Ambil Pelajaran dari Lady Gaga

Brayski, Sobi and sista. Apa kabar elo semua ?

Long time no see dimari, maklumin gue lagi nguli.

Capek gue ngebaca tentang Lady Gaga. Semprul satu bikin kantor gue jadi kaga' kondusip, kalo kate Bang Hansip. Ada yang demen en ude pasti langsung mencak mencak kalo disinggung pekara ntu harim satu. Yang kaga' demen? Buanyak juga ternyata. Ada yang kaga demen, tapi juga kaga' ngelarang. Teserah elu  aja kalo kata mereka, gimana baeknya.

Gue bisa ngerti kenapa ada yang ngelarang en ada yang ngedukung. Manusia pan kaga ada yang sama, Cuy, pegimana mau akur?

Tapi ada sesuatu yang kaga ssue' ama jalan pikiran gue. Kata mereka yang menolak, orang Indonesia itu muna'. Tiap ari nonton bokep tapi Lady Gaga dilarang larang. Kebebasan ekspresi kaga' boleh dilarang ame siapapun.

Kate siapa. bray ? Noh, kata orang yang pinter pinter kata die.

Gue cuma senyum ame kudu ngejelasin lagi, Brayski, sobi en sista...

Bisa dibilang gue salah satu golongan yang munafik kalo ngikut kategori diatas. Orang gue muslim, tapi masih doyan ngebir. Yang laen laen sih udah gue tinggalin, tapi bukan berarti gue udah jadi orang bener lho ya. Kelakuan gue kebelakang emang ancur seancurnya dah. Tapi bukan berarti gue ga' percaya Tuhan.

Gue yakin, bahwa gue akan bayar apa yang udah gue perbuat. Kecuali kata Guru gue dulu kalo' gue udah tobat nasuha, alias tobat nyang bener bener tobat.  Walafu ya, Wak. Ane uda tobat nyang laennya, tapi ngebir masih susa nolak sekarang.

Berarti gue masih munafik kan? Kadang kadang masih donlot bokep juga, wakakaka. Berarti gue muna' dong? Iye, itu bener. Dan mudah mudahan nanti gue dikasih kesempatan buat bener kedepannya. Aamiin Ya Robbal Alamin.

Tapi ada satu pelajaran yang gue bisa ambil dari Guru gue. Dan karena gue pendosa, ya pasti kata kata ini gue inget bener bener, brayski,sobi en sista.

Dosa segede gunung aja kalo kita tobat bener bener bakalan diampuni oleh Allah.  Tapi jangan elu sekali sekali menyekutukan Allah. Apa contohnye? Paling gampang deh , elu pecaya ame ramalan. Udah paling minim tuh. Udahannye elu kerjaannya ke dukun. Tambah sa'ik elu dosanye. Yang paling berat, ya elu jadi sekutunya setan. Naudzubillahminzalik, amit amit dah.

Kalo elo emang ngerasa punya iman, walaupun elu juga ngerasa diri elo masih belon komplit ngejalaninnya, berarti elo masih bisa diperbaiki ato bisa tau tau baek sendiri.

Elu pemabok, penjudi, ngewakap ,kumpul kebo en yang laen sebage'nya jangan dijadiin dalih diri elo sendiri untuk jadi bilang iya ame mau ngikutin setan. Kegoda, iye, Ngikutin ntar dulu !

Nah setan aja udah jelas dijabarin dia sumpe sumpe bakalan ngegodain kite kerjaannya. Nyari temen ntar di neraka. Kok malah jadi 'cool' buat muja si kampret satu itu? Ada yang bilang, jadi bangsat jangan tanggung. Ya kaga' berarti juga elo kudu ngikutin nyembah setan kan?

Brayski, sobi en sista. Gue juga kaga' setuju ame FPI. Kerjaannye marah marah mulu. Gimana orang mo' ngedengerin en ngikut die? Dikit dikit dimarain. Tapi bukan gara gara die nolak Lady Gaga, gue musti  iya iya aja kaya kebo bloon ikut ngedukung si kampret. Ntar dulu. Gue kudu punya sikap disitu.

Dan harepan gue sih elo brayski, sobi en sista ada sikap jugak.

Sekali lagi, jangan karena kite kegoda die, trus itu jadi jaminan kite bakalan ngikut die jugak !