Susu Beracun

“Kenape, Bang, laki aye kenape?” Minah kedekeran1 ngeliat Madun lakinye dibopong dua temannye.

“Kaga tau Mpok, mabok kali,” jawab Amir.

“Ude, cepet Bang, tulung rebahin die di korsi.” Dua temennye cepat naro awak kurus ntu di korsi panjang, di teras rumenye. Minah cepet-cepet ngambil bantal ke dalem, buat ngeganjel pala lakinye.

“Selama eni, Bang Madun kaga pernah mabok-mabokan, Bang, die kaga doyan minum. Kalo aer teh atawa aer putih mah, ntu emang harus.”

“Kite bedua juga kaga ngarti, Mpok, tadi di pengkolan jalan Pekayon, ane liat bang Madun jalan sempoyongan, trus nyungsep ke pinggir got, ane ame si Fuad kebetulan lewat, ane tolongin, trus ane anter ke mari.”

“Bener Pok, ane ude coba ajak ngomong bang Madun, tapi suaranye kaga jelas, ngelantur gitu.” Fuad nambain

“Trus motornye mane?”

“Kite kaga liat ade motor, Mpok?” Anwar jadi bingung.

“Tadi pagi, die berangkat ngojek pake motor barunye, yang baru ke luar juga STNK nye, coba aye tanya ame die.” Minah trus goyangin awak si Madun, tapi lakinye ntu cuman gegerungan2 kaga jelas. Die pengen bangun, tapi lagi-lagi tepar3 di korsi panjang ntu.

“Belagu lu, Bang, pake mabok-mabokan segale, kaya orang yang banyak duit aje! Inget, lu tuh punya anak bini! Ape lu kaga kesian ame kite-kite!?” Minah terus nyerocos, tapi Madun cuman manggut-manggut.

“Kalo gitu, kite bedua mao pamit dulu Mpok, coba ntar ane tanya di pangkalan, soal motornye bang Madun, kali aje dititipin ame anak-anak.” Anwar ame Fuad terus ngeloyor4 dari rume Madun.
Madun. Lelaki ntu baru aje kredit motor bebek. Motornye yang lama dijual, lumayan separo duitnye bisa buat DP yang baru. Sisanye bisa buat nambah tabungan ame duit belanja si Minah. Lagian kalo pake motor baru, die ngarep5 penumpang bakalan seneng naek ojeknye.
Sore ntu ampe besok paginye, Minah ame anak-anaknye dibikin repot. Madun nggak sadar-sadar, tapi terus aje ngoceh kaga jelas.

“Babe mabok apaan, sih, Nyak, kok lama amat sadarnye?” si Fauzan, anak lelakinye yang paling tua dari tiga sodara, nanya ame nyaknye. Madun ame Minah emang cuman punya tiga anak lelaki aje.

“Nyak mane tau soal begituan, mabok aer comberan, kali.”

“Ude ya, Nyak, kite berangkat sekolah dulu, kite doain, ntar sore Babe cepet sadar deh.”Anak yang nomer dua nyeletuk sembari nyium tangan Minah, pamit ke sekolah. Semua anak Madun masih sekolah di SD.
Pagi ntu Minah pergi ke pasar, pulangnye die beli sebutir kelape ijo, ame sekaleng susu kentel manis. Kelape ijo dibakar trus dibolongin ujungnye, dikasi susu, langsung diminumin ke si Madun. Kira-kira lima belas menit, Madun langsung muntah-muntah, kaga lama die tidur pules, ame banyak ngeluarin keringet.

Sorenye, Madun keliatan ude duduk di teras rume. Biar masih kelihatan lemes, tapi Madun ude bisa ngomong jelas, Minah langsung nanya ihwal kejadiannye.

“Ntar, deh, Abang ceritain, pale Abang masih keliyengan6 nih.”

“Tapi, dah enakan, kan, Bang?” Madun cuman manggut, ngejawab pertanyaan bininye.

“Assalamualaikum….” Anwar ame Fuad ujug-ujug dateng lagi.

“Waalaikumsalam.”

“Ude segeran, Bang?” Fuad mulai nyerocos.

“Mendingan, sih.”

“Motor, ude ane cari ame temen-temen, tapi kaga ade Bang. Abang taro di mane?” giliran Anwar yang nyeletuk.

“Ntar, deh, gue certain, malu gue nyeritainnye.”

“Mang kenape, Bang?” Fuad penasaran

“Kayanye, dibawa kabur penumpang gue yang kemaren pagi.”

“Oh…., jadi Abang sengaje diajak mabok, trus motor Abang diambil gitu?” Fuad nggak berenti nanya.

“Kira-kira begitu, deh.”

“Cepet lapor Polisi Bang, kalo kaga, ntar Abang dikejar-kejar Leasing. Abang musti punya bukti keilangan, biar ntu Deler kaga trus nagih Abang.” Anwar ngasih saran.

“Itu masalahnya, gue malu ame polisi, gue juga takut bini gue marah.”

“Kaga, Bang, aye kaga bakal marah, asal Abang jujur ceritanye.” Minah motong obrolan, sembari naro dua gelas kupi panas buat tamunye.

“Bener nih, lu kaga marah?”

“Kenape aye kudu marah? Kalo emang ntu musibah, aye ikhlas, Bang. Betul kaga Bang, Anwar?” Anwar yang ditanya cuman manggut doang.

“Bener, nih, lu kaga bakalan marah ame Abang?”

“Bener!” Minah ngeyakinin lakinye, penasaran banget die.

“Oke, deh, gue ceritain, tapi lo bedua kudu jadi saksinye, ye, nih, bini gue kaga bakalan marah?” Anwar dan Fuad langsung ACC. Penasaran banget mereka bedua.

“Pagi kemaren, pan gue dapet penumpang cewek cakep yang bohay. Die bilang mau ke Pekayon, trus gue anterin deh, tapi, sampe di Pekayon, gue cuman diajak muter-muter.”

“Trus?” Minah mingkin penasaran.

“Gue jadi bingung, trus gue tanya ame die, sebenernye mau ke mane? Akhirnye, gue disuruh berenti di gubuk kecil yang sepi, deket pinggir sawah. Die bilang, die kaga punya duit buat bayar, trus die buka baju ame BHnye. Buat gantinye, katanye, gue boleh ngenyot ntu buah dade sepuasnye. Sebagai lelaki normal, gue jadi deg-degan. Mulanye gue nolak, tapi die trus makse gue, akhirnye, sonder sadar ntu buah dade, ude gue enyot. Baru kira-kira semenit gue enyot, gue jadi kaga inget ape-ape lagi. Ilang deh, dompet ame motor gue.”
Denger cerita Madun, Minah langsung masuk ke dalem, trus ke luar bawa seember aer kotor sisa cucian, langsung disiram ke muka Madun.

“Kalo tau begitu mah, Bang, mendingan lu mampus aje sekalian!”

Sonder6  permisi lagi, Anwar ame Fuad langsung kabur. Tapi sembari ngeloyor die pada ketawa cekikikan.

 

 

***

 

 

Catatan kaki :

Kedekeran : Bingung karena panik.

Gegerungan : Meracau tak jelas.

Tepar : Rebah.

Ngeloyor : Berlalu

Ngarep: Berharap.

Sonder : Tanpa