"Et dah! Nyang bener, bang?! Jadi bu Mega, Pak Habibie, Gus Dur, nggak ada nyang ikut upacara?! Wah, kelewatan!"
"Eh Goblog luh!" Kong Haji ngeplak jidat Bang Acim. "Gus Dur mah udah meninggal. Insya Allah die lagi nungguin pintu sorga di alamnye! Ngaco aje lu kalo ngomong!"
"Duh, ma'ap, kong. Tapi nyang laen, nyang masih idup, kagak ikut, kong? Dimane nasionalismenye?!" Bang Acim marah beneran.
"Biarin aje. Lagian kan, alesannye jelas. Mereka kagak ngikut di istana lantaran upacara di tempatnye kendiri. buat gue mah, kagak pape! Daripade elu, orang-orang upacara eh malah ngiler di pos ronda!" Kong Haji mengerdilkan sentimen bang Acim.
"Tau luh! Mending lu cuci muka sono. Jangan cuci tangan doangan lu bisanye! Orang lu kagak ngikut upacara, marah-marah sama yang laen." Bang Namun menunjuk arah Mushola.
"Et dah. gue mulu nyang disalahin!" Bang Acim ngedumel.
"Lha emang elu nyang salah. Mau bekelit pegimane juga susah. Kalo emang ngaku salah, ya terima aje nasehat orang. jangan malah ngerasa bener juga luh. Kayak Malaysia aje luh!" Bang Namun mengingatkan.
"Et dah, dari tadi omonganlu mancing-mancing orang aje! Tadi lu ngomongin mantan presiden, sekarang Malaysia! Udah, mending lu buka kios pangkas rambutlo sono! Bikin pikiran orang ruwet aje, luh!" Giliran bang Namun yang dibentak oleh Kong Haji Rohimin.
"Iye bang. Katenye Malaysia bikin kaco lagi. Wah, kalo gue jadi presiden, gue bacok tuh! Kelakuannye pade ngehe!" Bang Acim terlanjut terpancing.
"Et dah. Ude deh lu pade mencar! Lu buka warung sono, Mun! Elu, Cim, mendingan lu mandi deh di Mushola!" Kong Haji Rohimin mengangkat tongkatnya. Bang Namun langsung ngacir sambil menahan cekikikan. Bang Acim mengangkat lengannya, takut dipukul pake tongkat Kong Haji yang konon pernah bikin kaki maling lumpuh.
