Sidane temenan, Kaswad ngrewangi Yu Kartisem njajali matutna nganggo barang pesenane sing dijujugna Kaswad. Ana tembung ndilalah. Ndilalah koh ijig-ijig teka Mbok Ratem, tanggane Yu Kartisem keletan rong umah. Mbok Ratem jane mikinen mung merga weruh motore Kaswad dadi agep takon deneng panci pesenane ora dejujug-jujugena. Ora ngretiya, mbareng genjlup aring ruang tamune Yu Kartisem, neng kono Kaswad agi adhep-adhepan karo Yu Kartisem agi ngatur ngepasna kutang werna ireng sing agi dejajal neng Yu Kartisem.
Ya pancen ora maido. Kaswad lanang Yu Kartisem wadon tur ya pancen randha magel, dadi Kaswaf nggulih ngrewangi ya kaya kae lah, andang maning kayane ya anu desengaja deng Yu Kartisem, mbuh ngkanan-ngkanane agi kenang apa. Mung baen koh kuwe mau, ana tembung ndilalah..ndilalah ana wong weruh, Mbok Ratem pisan. Mbangkanen Mbok Ratem wis bola-bali ping kopang-kaping pesen panci ora desemayani deng Kaswad. Kaswad pancen sengaja ora nglayani pesenane Mbok Ratem, mergane deweke wis deemutna deng Pak Hadi lan batir-batire tukang lawe-lawe. Jere Mbok Ratem kae wonge angel, angger pas detarik jere ngesuk, detagih ngesuk jere ngemben. Mulane Kaswad sengaja ora nglayani ora njujugi pesenane Mbok Ratem.
Ndilalah koh ana kedadiyan sing kaya kuwe.
***
Udane megin deres. Kaswad ambekan dawa, nyambi udud nglepus. Wis ana telung dinahan bojone Kaswad bali aring wetan kali, ngumahe bapa biyunge. Ora adoh jane, paling-paling ya mung ngentongna ududan seler anggere mlaku. Telung dina Kaswad turu ijen. Ndlahom. Kaswad ora teyeng maning ngutangi Yu Kartisem. Ora teyeng maning ngutangi sapa-sapa. Motore dejaluk bali mertuwane. Kaswad wis ora dadi tukang lawe-lawe maning. Kabeh mau gara-gara ngutangi Yu Kartisem.
Baca konten-konten menarik Kompasiana langsung dari smartphone kamu. Follow channel WhatsApp Kompasiana sekarang di sini: https://whatsapp.com/channel/0029VaYjYaL4Spk7WflFYJ2H
