Cerita Betawi: Gas Mleduk

"Bang!" Mpok Minah bikin Bang Jali batal nyeruput kopinya sehabis sholat zuhur di masjid. "Lama-lama aye mingkinan empet tu ama kang ngamen yang ampir sunggal sari angal-ongol di rume kite."

Bang Jali kagak langsung ngasi komentar. Diseruputnya sisa-sisa kopi.

"Pegimana kagak empet, Bang. Na aye baru mao nyuci piring eh yang atu dateng. Pas aye baru mao rebah-rebahan, udah ada yang dateng lagi. Mending kalu nyanyinya enak di kuping. Nyang atu suaranya pales. Kagak nyambung gitar ama suare. Nyang atu suarenye kaya orang abis dimemediin, gerendengan kagak jelas nyanyi apa. Maen gitarnya juga asal gunjreng."

"Kalu elu empet, bilang aja mahap gitu. Laen kali," Bang Jali pora-pora bijaksini eh bijaksana.

"Mending amat, Bang. Udah dikata mahap tetep aje ngejedog. Kagak mau pegi. Kite jadi kayak orang punya utang."

"Jadi lu kasi juga."

"Ya iye, Bang. Dua rebu...dua rebu...dua orang udah empat rebu..."

"Ya udah. Kalu udah lu kasi kagak usah ngeresulah. Ntu namenya lu kagak iklas. Duit ilang, pahlanya juga lu kagak dapet."

Mpok Minah nyamperin lakinya yang lagi duduk di bale-bale di depan rumah. "Abang si enak kagak sering ngrasain. Aye ni yang di rumah sunggal sari kayak kucing dapur."

"Ya udah. Terus mao lu ape ni?"

Mpok Minah mandangin lakinya. Bang Jali pora-pora kagak ngeh.

"Kayaknya enaknya jalan masup ke rume kite dikasi pager aja, Bang. Gimana, Bang?"

Bang Jali kagak langsung ngejawab. Die pora-pora ngorek lobang kupingnya.

"Ape lu bilang tadi?"

"Abang si begitu. Kalo diajak ngomong suka kagak open. Pikiran abang kayaknya lagi di rumah janda muda ye, Bang," Mpok Minah cemberut.

"Mager pan pake duit, Minah. Kagak sedikit juga."

"Ye aye tau, Bang. Jual aja cincin aye atu Bang. Yang tiga gram. Cukup kan?"

Bang Jali sontak ketawa.

"Lo abang kok malahan ketawa?"

"Ya iyalah."

"Apanya nyang lucu, Bang?"

"Coba ni lu pikirin pake otak lu ye. Jangan pake dengkul."

"Mikir ya pake otak, Bang. Emang ada mikir pake dengkul? Gimane kalo pake paha aja, Bang?" Mpok Minah mulain sewot.

"Kalo pake paha mah kagak usah pake mikir."

"Ya udah. Soal paha mah gampang. Gimana soal solusi kang ngamen ntu, Bang? Abang setuju kagak?"

"Coba ni lu pikir ye. Mager jalanan itu berapa duit? Ngasi duit ke tukang ngamen berapa duit? Palingan sebulan kagak abis seratus rebu. Lagian kalu lu ngasi kang ngamen ntu pan ade pahlenye kalu kite iklas. Na kalu jalanan kite pager, terus kang ngamen kagak bisa masup, itu pan sama aja kite nutup peluang dapet pahle."

Baru rapi Bang Jali ngomong, sontak di depan rumah dateng dua pengamen. Yang atu bawa gitar, yang atu lagi bawa gendang. Lagu Iwan Fals 'Bento' pun berkumandang.

"Tu Bang. Ape aye bilang. Ni ari berarti udah tiga pengamen dateng. Sono abang urus."

Bang Jali keluar.

"Keren lagunya," sapa Bang Jali.

Si pengamen mesem-mesem sembari terus beberekan nyanyiin lagu Bento.

Kelar satu lagu, Bang Jali nanya, "Bisa lagu Benyamin kagak lu pada?"

"Lagu Benyamin banyak, Beh. Lagu yang mana ni?"

"Kompor Mleduk coba."

"Udah kagak jaman, Beh. Udah kagak ada yang make kompor. Semuanya udah pada pake gas."

"Ya udah, Gas Mleduk coba."

Kedua pengamen saling pandang.

Tanah Kusir, 230118

Kamus: Empet = sebal; Mingkinan = semakin; Kang = tukang; Sunggal sari = setiap hari; Angal-ongol = sebentar-sebentar muncul (nongol); Dimemediin = melihat hantu; Mahap = maaf; Ngejedog = diam saja; Ngeresulah = menyesali diri; Nyamperin = menghampiri; Ngeh = memperhatikan; Open = memperhatikan, menyiumak, terbuka; Mager = memberi pagar; Beberekan = bertariak-teriak;