Ditanda hamu do ahu? Molo so ditanda hamu ahu, nga sala be hamu disi. Ai nunga sude be mananda ahu, alai parhuta nami do na hu dok disi.
Ia goarhu ima Poltak Salelengna, nuaeng marsikkola di SMP 1 Muara. Molo damang parsinuan mardekke do ulaonna ganup ari on, alai huhut ma mangula rap dohot dainang pangitubu boru ni raja i.
Anggi ku si Tumpal kalas onom SD ma saonari, massai jugul do pangalahona, jala nunga sajabuon umboto i.
Disada tingki, lao ma damang nang dainang tu ulaon adat pamasumasuon boru ni huta nami on. Boru Regar imana, marhasohotan tu par Medan. Ulaon i topet ma dipatupa di ari Sabtu, alai borhat ma rombongan i di ari Jumat.
Andorang so borhat damang nang dainang, nunga dipasahat be tahe tu hami poda jala sipaingot na. Di ari marsogot, andorang so ginjang ari, inghon mamuro ma hami tu hauma, jala patuaton ma horbo tu inganan parmahanan. Molo nasomal, di bahal do horbo i dipanggagathon.
Dung jumpang manogot i, hudungoi ma si Tumpal. Dungo ma ibana, dung i dibasu bohi na, ai adong billok saotik di simalolongna.
Dung sidung i hudok ma tu si Tumpal asa laho mamuro, ala nantoari nunga mamuro ahu. Sipata olo do nian jotjot losot roha mamuro, ala inghon tu hauma jala maraek aek. Toe so binsar dope mataniari, ngali ma tahe.
Manombo ma jugul ni si Tumpal, dang olo imana mamuro. Dipangido imana ma asa imana manaruhon horbo tu bahal, alai dang olo ahu, ala nunga songoni somalna.
Marjogal ma si Tumpal, dang olo be imana mambege hataku ala dang di jabu damang nang dainang. Nunga pola hupagogo soaraku, alai gabe tu tataring do imana laho marsisulu.
"Botul do si jogal ulu ho, ai na boa do nuaeng partubum!" hu dok tu si Tumpal.
Sai sip do imana, dang manghuling holan asa ahu mamuro. Alai ahu pe dang olo, molo nga songoni somal na ba i ma niulahon. Laho ma ahu manaruhon horbo i, alai anggo si Tumpal dang ra morot.
Mulak ahu tu jabu nunga tiur be mataniari, hudapothon si Tumpal huhut ma hupanghulingi.
"Saut do mamuro ho?" hu dok tu si Tumpal.
"Daong" ninna si Tumpal.
"Ai na boa do pangalahom, so adong huida dianturehon ho manang aha, anggo mangan tambu on, ni suru dang olo." Husonggak ma muse imana.
Sai sip do si Tumpal on paula so adong na hurang. Dang huanturehon be imana. Nunga hutotophon be di rohangku asa tu damang nang dainang ma hupaboa hajugulon ni si Tumpal i ai mulak do annong bodari.
Sahat do damang nang dainang di buhabuha ijuk. Hubahen ma kopi na mohop asa las daging nang panghilalaan ni damang nang dainang. Laos mansai las do panghilalaan tingki i ala diboan damang nang dainang do bika ambon. Tung mansai holing do partingkian boi mangallang oleh-oleh na sian Medan on, ai dang piga hali lao ro sisolhot nang dongan sajabu lao tu Medan di bagasan sataon, boi muse dang lao dibagasan sataon.
Huhut manginum kopi nang mangallang kue na tabo on, manghatahatai ma hami. Husukkun ma boa pardalan ni ulaon i, denggan do manang na adong na hurang, mauliate ma di Tuhan, tupa do sude jala hipashipas.
"Dipatuat hamu do nantoari horbo kan?" disukkun damang tu ahu.
"Hupatuat do amang" hualusi ma damang.
"Molo tu hauma saut do hamu laho kan? Leleng do hamu na mamuro i?" diuduti damang sungkunsungkun na.
"Sungkun ma si Tumpal i amang, ai jambar ni imana do i." alus hu tu damang.
"Boa Tumpal? Godang do amporik di eme i?" ninna damang tu si Tumpal.
"Dang huboto amang, dang laho ahu mamuro." Alus ni si Tumpal.
"Ai boasa dang lao ho? Ai naung boha do panghilalaan mu? Na so mangan be hita taon na naeng ro?" mangudut sungkunsungkun ni damang huhut nangkok soarana saotik.
"Huelek do angkang amang, asa imana mamuro, ahu patuat horbo, alai dang olo imana." alus ni si Tumpal nenget.
"Olo kan nga ulaonmu i, ai somalna pe marsingkat soring do hita mangulahon ulaon na dua i." pintor hualusi.
"Ahh...., sega na i jo, nga boa ma nuaeng eme i ale, nga habis be diallang amporik i." marsak ma damang.
Pintor meret ma damang dibagasan arsak ni rohana. Laho ma damang tu hauma patanghashon boa hauma i nuaeng.
Sian nanghaning hohom do dainang paihutihut hami martonghar gelleng. Alai dung laho damang manghuling ma dainang.
"Aek godang aek laut, Dos ni roha sibahen na saut" didok dainang tu hami nadua.
Dipahohom satonghin, dung i diuduti ma mamodai hami.
"Poltak, huboto do nunga somal marsingkat soring diula hamu akka ulaon na ikkon siulaon muna siganup manogot. Alai molo apala marpangidoan anggi niba, nda pola aha hurang na nitalupan i? Dang apala gabe dang modom ho saborngin, manang gabe malemalean ho di hauma i. Si sitiruon do leanon tu anggi niba, dang pajogalon runghung asa tupa saluhut akka sangkap."
"Ia ho Tumpal, aha ma dalan na pola ingkon losot roham tu hauma dah? Ai nunga i hasomalan na taula. Ooo ala dang di jabu ahu dohot amangmu gabe saguru di ho ma ulaon di jabu on ido? Na so marsangap be di ida ho angkangmon? Dang olo be ho membege hatana? Boa ma eme ta i dah? Nga habis be diallang amporik i."
Di bagasan ias ni roha do mamodai inang na burju on, dang adong muruk namargara di rohana. Hohom ma ditangihon hami sude na dipasahat ni dainang i.
"Ingkon begeon do poda ni natuatua, ido hata ni patik palimahon i. Ingkon masihaholongan, sada roha, dang marsiadu patuduhon jogal, asa singkop sude aha na taula, sinur na pinahan." Ditorushon dainang mandok hata.
"Olo ma inang, manganghu sala ma ahu, ahu do na sala, dang si Tumpal" hudok mangalusi dainang.
"Daong inang, ahu do na sala, huboto do i jambar hu alai dang hu ula. Manganghu sala ma ahu inang, akkang." Di dok si Tumpal mangalusi.
"Toe ma, dang tingkina be manolsoli akka naung salpu. Muba ma, unang diulahi be mangula sisongoni."
"Olo inang." Rap mangalusi hami nadua.
"Toe ma, hobas ma, annong sotung adong na so marminggu tu Gareja. Toe, giragira." Di dok dainang huhut meret tu pudi laho mangalompa mi gomak hasoloman ni rohangku.
Jumat, 05 Maret 2021
Oleh: Markus Fernando Siahaan
