MASA libur sekolah masa nyunatin. Itu juga yang dilakonin Mat Rais, anak Bang Jali. Alfin, anak Mat Rais, udah kelas lima SD. Kagak seperti orang-orang Sunda yang nyunatin anak selagi anak masih orok, di Betawi anak-anak biasanya sunat kalu udah bilang berani.
Cuman, seperti biasanya, Mat Rais kagak gablek duit bakal modal nyunatin anaknya. Ujung-ujungnya, Bang Jali sebagai engkong si Alfin, terpaksa modalin Mat Rais. Dan, Bang Jali, meskipun pake nyol-nyol segala, tetep ngebetot duit dari bawah kasur sebesar tiga juta.
“Urusan séwa délman bakal arak-arakan si Alfin ntu urusan Babé,” kata Bang Jali sembari nyerahin segepok duit tiga juta pérak.
“Aya demen tu, Bé,” Mat Rais mukanya céngar.
*
Bisa dibilang acara sunatan Alfin berlangsung meriah. Acara digelar di rumah Mat Rais. Paké acara pésta segala. Artinya, Mat Rais dan bininya, Masyitoh, ngundang ke selébar uyak. Sebagian tamu memberi salam témpél kepada Mat Rais, ada yang diberikan kepada Mpok Masyitoh, ada juga tamu yang memberikan langsung kepada Alfin.
Acara digelar dari pagi, pas setelah anunya Alfin dipotong béngkong, sampé malem.
Tamu-tamu dateng silih berganti.
Jamuan makan untuk tamu, Mpok Masyitoh ngidangin dua jenis nasi. Nasi uduk sama nasi putih biasa.
Untuk lauk nasi uduk, ada semur tahu ada juga semur jéngkol. Sambel kacang juga disiagain plus isiran ketimun.
Untuk lauk nasi putih, Mpok Masyitoh nyediain sayur goreng asem dilengkapin kikil dan tétélan. Ada juga batang tales. Sayur sengaja dibikin rada pedes sehingga para tamu banyak yang jidatnya gobyos keringetan.
Ikannya, selaén ada rencakan daging kebo, disediain juga ikan sepat deléngék, ikan japu ungkep, dan ikan gésék yang sering disebut ikan bulu ayam.
Kagak lupa juga disiapin lalapan dengan sambel terasi.
Untuk minumnya, Mpok Maani, mpoknya Mpok Minah, nyiapin bir peletok yang warna merahnya bener-bener marem.
Péndéknya, untuk hidangan ala Betawi, para tamu bener-bener dibikin kelenger puasnya.
Alfin juga roman-romannya bahagia kagak kepalang bahna sempet diarak keliling kampung paké delapan délman yang diséwa Bang Jali dari Rawabelong.
Rasa sakit waktu anunya dipotong béngkong asal Cileduk pun sirna kagak bebekas.
*
Bésoknya, Bang Jali dan Mpok Minah kembali mendatangi rumah Mat Rais untuk bantu bérés-bérés rumah. yang abis nggelar keriaan.
Kagak lupa Mpok Minah juga bantu Alfin ngitung duit yang dia dapet dari para tamu.
“Bakal beli apaan duit segini banyak, Tong?” tanya Mpok Minah sembari ngusap-ngusap kepala cucunya.
“Ntu Nyak. Alfin mau beli sepéda. Nti Alfin ke sekolah naék sepéda sendiri.”
“Émang lu udah bisa naék sepéda?”
“Masa’ anak laki nggak bisa naék sepéda, Nyak Tua?”
Bang Jali nimbrung.
“Banyak juga lu dapet duit, Tong. Berapa totalnya?”
“Dua juta tiga ratusan, Bang,” Mpok Minah yang nyaut.
“Gedé juga.”
“Mayan, Kong,” jawab Alfin. “Kalau begini, taun depan Alfin mau disunat lagi ah, Kong. Biar dapet banyak duit lagi.”
“Dasar bocah lu ah. Bisa abis dong anu lu kalu digetet lagi.”
Jakarta, 02012016
aba.mardjani@yahoo.com
Kamus:
Nyunatin = sunatan; Orok = bayi; Gablek = punya; Nyol-nyol = menggerutu; Céngar = cerah ceria; Selébar uyak = ke beberapa kampung di mana ada kerabat dan kenalan; Ngidangin = menghidangkan; Bahna = karena; Keriaan = sebutan lain untuk pesta sunatan atau pesta perkawinan; Tong, Ntong = panggilan untuk anak laki-laki; Digetet = dipotong sedikit.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
