Mas?

Paiman          : Gak kok, sepuluh menitan. Kate nang ndi, Yang, kok ayumen?

Watik              : Gak nang ndi-ndi. Ngenteni sampeyan *lungguh sandinge Paiman karo mesam-mesem*

Paiman           : Pijeti, Yang, kesel kabeh iki awakku.

Watik              : *Mijeti pundake Paiman* Yang, koen sayang aku kan?

Paiman           : Yo jelas, mosok sik gak percoyo ae.

Watik              : Ehmmm...wingi Narti ditukokno kalung karo bojone, uapik, pating cemlorot.

Paiman           : Mosok? Larang pasti?

Watik              : Gak kok, mung telung juta jare. Aku tukokno, Yang.

Paiman          : Yo suk, ojok saiki. Durung duwe duit.

Watik              : *Mandek lek mijeti* Ben dino mung janjeni thok, males!

Paiman           : Lah, ancen durung onok duite. Sik ta, diterusno lek mijeti.

Watik              : Males! Kon mijeti bojomu kono! Gak usah rene lek mung ngumbar janji. Ngene-ngene aku yo sik payu, sik akeh sing gelem!

Paiman            : Lah, kok malah ngejak gelut?

Watik              : Lek kere ae mlayu rene, lek lagi duwe duit kelon ae karo bojone. Gak usah dibaleni, cukup semene ae!

Paiman           : Alah-alah, Gusti, bojo karo gendakan kok gak onok bedane, podo ae. Kulo tak kendat ae.

LIRIKAN MAUT

Wawan karo Eni sik kaet ae jadian, durung oleh seminggu tapi kelakuane gak kalah karo manten anyar. Nang ndi-ndi arek loro iku koyok bayi kembar siam, nempel ae. Budal sekolah, istirahat, muleh sekolah bareng terus, gandengan koyok truk.Untung ae gak sak kelas, lek gak mbuh yok opo dadine. Awan iki, muleh sekolah, arek loro iku janjiane kate mlaku bareng. Nang mall, cek gaul. Kaet mau bengi arek loro iku wes nyiapno klambi ganti cek muleh sekolah iso langsung bablas.

Wawan            : Beib, kon sadar ga, ben mlaku karo awakmu wong-wong iku mesti nyawangi?

Eni                   : Mosok? Gak tau merhatekno aku, beib.

Wawan            : Serius. Deloken ae, ngko lek kene lewat wong-wong lak langsung noleh kabeh.

Eni                   : Ah, mosok sih? Opo'o yo, beib?

Wawan            : Mesti mergo matamu...

Eni                   : Kok ngomonge kasar, beib. Gak oleh ngunu iku, gak apik *mrengut*

Wawan            : Eh, sori, guduk misuh iki. Maksudku matamu iku lho. Lah yok opo mbasakno? Opo maneh lek lagi nglirik...jan...

Eni                   : Ah, koen iso ae, beib. Perasaan biasa ae mataku *langsung abang ireng raine*

Wawan            : Sumpah, temenan iki. Lirikanmu iku jan maut, kalah maling-maling jemuran. Makane wong-wong podo ndeloki, wedi lek thok malingi paling hehehe

Eni                   : Maksude opo? *menteleng*

Wawan            : Maksude wedi lek atine thok colong *nyekel tangane Eni*

Eni                   : *Mrengut tapi dalam hati seneng*

[caption id="attachment_119049" align="aligncenter" width="720" caption="gombal karo amoh ancen tak terpisahkan"]

1310528769858818393

[/caption]

***