Nyalawadi Kereme Kapal The Lady Lovibond

Ature: Kresno Aji

Kaya dene dongengane "Flying The Duchthman" saka negara Landa, ing Inggris dhewe ana dedongengan sing ora kalah medeni, yakuwi ngenani kereme kapal The Lady Lovibond.

Nalika kuwi, Simon Reed (ana sing ngandhakake Simon Peel) kang minangka kapten kapal The Lady Lovibond nembe bae palakrama karo sisihan pepujan atine. Kanggo nyenengake Annette, ya sisihane kasebut, dheweke banjur nganakake ijab kabul lan pista temantenan ing sajrone kapal pesiar kang kanggonan tiyang layar telung iji iku. Nanging nalika kuwi pas tanggal 13 Februari 1748, tanggal kang kala semana dipercaya bakal nggawa sial menawa nganti nggawa wong wadon ana pelayaran ing wayah kasebut.

Kapten Simon Reed gawe rancangan bakal tumuju menyang Oporto - Portugal, bebarengan klawan sisihan lan uga para tamu undhangan. Dumadine acara temantenan lan pista andrawina kang dianakake ing kapal kasebut dumadi kanthi rancag, ning ana sawijining bab kang ora dimangerteni dening Kapten Simon Reed. Kanca rakete lan uga pembantu utamane kang aran John Rivers jebul uga duwe rasa tresna marang Annette sisihane kuwi. Nalika kuwi, John Rivers uga didhapuk minangka seksi palakramane Kapten Simon Reed klawan Annette.

Nalika dumadine pista bujana andrawina iku, Kapten Simon Reed dhewe kang nyekel kemudhi kapal, ning sabanjure diwenehake marang juru mudhine. Kapten Simon Reed dhewe mudhun menyang ruang ngisor kapal saperlu nemoni para tamu undhangane.

Nalika Kapten Simon Reed nembe seneng-senenge nemoni para tamu-tamune ing ngisor kasebut. Tanpa dinuga, panengene kang uga kanca rakete John Rivers kedadak ngrebut kemudhi kapal saka juru mudhine. Pancen John Rivers dhewe wis kadhung tresna marang sisihane Kapten Simon Reed. Nalika dumadine temantenan kasebut dadi kebakar rasa cemburune namati kenya geganthilan atine ngayahi palakrama klawan kancane kang uga atasane dhewe.

John banjur ganti tujuwan lan ngarahake kapal tumuju menyang Goodwin Sands, sawijine tlatah kang mbebayani, sacedhake wewengkon town of Deal.

Tlatah kasebut kondhang minangka kuburan kapal, amarga saking akehe kapal kang kerem ing tlatah kasebut. Senajan ta ora ana alesan mahanani sabab-musababe nganti kapal-kapal kasebut kok bisa kerem nang tlatah kuwi. Ning akeh sing percaya, menawa ing tlatah kuwi akeh watu karang kang mbebayani tumrape kapal kang wani liwat ing kono.

Para tamu-tamu undhangan dalah Kapten Simon Reed dhewe ora ngira menawa kapale bakal kerem. Lan ora watara suwe, kapal The Lady Lovibond nabrak karang lan banjur kerem ana kana, kanthi niwasake sakabehe penumpang lan awak kapale. Kedadeyan kasebut dumadi ana ing tanggal 13 Februari 1748.

Muncule Kapal Memedi

Pranyata, dedongengan mahanani kapal iki ora mung mandheg tekan kene. Seket taun candhake, nalika tanggal 13 Februari 1798, sawijining kapten kapal Edenbridge nglaporake menawa kapale meh bae tabrakan klawan sawijine kapal layar kanthi tiang telu.

Nalika kapal nyalawadi kasebut liwat, dheweke krungu swarane musik kang biyasane diunekake wayah dina temantenan. Ora mung kapten Edenbridge kang weruh, nanging sawijine misaya mina ing kana uga ngakoni ndeleng kapal kasebut.

Sawijine dina ing tanggal 13 Februari 1848, sawetara pendhudhuk ing kana uga meruhi sawijinig kapal layar kang kanggonan tiang telu nembe nganakake pelayaran, mung anehe tumujune kok marang gisike segara. Nalikane para warga kasebut padha pating jlerit, ngira menawa kapal kasebut bakal nabrak kapal-kapal sing nembe labuh ana kana, dumadakan kapal kasebut banjur ilang ngono bae. Kaya ora ana kedadeyan apa-apa babar pisan. Kedadeyan kasebut uga dumadi ana ing taun 1849 kanthi tanggal sing padha.

Sabanjure ora ana kabar maneh kang ana sesambungane karo muncule kapal siluman The Lady Lovibond kasebut. Kaya-kaya wis ilang kasilep ing maruta. Kasapu dening ombake segara kang ajeg njujug ing pesisir.

Cuthel

Saka maneka sumber