Aku Sarungan, Kowe Dasteran

Urip bebrayan iku temen-temen perlu persiapan sing mapan. Ora mung cukup sangu rasa tresno lan angen-angen. Ananging kudu sinau ilmu lan linambaran tirakat kang murwat.

Umume, bocah enom sing wis duwe gegayuhan nikah, mbayangake senenge urip omah-omah. Kamongko sing dibayangake iku mung senenge pengantin pas lagi ono ing wayah bulan madu. Mas Dawn Lipthrott ngarani iku 'romantic love', kang pancen kabeh kroso sarwo endah.

Sarampunge wayah 'romantic love', jarene mas Dawn Lipthrott, urip bebrayan bakal ngliwati 'dissapointment' utowo sinebut ugo 'distress'. Lha ing bagian iki, urip bebojoan wiwit kroso panas. 

Sing lanang mulai kuciwo marang bojone. Semono ugo sing wadon mulai sering nangis amargo loro ati. Pas wanci 'dissapointment' iki, suasanane ora nentremake ati. Kadang, poro mudho sing arep nindakake polo kromo ora mbayangake kondisi koyo ngene. Sing dipikir mung seneng-senenge wae.

Kowe Dasteran, Aku Sarungan

Bocah enom sing wis duwe krenteg mbangun bebrayan, duweni gambaran urip bebojoan iku sok ming sederhana. Mbayangake uripe bapak lan ibune, sarto tonggo teparone. Opo sing ditonton samben dino, iku sing dadi tulodho.

Mbak Farida Hidayati lan konco-konco seko Fakultas Psikologi Universitas Diponegoro nate gawe penelitian ing taun 2011. Jarene, akeh-akehe wong lanang yen wis duwe anak, anggone nggulowentah putro koyo dene deweke jaman semono digulowentah dening wong tuwane. Dadi yo mik niru carane wong tuwo jaman semono. Ora sinau dewe.

Semono ugo ing sajroning urip bebrayan. Umume wong urip bebojoan neng ndeso iku, yen pas eneng ngomah sing lanang sarungan lan moco koran. Sing wadon dasteran lan blonjo neng warung tonggo.

Iku digambarake neng lagu Jowo sing nate viral tekan Korea, judule Mendung Tanpo Udan. Lagu iki dikondangake nganggo versi dangdut koplo dening Ndarboy Genk lan Deni Caknan. Lirike diripto dening Kukuh Prasetya Kudamai. Mesti panjenengan wis podho apal kabeh sing bagian hits iki:

...

Awake dewe tau duwe bayangan

Besuk yen wis wayah omah-omah

Aku moco koran sarungan

Kowe belonjo dasteran 

...

Gambaran koyo mengkono iku kondisi eyang buyut nganti tekan romo ibune jaman semono. Sebab ing jaman saiki, suasanane wis bedo. Kiro-kiro yen dadi lagu, unine malih "Aku main hape sarungan, kowe belonjo online dasteran".  

Tak pikir-pikir, opo yo isih ono wong wadon jaman saiki gelem dikon belonjo neng pasar kampung, karo dasteran. Tekan omah umbah-umbah karo isah-isah. Yen esuk ngarit neng sawah. Wis ngono isih dikon mlumah... Wah wah...

Lha sing lanang sarungan trus leyeh-leyeh moco koran. Neng ngomah nyetheti manuk perkutut sing lagi manggung, karo nyruput teh nasgitel. Mulyo koyo bendoro Londo.

Mestine digawe sing luwih ngrumati sih katresnan. Kudune urip bebrayan iku, "aku sarungan kowe dasteran, ngresiki omah bebarengan. Aku umbah-umbah, kowe isah-isah. Aku nggaru lan ngluku neng sawah, kowe masak neng pawon lemah. Aku leren neng sawah, kowe teko nggowo jatah mangan awan sing wis rampung mbok masak neng ngomah".

Tak kiro priyayi putri jaman saiki pancen wis ora sanggup nek dikon rekoso dewe. Dikiro sing lanang ora gelem nyambut gawe. Isane mung prentah wae, karo leyeh-leyeh neng amben. Malah njaluk dipijeti.

Mulane njaluk pisah. Saiki milih dalan panguripan dewe-dewe.

...

Nanging saiki wis dadi kenangan

Aku karo kowe wis pisahan

Aku kiri kowe kanan

Wis bedo dalan

....

Wacan 

Dawn Lipthrott, Are You Going Through a Stage? It's Normal, www.relationshipjourney.com

Dawn Lipthrott, Stages of Marriage, What You Don't Know Can Hurt You, www.relationshipjourney.com

Farida Hidayati dkk, Peran Ayah dalam Pengasuhan Anak, Jurnal Psikologi Universitas Diponegoro Vol 9 No 1 tahun 2011.

Ilustrasi : https://twitter.com/arsenallatif