Jamita Partangiangan, Johannes 6:24-35

Turpuk             : Johannes 6:24-35

Topik               : Debata Mangalehon Sagusagu Hangoluan Tu BangsoNa

                             Allah Menurunkan Roti Kehidupan Bagi Umat-Nya

            Horas ma amang/inang, remaja/naposo, dan juga adik-adik sekolah minggu yang terkasih dalam Kristus Yesus. Hata ni Debata na gabe turpuk jamita di partangianganta, ima na tarsurat di Johannes 6:24-35.

            Amang/inang dongan sahaporseaon, halak Batak mandok, jorajora na male, idaida na butong. Ndang holan dipandohan ni halak Batak i, alai dohot do di parange. Ndang holan hata i, ai memang takkas do i masa. Molo male do hita misalna manopot bagas ni dongan, manang gabe mauas hita mulak sian i, olo do ra malas hita manopot bagas i muse. Alai molo butong, boa? Ba, na so boi do ganup ari laho martandang tu si kan? Ndang holan ala ni butong na manang sabas na, alai dohot do tabo ni lompanna. Isarana horong Ama, molo lao tu lapo, hape ndang tabo tuak ni parlapo i, ra olo do malas ateh angka Amang, jala dilului parlapoan na asing, naung tabo, naung ias.

            Jala, ndang otik halak, na boi marbada ala ni sipanganon. Alai pos do roha, ndang di sektor on i, di baribaan do i. Misalna, di jabu nami, olo do gaor siangkangan dohot siampudan ala manggulut bilalang ni jagal manuk, manang na manggulut tolor ni dekke, dohot lan na asing.

            Tabo ma tutu, molo nunga butong. Jala i do naginulut ni torop jolma hatiha i, di na laho mangihuthon Jesus. Dung dibege torop halak Jesus mangalehon mangan lobi sian 5.000 halak, songon jamita di ari Minggu, 28 Juli 2024 i, ro muse do torop nai jolma, ima sian Tiberias tarlumobi, laho mangida halongangan i, alai ndang na asa porsea nasida, asa butongan do. Siala ni i, di turpukta tikki on, dipaingot Jesus do, ibana do roti hangoluan i. Ibana do sagusagu hangoluan i. Ise nanung manjalo Jesus di bagasan ngoluna, ndang na male be i. Ibana do nang aek hangoluan, siala ni i, ndang na mauas be manang ise na olo manjalo Ibana.

            Jesus, sagusagu hangoluan, nang aek hangoluan. Ndang male jala ndang mauas manang ise na manjanghon ibana. Pertanyaan? Jadi ndang pola mangan indahan na las be hita Amang? Manang ndang pola minum aek sitiotio be hita Inang? Ba mangan ma dah, minum, asa sehat, panjang umur. Na nidokna ndang male jala mauas, lapatanna, ima ndang male jala mauas be di partondion. Molo botulbotul do hita porsea tu Debata, ndang adong be ganggu ni roha di hita, dang adong be biar, ndang adong be kekecewaan. Aha nama na mian di bagas rohata? Pangihirimon, holong, dohot las ni roha.

            Ala dang boi hape holan halongangan mambahen hita asa porsea. Ai di zaman saonari on pe ba godang do na boi mambahen hongangan, alai ndang halongangan na manontong. Isara ni pesulap. Boi do hasida patupahon halongangan, namambahen hita longang. Molo ro ma misalnya, si Uya Kuya tu Siantar on, manang si Dedy Corbuzer, manang Pak Tarno, bimsalabim jadi apa prok prok prok... dungi longang ma hita. Taihuthon ma i?

Manang molo adong datu, boi patupahon halongangan, porsea do hita disi? Gabe siihuton datu ma hita?

Manang di partangiangan ta on, porsea siala saugusagu na boi suda. Manang ala butong. Saonari taingot ma saotik tu pesta politik, presiden terpilih menjanjikan makan siang gratis, butong ma annong angka ianakhon secara khusus di parsikkolaan. Jai gabe sombaonta ma pemerintah i? Tentu tidak.

Debata do mangalehon sipanganon dohot siinumon, jala apa takkas ma i, Jesus i, gabe sipanganon dohot siinumon na so olo suda di hita. Molo marulaon na badia hita, takkas do didok amang/inang Pandita, "daginghu do on, mudarhu do on, na dipasahat tu hamatean humonghop hamu, bahen parnigotan di Ahu". Takkas do hape tapangan jala tainum Jesus i. Jala tapangan pe Jesus I, ndang na holan gabe butong hita, manang segar aroarota, alai aha? Dung tapangan Jesus i, jala tainum, hangoluan salelenglelengna do dapot hita.

Alai terkadang, olo do holan di ulaon na badia i pangantusion i. Dung sidung marulaon na badia, olo do dang diingot na baru manganhon daging dohot minum mudar ni Jesus.

Manang adong do, na gabe mabiar marulaon na badia. Olo ma didok, ari aha ma i, tong dope ra mangulahon dosa ahu. Manang, ari aha ma i, annong pintor mate iba. Amang/Inang, unang mabiar hita marulaon na badia, ai roti dohot aek hangoluan do na tapangan jala tainum disi. Molo tung pe mardosa hita, dung marulaon na badia, tarajumi ma, nga umbiar hita mangulahon dosa i, ndang neang be rohata disi. Manang molo nga matua hamu amang/inang, molo so dijalo hamu pe ulaon na badia i, ndang na gabe lam leleng hamu mate, alai takkas ma pangantusion nang haporseaonta, naung parjambar hita di hangoluan na saleleng ni lelengna. Pilippi 1:21 mandok "ai Kristus do hangouan di ahu, jala laba nang hamatean", sila ni i, dang pola mabiar hita mangolu manang mate. Jala molo tung adong na marsahit, dung i dipatupa huria marulaon na badia, ndang na pahatop ujung ni ngoluna i amang/inang, alai na paboahon do i, paingothon, naung mate Jesus, jala jambarta, ima hanguluan na saleleleng ni lelengna. Pardalanan ni ngolu on, sian Debata do, siala ni i, tapasahat ma muse tu Debata.

Taulahon ma lomo ni roha ni Debata, ai i do tandana naung porsea hita tu Ibana. Hibul, so ala sipanganon, so ala siinumon, so ala arta manang hahipason, so ala pinomar, alai ala haluaon, imana sagusagu hangoluan.

Amen.