Teks Pidato Bahasa Jawa "Atur Panampi Pasrah Temanten"

Assalamu'alaikum warahmatullahi wabarakatuh ..

Panjenenganipun engkang kinabekten, para pinisepuh, saha para sesepuh ingkang tansah anggung mestuti dhumateng pepoyaning kautaman.

Engkang dhahat kinurmatan, panjengenanipun para alim, para ulama, para kyai, lan para ustadz engkang tansah kaantu-antu berkah pendonga miwah pitutur luhuripun.

Para pangreh pangemban pangembating praja minangka pangayomaning para kawula dasih engkang satuhu pantes sinudarsono.

Sumawana sanggyaning para rawuh, para pilenggah, kakung miwah putri, saha para sanak kadang wredha mudha, ingkang tansah winantu ing suka rahayu. Langkung-langkung panjenenganipun Bapa ..... (sebut nama juru bicara dari keluarga besan) ingkang minangka dhuta saraya pasrah temanten putri dalah para kadang pengombyong temanten saking .... (sebut nama daerah asal temanten) ingkang pantes sinuba sagunging pakurmatan.

Langkung rumiyin kula ngonjukaken raos syukur wonten ngarsa dalem Allah SWT, kerana sih welas miwah barakahipun engkang sampun kaparingaken dhumateng panjenengan sedaya lan kula, sahingga wonten menika wedal pinaringan kawilujengan tuwin karaharjan mboten manggih alangan setunggal menapa. 

Pramila saking meniko kula ikraraken kanthi maos kalimah tahmid "alhamdulillahi rabbil 'alamin ".

Shalawat lan salam mugi tansah lumintu lumintir dhumateng titah linangkung ingkang dados pepanutaning umat sejagad nun inggih Nabi agung Muhammad SAW engkang kula panjenengan antu-antu syafa'atipun wonten yaumil qiyamah.

Kula aminangkani Bapa/Ibu....(sebut nama tuan rumah) keparenga  tumanggap atur menggah atur pasrah panjenenganipun Bapa/Ibu ....(sebut nama besan) engkang sampun kepareng hamasrahaken putra temanten putri.

Engkang sepisan atas nami Bapa/Ibu....(sebut nama tuan rumah) sakaluwarga, kula ngaturaken sugeng rawuh lan agunging panuwun ing sarawuh penjenengan sarombongan, para pengombyong temanten putri saking tlatah .... (sebut nama daerah asal). Mugi-mugi rawuh panjenengan meniko dadosa lantaranipun tambahing pasedherekan antawisipun warga ....(sebut nama daerah asal temanten)  ngriki kaliyan warga ....(sebut nama daerah asal besan).

Kaping kalihipun menggah salam taklimipun Bapa/Ibu....(sebut nama besan) kula tampi lan sak kosok-wangsulipun salam taklim saking Bapa/Ibu .... (sebut nama tuan rumah) katur dhumateng Bapa/Ibu ....(sebut nama besan) dalah gotrah kulawarga. Kula ikraraken kanthi atur "'Alaika wa'alaikumsalam warahmatullahi wabarakatuh".