“Ude, sono lu masuk pangkeng4, trus mandi, pale gue puyeng nyium bau lu!” perentah Haji Dullah, nyium arome awaknye Rojali.
Baru aje Rojali mao ngangkat pantatnye dari korsi, ujug-ujug dateng Ustad Somad ame Minah bertamu. Abis menyuruh duduk, Hajah Halimah ke dapur, bikin teh manis buat tamunye.
“Tumben lu, ke mari sore-sore begini, Mad. Lu kaga ngajar ngaji?” tanye Haji Dullah.
“Kaga, Wak Haji. Sekarang ngajinye ane liburin dulu, sekarang ane lagi banyak urusan.”
“Urusan Ape, Bang?” Rojali gentian nyeletuk,sembari matanye ngelirik ke arah Minah.
“Begini, Wak Haji, ane kan ude lama jadi duda, rencananye ane mao nikah lagi, ane kan murid Wak Haji, jadi ane minta Wak Haji mao jadi penghulunye.”
“Oh, begitu, trus calonnye siape?”
“Eni Wak Haji, si Minah,” jawab Ustad Somad sembari nunjuk si Minah. Dan langsung dijawab dengan anggukan kepale si Minah. Denger Somad ngomong begitu, mate Rojali jadi gelap, die pingsan, trus jatoh nabrak teh manis, yang ade di meja tamu.
“Rojali kenape Wak haji?” tanye Ustad Somad.
“Gak tau, kesambet setan puun rengas kali!”
***
