[Mahalabio] Mangandung Kolesterol

Seperti biasa, limbah sholat Isya di Masigit, bubuhan Si Apul selalu berkumpul di warung Acil Imus nang kada talalu jauh matan rumah Ijul Amak, anak juragan harang kawal si Apul nang paling lamak sabaharian.

Malam ini, nang takumpul di warung selain anggota tetap, Si Apul, Ijul Amak, Ijai Patin, Amat hiyang, Adul Sasirangan  lawan si Isam Ancau, sekalinya ada juga Julak Asan lawan suanang Arul nang umpat jua bapandiran kesana kemari.

"Julak, tahukah pian ada habar baik gasan penikmat daging kambing, sapi lawan hadangan!" Ujar Si Apul memulai pandir, limbah maambil sabuting wadai matan piring.

"Habar apa itu Pul?" Sahut Ijul amak nang besendukut di higa Si Apul.

"Naaaah, ini penting juga gasan ikam Jul ai!" Ujar Si Apul sambil manunjul parut kawal sepermainannya mulai halus itu.

"Kada Pul ai, kada tahu aku", jawab Julak Asan sambil menyeruput kopi hirang tanpa gula kasukaan sidin.

"Buhannya itu handak tahu jua kah kada yo!?" Takun Si-Apul lagi kepada kakawalan nang lain sambil malihati muha buhannya satu persatu. Sementara buhan kakawalan nang dilihati pina kada tapi mahirani.

Ijai Patin asyik main catur lawan si-Amat Hiyang, Si Adul Sasirangan pina masih batilpunan lawan nang bini, kaya itu jua Si Isam Ancau, si jangkung nang paling hobi main Volly itu lagi manuntun siaran langsung final kejuaraan Volley dunia matan TV streaming.

Sedangkan Suanang Arul pina bahimat banar maudak kopi sambil baruku karitik ulahan saurang.

"Samalam ulun malihat acara di tipi lak ai, ujarnya kambing, sapi lawan hadangan ntu kada mengandung kolesterol!" Ujar Si Apul sambil mambujurakan posisi duduknya.

"Nang bujur Pul!?" Ujar Julak Asan pina himung sambil bergerak memaraki duduk Si Apul. Lawas sudah Julak Asan kada wani makan daging karena takutan kolesterol.

"Ujar siapa ikam Pul, kalaunya kambing, sapi lawan hadangan kada mengandung kolesterol ntu!? Kada karamputlah ikam!?" Ijul Amak pina bersemangat jua mandangar pandiran Si Apul.

"Berarti lebaran haji kaina aku bisa makan daging kambing lah Pul?" Ujar Suanang Arul umpat menyahuti.

"Ujar bapak nang ahli  binatang di tipi ntu, pendapat nang mengatakan kalaunya kambing, sapi, lawan hadangan Itu mengandung kolesterol apalagi jumlahnya banyak, sekalinya itu kada bujur, karena kada didasari oleh penelitian ilmiah ujar Sidin" Ujar Si Apul manarangakan.

"Bujuran kah Pul!?" Ujar Isam Ancau, Ijai Patin lawan Si Amat hiyang berbarengan manyahuti,   pinanya inya batiga mulai tertarik jua lawan pandiran Si Apul. Inya batiga umpat jua mengelilingi  wadah Si Apul duduk.

“Hiih!” Ujar Si Apul pulang. Menambah buhannya semakin penasaran.

“Tarus pang, ujar Sidin nang bujur Kayapa!?” Takun Suanang Arul pina serius banar.

“Jadi, pian ni bujur-bujur handak tahukah suanang, julak?” Si Apul berbalik takun.

“Kami gin  penasaran jua Pul ai! handak tahu jua kesah ilmu kasihatan lawan ilmu tentang hewan nang bujur!” Ujar Amat Hiyang mewakili bubuhannya nang pina serius mahadangi penjelasan Si Apul.

“Uuuuuuu kaya itukah! Baiklah mudahan ilmu ni bermanfaat gasan kita samuaan!” Ujar Si Apul pina memulai penjelasan sambil maubah gaya lawan suara seperti gaya ustad-ustad di tipi.

“Ujar sidin, nang bujur ntu nang ngaran kambing, sapi lawan hadangan ntu saumur hidupnya kada suah mangandung kolesterol, tapi amun kambing pastinya mangandung anak kambing, sapi mangandung anak sapi, naaaah amun hadangan pasti mangandung an....”

Baluman tuntung Si Apul bapandir, buhanya langsung maangkat Si Apul di caburakan di kulam Iwak di higa warung.

Kamus Bahasa Banjar :

Acil = Bibi 

Amak/Lamak = Gemuk

Ancau = Panjang/Tinggi

Amun/Mun = Jika/Kalau

Bahari = Dulu ; Sabaharian = dari dulu

Bahimat = Serius

Baruku = Merokok

Batianan = Hamil/Mengandung

Bubuhan = Grup/Kelompok

Bersendukut = Duduk seperti sedang kedinginan

Bujur = Benar

Gasan = Untuk

Hadangan = Kerbau

Handak = Mau

Higa = Samping

Himung = Senang

Hiyang/Hirang = Hitam

Ikam = Kamu

Inya = Dia

Julak = Pakde

Kada = Tidak

Karamput = Bohong

Karitik = Kretek

Kawal = Kawan

Lawan = Dan/Dengan

Limbah = Setelah

Mahalabio = Humor ala orang daerah Alabio 

Mahirani = Memperhatikan

Masigit = Masjid

Matan = Dari

Maudak = Mengaduk

Muha = Muka

Nang = Yang

Ngaran = Nama

Pandiran = Obrolan

Parut = Perut

Pina = Seperti

Pulang = Lagi

Sabuting = Satu (utk barang)

Saurang = Sendiri

Sidin = Beliau

Suanang = Om/Paman

Takun = Tanya

Tuntung = Selesai

Ulahan = Buatan

Ulun = Saya

Umpat = Ikut