Oi Urang Rantau, Ari Rayo Jan Pulang, Kirim Sajo Pitih

Kalau ambo manulih tantang urang awak nan iduik di rantau, iyo sabana salut ambo maliek perjuangannyo. Kebetulan ambo sajak maninggakan kota Padang taun 1986, sampai kini lah jadi urang Jakarta. 

Jadi baa bana gigiahnyo urang awak nan manggaleh kain di Pasa Tanah Abang, nan manggaleh kaki limo di Blok M, atau nan manjua nasi di satiok suduik  Jakarta, iyo hebat-hebat. Ambo maraso bangga manjadi urang awak.

Kebetulan pulo ambo bakarajo di sebuah BUMN nan ado cabangnyo di satiok kabupaten dan alhamdulillah ambo acok malakukan perjalanan dinas. Ambo takajuik sampai di ujuang nagari sarupo di kota ketek Atambua, lah dakek bana ka Timor Leste, ado juo urang awak manggaleh nasi. 

Biasonyo ambo kalau sadang kalua daerah, lidah Padang ambo ndak bisa diajak kompromi. Walaupun lah dijamu dek urang cabang nan dikunjungi makan seafood, tatap juo diam-diam sabalun lalok di hotel, ambo kalua surang, mancari nasi Padang.

Masakan Padang ko iyo diakui urang ma sajo, sabana lamak. Ndak heran kalau urang Jawa, Sunda, Betawi, sadonyo suko bana jo nasi Padang. Iyo baa kaindak. Baru mancaliak sambaladonyo sajo alah tabik salero. Batambah sero kalau makan jo randang, gulai tunjang, dendeng balado, dan sabagainyo.

Baa dek urang rantau ko basitungkin bana karajo sarupo itu? Sabab urang awak ko iyo gadang tangguangjawabnyo. Anak dipangku, kamanakan dibimbiang, urang kampuang dipatenggangkan, kecek pepatah.

Jadi nan dipikiakannyo indak anak jo urang rumahnyo sajo. Mangirim pitih ka kampuang paralu pulo, indak sajo untuk urang gaek atau kamanakan nan masih sakola atau nan sadang manganggur, tapi kadang-kadang manyumbang untuk mambangun musajik, madrasah, asrama anak yatim, atau kaparaluan sosial lain.

Ciek lai, nan paliang penting, harus kancang mancari pitih supayo bisa pulang kampuang di ari rayo. Katiko rayo itulah kabanggaan sabagai perantau batua-batua  paralu ditampak-an ka urang kampuang.

Nan punyo oto, lah baoto surangnyo pulang. Ado kawan ambo tingga di Surabaya, takao deknyo tiok rayo mambao oto Surabaya-Padang pulang baliak. Padohal sabananyo sajak 10 tahun terakhir ko, kampuang awak tu kalau ari rayo lah indak nyaman lai. Macet parah dima sajo.

Iyo baa kaindak. Kini ko urang lah punyo oto sadonyo. Katiko ari rayo tu di kampuang, sambuah oto nan BA-nyo lain-lain, ado nan B dari Jakarta, L dari Surabaya, D dari Banduang, F dari Bogor, BK dari Medan, BG dari Palembang. Bahkan dunsanak ambo mambao oto DK dari Bali.

Kalau oto BM, jan ditanyo lai. Itu kan rantau dakek dari Pakanbaru. Indak bana ari rayo, banyak urang Pakan ko pai makan lamak ka Payokumbuah atau Bukiktinggi. Kok lah jadi jalan tol Padang-Pakanbaru, tantu banyak nan baliak ari urang dari Pakan kok nio pulang kampuang.

Memang kalau bacarito tantang pulang kampuang, bisa ndak abih-abih tulisan ko. Apolai nan namonyo pulang basamo. Biasonyo urang rantau dari Pariaman, dari Solok, sabana kompak. Bisa puluhan bus bairiang-iriang dari Jakarta. 

Tapi tujuan ambo manulih ko, nan sabananyo, maimbau kasadonyo urang rantau, tolong untuak sakali ko, jan pulang kampuang. Mambana ambo sabaleh jo kapalo. 

Mulai dari kini jan pulang dulu, walaupun ado nan biaso ka pusaro urang gaek kalau ka masuak bulan puaso. Nanti di ari rayo antok-antok sajo lah di nagari urang. Cubo pulo sakali-sakali barayo di rantau. Kok taragak jo urang tuo, dunsanak, atau kawan sangkek ketek dulu, ambiak hape, video call sajo.

Kini kan awak lah samo tau, babayonyo virus corona. Masalahnyo banyak urang nan mamandang enteng. Dek maraso badannyo sehat, inyo maraso aman-aman sajo. Padohal urang sehat bisa sajo lah ado virus di badannyo. Inyo sehat mungkin dek sistem imun di badannyo sadang rancak.

Tapi kalau inyo pulang kampuang, urang tuo atau kakaknyo nan lah baumua di ateh 60 taun, bisa kanai virus nan dibaonyo dari rantau. Baitu pulo urang kampuang, jan bujuak pulo urang rantau untuak pulang.

Mangkonyo kalau lai sayang ka urang kampuang, tolong jan pulang dulu untuak samantaro. Kok lah bakirok si corona tu dari negara awak ko, pupuah banalah pulang kampuang. Pueh-puehkan. Sampai bara talok.

Tando sayang ka kampuang, sarancaknyo untuak ari rayo ko kirim sajo pitih dari rantau. Pasti dek urang kampuang banyak guno pitih tu. Tarutamo kalau ado famili di kampuang nan susah iduiknyo, paralu bana dibantu, dan gadang pulo pahalonyo bagi nan mambantu.

Jan pulo bapasoan bana mangirim pitih. Kok galeh sadang langang di rantau, atau untuak makan satiok ari sajo alah payah, cari sajolah aka di rantau. Namonyo urang awak tu kan banyak aka. Mudah-mudahan ado jalan sahinggo rasaki lai indak malayang.

Akhianyo, samo-samo badoa sajo awak ka Tuhan, supayo capek badai corona tu pai, dan awak kasodonyo sehat walafiat sajo taruih.