Kangen Banget Nih Bang!

Dari mulai engkong ampe babe ame emak udeh diwarisin ke turunannye beragame Islam. Sedari bocah udeh mulae ditereakin buat blajar ngaji, lucunye kalo diinget - inget, mao ngaji aje dulu ampe diseret ame emak ke mushola. Tapi, tetep aje aye banyak terima kasih ame emak trus ame ustad, akhirnye aye bisa ngaji biar kagak khatam juge.

Sekitar taon 1980-an, kampung dimane tinggal juga beragam agame penghuninye. Tapi adem banget kesehariannye, soalnye semua pade ngejaga apa nyang dinamain pluralisme. Kagak perlu disuruh ato dikomandoin, saban Lebaran kedua, pasti ade acare Halal Bi Halal. Tumplek semua jadi satu, pade salam - salaman, kagak Islam, Kristen de el el,..duh syadu-nye. Begito juge kalo tiap tanggal 25 Desember, syadhu-nye kerasa lagi.

Pluralisme-nye juge ampe soal kematian warge muslim, semangat ngebantu ngebikin bendera kuning, nyiapin papan nisan de el el, trus malemnye ditambah Emak - emak nyang non Muslim ngebantu nyiapin kupi, kue bakal Yasinan, 3 harian, 7 harian de el el.

Biar suasane nyang kayak gitu masih ade sekarang tapi pasti agak suseh nyarinye. Fakte sekarang nyang ade lucu, semuanye diplintir banyak maonye. Syareat-lah, jumlah mayoritas-lah, ampe mao ibadah di rumah sendiri aje sambil bawa jamaah nyang laen, banyak nyang sewot bin ngotot ngelarang. Eh sodare, kerugiannye dimane ?

Ape bedanye kalo kite di lingkungan pas ngadain pengajian dengan hasil suare nyang nyaring misalnye pengajian kelahiran, tahlilan kematian, Shalawatan buat ngiringin nyang bakal naek haji, ape tetangge nyang non Muslim pade usil, ngedemo ? Lah kagak kan ?

Jangan pade jago retorike, pada jago koar - koar doang, masing - masing Kitab pasti kagak ade nyang ngajarin ato nyuruh nyundut perang sebab perkare sepele. Harge diri nyang mane bang ? Mengkol-nye Aqidah, balik lagi ke masing - masing orangnye, jangan gampang nyalahin orang laen.

Bener ape kate Kodim, "Damai Itu Indah".

Nyok, pade nyiptain me ngejage pluralisme bareng - bareng di lingkungan masing - masing. Kagak useh nyang muluk - muluk ato lepel atas, lingkungan di rt aje dulu.

Nambeh berite:

Kalo ade nyang ngajak sueping keluar kampung, jangan mao oe !... mendingan sueping di rumah sendiri. Inget bentar lagi musim ujan, noh comberan di-sueping biar bebas uget - uget, bak kamar mandi juge ye.