Teu Nyambung

Ditulis ku: Ena Rohana

Hiji Mangsa indung jeung anak  anu katelah Ma Asih jeung Neng Neni arulin ka emol di sabudeureun Kota Tasik, aya meureunan kana sajam satengahna kukurilingan ningalian barang dagangan. Ma Asih anu titatadi nanahan hayang kahampangan ngaharewos ka anakna Neng Neni, "Nen cikan Ema hayang ka cai dimana atuh tempatna..?" tanya Ma Asih
Neng Neni anu keur asik mulak-malik calana blue jean ngareret ka emana tuluy ngawaler ; "ke heula atuh Ma sabar, ieu alus calana geura Ma."
"Ih ari Neni puguh ema teh geus teu kuat hayang kacai....!" tembal si Ema bari ngusapan parindikan.
"Hayu atuh urang kaluhur da wc-na di lantey dua." cek Neng Neni bari ngalungkeun calana blue jean anu keur dibulak-balik.
Nepi ka lantey dua Neng Neni culak-cileuk bangun nu bingung neangan wc.
"Dimana Nen wcna..?" tanya si ema bari muringis nanahan kahampangan
"Ke heula Ma..palih mana atuh nya..?" tembal Neng Neni
"Har..ari Neni sugan teh apal..sok atuh burukeun tanyakeun tuh kanu make saragam..!" saur si Ema bari kerung tuluy tutunjuk ka kasir salah sahiji counter makanan siap saji.
"heug Ma urang taroskeun" sambung Neng Neni bari ngagedig nyampeurkeun anu make saragam.
"Selamat siang Mba..bisa saya bantu..?" tanya eta patugas
"Maaf Mba mau tanya kalo toilet sebelah mana..?" tanya Neng Neni
"Ohh ada kok Mba mau pesan berapa ? tembal eta patugas
Neng neni dijawab kitu teh ngahuleng, naha teu nyambung nya.
"Nen tanyakeunna kamar kecil kitu..!" ceuk si Ema bari muringis
"Maaf Mba kamar kecil maksudnya, ada gak disini..?" tanya Neng neni rada bedas.
"Yang Gede juga ada kok Mba..silakan pilih yang mana beda dikit kok harganya" tembal patugas.
Neng Neni jeung si Ema dijawab kitu teh beuki ngagaremet hayang nyarekan ka eta patugas.
Tuluy Neng Neni rada ngadeukeutan eta patugas, bari pepeta nyingsatkeun erokna meh wates luhureun tuur saeutik bari tuluy cinggogo, corowok ngomong " Mba ibu saya mau Pipis....dimana kamar kecilnya...!"
"Oooh..kamar kecil...ada tuh sebelah belakang..." cek patugas eta bari tuluy ngaleos kaeraan.
Can oge Neng Neni nguniang tina cinggogona..emana mah geus ngabecir muru wc.