DEMEN kagak demen, Bang Jali ujung-ujungnya kudu nerima si Dodit jadi mantunya. Nunung kendiri roman-romannya bahagia banget duduk di pelaminan bersama laki-laki pujaan atinya, sementara Bang Jali terus nahan sebelnya.
Di hari pertama Dodit ngendon di rumahnya sebagai mantu, Bang Jali lebih banyak ngindar dengan banyak berada di luar rumah. Dia kagak demen bentar-bentar amprokan dengan mantu yang bikin dia empet itu. Ada aja alesan Bang Jali supaya banyak keluar rumah.
Namun, pada malam ketiga, Bang Jali secara tegas bilang ke si Nunung. “Ini malem ketiga, Nung. Abis malem niga ari, babé minta lu ama laki lu pegi dah. Ke mana kék. Ke rumah mertua lu kék.”
Mpok Minah kagak berani koméntar atawa nimbrung. Apalagi itu émang udah perjanjian sebelon keduanya nikah.
“Tapi, Bé...”
“Kagak paké tapi-tapian...”
“Rumah orangtua Bang Dodit pan sempit, Bé...”
“Bodo amat. Babé empet saban hari ketemu amé laki lu. Lu bawa gi dah. Ke mana kék. Lu cari kontrakan kendiri kék...”
*
Sesuai perintah Bang Jali, paginya Nunung dan Dodit pamit.
“Mohon doanya yé, Be...Nyak...” kata Dodit. “Saya mao bawa Nunung ke kampung...”
Bang Jali pora-pora kagak denger. Mpok Minah yang rada kagét.
“Apé lu kata? Ke kampung?”
“Iyé, Nyak,” Nunung yang nyaut.
“Émang di sono lu udah dapet kontrakan?” Mpok Minah nguber.
“Ada, Nyak. Ya, kata Bang Dodit si ada rumah kecil. Cocok buat ayé ama Bang Dodit...”
“Bagus ‘ntu,” Bang Jali nyamber. “Biarin kecil nyang penting rumah. Bukan kandang kebo atawa kandang kambing...”
“Abang gitu-gitu amat si!” Mpok Minah protés.
“Émang salah gué ngomong?”
Mpok Minah narik napas. “Nyak amé Babé pasti ngedoain nyang terbaik buat elu bedua. Nyang penting, elu bedua pada senang. Jangan pada berantem ya, Dod. Kalo si Nunung punya lobangan kekurangan, yé lu isi. Jangan elu biarin.”
Nunung mésem-mésem. Berasa kegésék sindiran. Inget tiga malam penuh drama setelah jadi laki-bini.
“Buat elu, Nung. Kalo si Dodit lagi kepéngén ini itu, elu ladénin. Jangan lu antepin. Kalo dié kepéngén sayur asem ya lu masakin. Kalo dié lagi kenceng, elu elus-elus.”
“Nyak ngomong apa sih?” Nunung kagak tahan denger sindiran Nyaknya.
Mpok Minah nyengir-nyengir. “Ini naséhat orangtua. Idup laki bini itu kudu sama rasa. Akur luar dalem. Jangan mau énaknya doangan. Idup itu ada paitnya, ada manisnya. Ibarat buah paré, biar kata pait, kan tetep énak dimakan. Ibarat daun mengkudu, biar kata pait, pan énak kalo dibikin nasi goréng...”
“Udah...udah...” Bang Jali nyelak. “Mingkin lama elu mingkin kagak puguh lagu.”
“Yé abang kayak kagak pernah ngerasain muda aja...”
Mata Bang Jali mandangin dua ékor nyang lagi main uber-uberan di témbok rumah.*
Kamus: Amprokan: bersirobok, bertemu, bersinggungan; Empet: sebal; Niga ari: Tiga hari; Pora-pora: pura-pura; Antepin: biarkan; Pait: pahit; Mingkin: makin
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
