Jarwo Bodhong

"Jarwo Bodhong"

Dening: Meilani Alvindha Putri

       Sawijining dina ana kucing blesteran Jawa Inggris jenenge Jarwo. Jarwo nduweni wulu sing mulus, kinclong lan resik, wernane coklat mbulak karo putih sitik. Ing wayah wengi Jarwo mlaku-mlaku ning pawon omahe majikane. Pas Jarwo mlaku mrono dheweke weruh ana anak thekek lagi nggondol iwak goreng sing gedene ora umum. Iwak goreng kuwi mau nggone majikane Jarwo sing diseleh ning nduwur meja nanging lali ora ditutup maneh, makane iso digondol karo anak thekek mau.

       Si Jarwo dadi kepengin ngrasakne iwak goreng sing digondol karo anak thekek mau, amargo dheweke gung nate dipakani iwak goreng dening majikane. Terus Jarwo golek cara supaya iso ngroyok iwak goreng kuwi mau. Kanthi modal nekat lan kapinteran sing  marai Jarwo wani ngroyok iwak goreng saka anak thekek mau, lan kaprigelan olah kata kang mendhemi sing gawe anak thekek keweden.

       Jarwo rumangsa iso ngroyok iwak goreng saka anak thekek, sing miturut pengamatane isih lugu lan kurang pengalaman. Bedo karo Jarwo sing nduweni akal sak gudang ana wae rencanane, iso diarani licik nanging cerdas.  Jarwo marani anak thekek, dheweke arep nglakokne rencana ke siji.

"Hai Thekek, awakmu iku kok kethok pengkuh, rosa banget ngono tho, lan kulitmu kandel apik mulus ora tipis kaya kulit cecak. Apa tho rahasiane?

       Thekek atine bungah banget dialembana dening Jarwo kang elok rupane lan rosa awake. Nanging thekek meneng wae amarga sakumpama dheweke mangsuli pitakone Jarwo mau, iwak goreng sing digondol bakal ceblok ning ngisor lan dijupuk dening Jarwo. Jarwo ora kurang akal, banjur dheweke nglakokne rencana ke loro. Jarwo akhire takon maneh.

"Hai Thekek, kowe iso ngajari aku mlaku ning tembok. Kok ya pinter tenan kowe ki iso mlaku ning tembok, sing ngajari awakmu sapa tho?

       Thekek tetep meneng wae ora gelem mangsuli pitakon sing diwenehi dening Jarwo mau. Sakjane dheweke pingin njawab menawa iso mlaku ning tembok kuwi ora ana sing ngajari. Dheweke kuwi pinter banget awit cilik wis iso mlaku ning tembok, dadi isa mlaku dhewe rasah diajari sapa-sapa amarga wis gawan awit lair mbiyen. Jarwo ora pantang mundur, dheweke nyoba nglakokne rencana ke telu

"Hai Thekek, opo seng mbok gawa kuwi kok ketoke enak tenan tur gede banget, atake panganan beracun kui ngko"

Blas Thekek ora nggubris pitakone Jarwo, dheweke tetep mlaku karo gawa iwak goreng ning cangkeme.

"Yuh Thekek ki pye tho kok angel eram diblethuki" Batin Jarwo

Jarwo wis gumreget amarga awit mau dheweke wis nyoba ngapusi Thekek nanging durung ana hasile. Akhire Jarwo nglakokne rencana terakhir.

"Hai Thekek, swaramu kuwi tak akoni pancen merdu tenan gak ngapusi aku, saben wayah wengi awakmu mesti ngetokne swara sing apik tenan. Mbok kowe nyanyi sak lagu wae kanggo awakku, gek ndang cepet ayo gage, aku wis gak sabar ngrungokne swaramu lo Thekek"

       Anak Thekek ora iso ngempet maneh, dheweke mumbul amarga dialembana dening Jarwo. Banjur kuwi anak Thekek langsung mbukak cangkeme arep nyanyikne lagu kanggo Jarwo. Mesti wae iwak goreng mau ceblok ning ngisor. Untunge ning kono ana Mboke Thekek sing langsung nampani iwak goreng sing ceblok mau, banjur ngekekne iwak gorenge ning anake maneh.

"Heh kucing mbulak, jenengmu sapa?" Pitakone Mboke Thekek

"Jenengku Jarwo nyapo bu?" Wangsulane Jarwo

"Woalah Jarwo bodhong kowe ki, pancen kelakuanmu elek tenan le"

       Sakwise kuwi ngajak anake lunga saka kono ngadohi Jarwo kang rupane mranani kuwi. Mboke Thekek ngarani Jarwo bodhong amarga kelakuane Jarwo sing elek lan seneng ngapusi wong liya. Mboke Thekek rumangsa dheweke kurang anggone ngajari anake supaya ora gampang diapusi nalika dialembana dening sosok kang pasuryane mranani ati, tuladhane kaya Jarwo bodhong kuwi mau sing ngalembana anak Thekek, tapi untunge ana Mboke Thekek sing iso nylametne anake.