Wengi iki aku nyokot gegere Preti supaya wong-wong ning angkringan ora wedi. Reka-rekane Preti nyamar dari wong wadon ayu banjur lungguh jejeran manungsa liyane karo nyambi mangan panganan. Mestine njaluk dibayari wong-wong lanang sing digodani iku. Banjur aku glinding ana ngisor meja kanggo golek balung.
Bakul angkringan plirak-plirik. Wong iku bisa weruh lan ngerti lagehan dedemit pesisir sing seneng golek pangan ning angkringane. Menawa kober dheweke seleh ceker pitik kanggo para dedemit. Ananging yen wegah dheweke mung meneng wae meruhi dedemit memba-memba menungsa menyang angkringane.
"Sisuk sore tekan minggu ngarep aja ngatonake wujud sing medeni. Kene iki arep nggo syuting film!" ujare bakul angkringan iku sinambi menehake besek. "Iki dak wenehi panganan. Sisuk dak wenehi sing luwih enak."
Aku lan Preti mung manggut-manggut manut. Preti sing wis dadi wujud asline nampani besek iku nganggo untune amarga tangan tengene nyangking aku lan tangan kiwane nggawa titipane genderuwo Ireng. Irungku ngambus-ngambus banjur nduga panganan apa sing diwenehake bakul angkringan.
"Kok jambu? Demit kok dipadhakake codot? Demit iku seneng daging-dagingan!" Aku mangkel.
"Jambu abang kuwi. Engko dipangan karo yuyu sing wis digepuk. Enak!" bakul angkringan wegah disalahake. Pancen lagehane sakarepe dhewe. "Tenan lho ya. Sisuk sore tekan minggu ngarep aja medeni para tamu. Tamune bagus-bagus karo ayu-ayu soale artis. Aja maido karo omonganku."
Aku lan Preti maneh-maneh mung manggut-manggut manut.
"Mengko dak kandhakake karo dedemit liyane. Sisuk ngisor watu karang kae dadi pos ronda para dedemit. Kene uga arep melu ngawasi kahanan kareben syuting tetep lancar kok," ujare Preti sing njabat dadi menteri luar negeri dedemit pesisir, dene aku Gundul Pringis njabat menteri keamanan lan sandi negara.
Bakul angkringan ajak guyon, nyawuri pasir ning raine Preti kaya-kaya arep gawe dedemit wadon iku nesu. Preti banjur mangap-mangap ngetokake kebul saka cangkeme sing ambune banger. Aku lan bakul angkringan misuh-misuh supaya Preti enggal mingkem. Ora kuat ngambu ababe Preti.
"Sisuk panganane diseleh ngisor wit pandan ya. Aku pesen swiwi geprek lombok lima.....
"Lombok larang!" bakul angkringan medhot omonganku.
