Pocong

Juki ude nyiapin anglo1, stanggi2, areng batok kelape, nggak lupe kaen kafan buat jadi pocongnye. Tekadnye ude bulet, buat ngerjain si Puah, biar mpoknye kapok pacaran di teras rume kosong almarhum engkongnye. Sedari engkongnye wafat, dua bulan yang ude, rume ntu kalo malem Minggu, sering dipake Marpuah buat pacaran. Biar cuman di teras, tapi kalo malem, di situ gelap banget. Juki slempang3, kalo nti si Puah pacarannye kelantasan4. Ude banyak kejadiannye, kalo pacaran pake acara buka kolor segale, ujung-ujungnye pade bunting duluan. Juki nggak mao keluarganye malu, kalo ampe ntu kejadian ame si Marpuah. Emang sebentar lagi Marpuah mao nikeh, tapi ape salahnye, kalo die saling menjage.

Teras rume engkongnye lumayan lebar, ade bale-balenye, ntu rume adenye persis di depan rume Juki, cume dipisahin gang MHT. Jadi kalo lagi malem Minggu, pas cowoknye dateng ngelancong5, si Puah bukannye pacaran di teras rumahnye, tapi die plesiran6 dulu ke mall, atawa nonton bioskop. Baru kira-kira jam sepuluh malem die duduk berduaan di rume kosong ntu.

“Liat noh, Be! Si Puah lagi indehoy7 ame si Badrun di teras Engkong.”

“Biarin, mang kenape? Lagian empat bulan lagi juga die mao nikeh.”

“Emang, Babe kaga takut?”

“Takut ngape? Bunting!?”

“Iye, Be, aye mah slempang banget ngeliatnye.”

“Insya Allah, kaga Juk. Babe yakin banget ame hasil didikan nyak lu. Babe percaya deh. Lagian, ngape sih lu, usil aje ame urusan si Puah? Mangkanye lu cepetan cari pacar, biar bisa ngerasin asoynye orang pacaran.”
Nggak lama, nyaknye Juki ke luar, bawa sepiring martabak ame dua gelas kupi item.

“Ntu, martabak bole dibawain si Badrun, ye Nyak?”

“Iye, kenape?”

“Orang, kalo lagi ada maonye.”

“Hus! Lu, kaga boleh ngomong begitu! Wajar aje kalo calon mantu bawain calon mertuanye.”

“Iye, lu kaga bole su’udzon ame orang,” babenye ikut bantuin si nyak ngomong. Akhirnye mereka betiga trus ngobrol sembari nonton TV. Dari ruang tamu ntu, keliatan jelas bayangan si Puah ame si Badrun lagi asik-asikan.

“Ntar lu, gue kerjain!” kate Juki dalem hati.

Pas jam sebelas malem, nyak ame babenye masuk pangkeng, ude ngantuk. Tapi Si Puah ame si Badrun masih aje ade di teras rume engkongnye. Juki terus matiin lampu ame TV. Die pura-pura mao tidur, padahal die ke luar lewat pintu belakang, ambil jalan muter, trus masuk ke rume engkongnye, lewat pintu belakang juga.

Juki masuk ke ruang tamu, pelan banget... die mulai nyalain dupa. Baunye mulai nyerebeng ke mane-mane. Dari ruang tamu ntu, die liat dua awak manusia lagi berangkulan. Die pake kostum pocong yang ude disiapin dari sore. Die buka pintu depan, pelan banget, biar Puah ame pacarnye nggak denger. Dia deketin, sembari tangannye maju ke depan mirip zombie.

“Huah…!” Juki tereak buat nakutin Puah ame pacarnye, tapi ujug-ujug die jatoh pingsan, lantaran yang diliatnye, bukan muka Marpuah ame si Badrun, tapi muka almarhum engkong ame nyainye.

***

Catatan kaki:
1. Anglo=Perapian kecil dengan arang sebagai bahan bakarnya.
2. Stanggi = Sejenis kemenyan.
3. Slempang = Khawatir.
4. Kelantasan = Keterusan.
5. Ngelancong = Ngapel, dating untuk pacaran.
6. Plesiran = Piknik, tamasya, jalan-jalan.
7. Indehoy = Lagi asik berduaan.