Cinta Pantang Atrét (Sketsa Betawi #1)

NUNUNG punya demenan. Apa anéhnya? Nunug émang udah cukup umur juga. Malahan anéh kalo Nunung nggak juga punya pacar.

Cuman, yang bikin Bang Jali blingsatan kaya’ orang lagi kesemutan, pacar si Nunung ini jenis brokoli alias brondong bikin dongkol dan ngeselin.

Pacar baru si Nunung ini namanya Dodit. Bang Jali juga kurang begitu paham apa nama panjangnya. Bahkan ngedenger aja nama itu udah bikin Bang Jali mau muntah.

Dodit itu mukanya sih emang cakep. Mirip-mirip Dude Herlino lah. Cuman, si Dodit ini lebih tinggi sedikit. Bédanya lagi, kalo Dude itu artis, nah si Dodit itu ngartis alias nganggur statis. Kalo Dude kaya raya, hidup Dodit susah payah.

Pendidikan Dodit juga cuman tamatan SD. Itu Bang Jali hafal. Soalnya, dulu waktu masih sama-sama tinggal di Pondok Pinang, rumah kontrakan Dodit dan orang tuanya kagak jauh dari rumah keluarga Bang Jali. Kata orang sepelémparan batu-lah.

Bang Jali juga tau banget gimana kecilnya si Dodit. Bahna udah kagak punya bapak alias anak yatim, sekolahnya juga kagak keurus. Baju lecek. Celana péndéknya bahkan sering kelihatan kegedean. Mungkin boléh dikasih atau celana bekas abangnya.

Udah gitu. waktu kecil, Dodit itu terkenal sebagai salah satu anak paling nakal di Pondok Pinang. Suka nyolong kucapi, mangga, atau rambutan tetangga. Kotan-kotan, kalo kepépét kepéngén jajan dan nggak punya duit, Dodit juga suka nyolong sendal di musholla terus dijual di tukang loak di Pasar Blok A.

Nah, dengan sedikit latar belakang seperti itu, bagaimana mungkin Bang Jali réla ngebiarin Nunug besukaan sama si Dodit? Apalagi, belakangan, Nunung juga udah ngejalanin profesi barunya sebagai ustadzah di sebuah Sekolah Dasar Islam. Masa’ guru madrasah pacaran sama pengangguran yang kagak jelas juntrungannya?

Tapi, Nunung sendiri ngakunya serius pacaran sama si Dodit. Biar kata Bang Jali si Dodit itu brokoli, buat Nunung si Dodit itu bronis alias brondong manis. Menurut Nunung, Dodit itu tipe laki-laki simpati alias satu istri setia sampé mati.

“Pokoknya babe kagak ngizinin elu bedemenan sama tu kamprét,” kata Bang Jali setiap kali memberi naséhat buat Nunung.

Buat Nunung, untungnya, sikap Mpok Minah rada-rada nétral. Benci banget kagak, ngedukung juga kagak. Kalo Bang Jali lagi nyerocos soal si Dodit, Mpok Minah lebih sering diem. Kagak koméntar apa-apa. Dalem ati, Mpok Minah mengakui si Dodit itu pengangguran yang punya masa depan suram. Tapi, di sisi lain, Mpok Minah demen juga ngeliat muka si Dodit. Dodit itu games (ganteng bikin gemes) banget. Jadi, pikir Mpok Minah, wajar juga kalo si Nunung anaknya ngebet.

Malem ini, malem Minggu.

Bang Jali sengaja duduk di téras rumahnya sejak abis sholat Isya. Dia siap nyegat dan ngusir si Dodit kalo sampé berani ngapélin anaknya. Dia juga siap nyegat Nunung keluar rumah.

“Nung!” Bang Jali manggil si Nunung. “Bikin babé kopi!”

Beberapa saat kemudian segelas kopi panas diantarkan Nunung ke hadapan Bang Jali. Begitu Nunung mau pergi, Bang Jali minta Nunung duduk dulu di hadapannya.

“Ada apa si, Bé?” Nunung merengut.

“Lu tau kagak babé lu ni sayang sama elu?”

“Ya tau-lah, Bé. Mana ada sih orang tua yang kagak sayang sama anaknya kendiri, darah daging kendiri.”

“Bukan begitu maksud, Babé... Babé tuh kepéngénnya elu pilih laki-laki nyang pas ama derjat kité.”

“Derjat apa, Bé? Kaum ningrat gitu maksudnya?”

“Babé lu ini gini-gini orang yang dihormatin, paling kagak di kampung Pondok Pinang dan sekarang di Tanah Kusir...”

“Terus...”

“Nah, Babé kepéngénnya tuh elu nantinya punya laki nyang kira-kira sama amé elu. Minimal, kalu elu guru, ya laki lu tu guru juga. Pan cocok...”

“Jadi?”

“Elu tuh anak Babé nyang bontot. Elu berhak ngedapetin laki nyang lebih baék dibandingin si Kamprét ‘ntu....”

Ngedenger Dodit disebut kamprét, Nunung jadi rada sebel. Sonder bilang apa-apa, Nunung langsung ngeloyor ninggalin babénya.

Bang Jali cuman bisa narik napas.

Kamus:
Atret: mundur; Demenan: pacar; Kotan-kotan: kadang-kadang; Bedemenan: berpacaran; Kendiri: sendiri; Sonder: tanpa.