Kali Pucung

Kadang barang wingit utawa angker kuwe pancen angel gole dipercaya. Cerita kewingitan biasane sumbere sekang ‘jarene’. Misale baen, “Jarene anu, nang kana kae wingit. Andingen wingi ana uwong diweruih gendurwo”. Kabeh mau sumbere sekang jarene. Tapi ya, arep kepriwe maning, wewingit angel dipisahna sekang budaya masyarakat, terutama masyarakat Jawa.

Ora beda karo masyarakat nang umaeh inyong. Nang pereke umaeh inyong ana kali sing dianggep wingit nang tangga-tangga, uga nang wong tuane inyong pada. Kali kue mau dijenengi kali pucung. Jarene wong tua-tua, kali pucung kue dilenggaih nang mbaeh bujungan. Bujungan baen wis medeni pisan, lah nek mbaeh bujungan ya jelas lewih medeni sekang bujungan.

Kali pucung kue nang wetane umaeh inyong, tapi teksih mandan adoh. Ngarepe umaeh inyong ana kantor PdanK tingkat Kecamatan, mburine kantor kue salakan, lah bates salakan karo pesawahan kue kali pucung. Salakane uga terkenal wingit. Jarene nang kono dilenggaih nang kuntilanak karo wewegombel. Wewegombel kue setan sing senenge nyuliki bocah-bocah cilik. Metune angger magrib-magrib. Wewegombel biasane awujud dadi biyunge bocah cilik sing senenge metu magrib-magrib. Wewegombel mau banjur ngawe-awe, nggawa bocah cilik mau maring Kali Pucung. Angger uwis kegawa tekan kali pucung, banjur, lap! Ilang embuh maring ngendi. Jarene wong tua-tua, bocah mau banjur didadekna budak nang alam setan.

Nang pinggire kali pucung, ana wit-witane, yaiku wit kelapa. Wit kelapa nang kali pucung ora tau di deres, merga tukang-tukang nderes ora pada wani, wedi mbok dadi kualat. Jarene, gemiyen wis tau ana tukang nderes sing nekat nderes wit klapa nang kali pucung, banjur tukang nderes kue mati kesamber bledek, tiba, ndase pecah ngancer watu. Sesasi luwih, saben mbengi nang kono ana suara wong lanang nangis, jarene wong tua-tua kue setane tukang nderes sing mati mau.

Wit klapa angger ora dideres bakal tukul woeh, kaya wit-wit klapa nang kali pucung. Tapi,woeh klapa nang kali pucung uga langka sing wani emet, wedi mbok kualat kaya tukang nderes sing nekat mau. Merga ora tau diemet, woeh klapa sering pada gigal dewek. Sing nambaih wingit kali pucung, klapa-kalapa sing pada gigal mau kue uga dilungguih setan. Jenenge setan Cengkir nyengir. Setan kue biasane medeni petani-petani sing bali sekang sawah kesoren. Jarene wong tua-tua, uwis tau ana petani sing bali kesoren merga panen pari. Pas lagi liwat nang pinggire wit klapa sing wingit mau kue, ana klapa gigal. Banjur pas ditiliki, klapane nduwe mata karo nduwe cangkem, nyengir, “hi.. hi.. hi.. hi..”

Wit-wit Klapa mau kue sing nandur jenenge Mbah Jarwo. Mbah Jarwo kue mantri sekang Jogja. Umaeh nang wetane Kali Pucung persis. Umaeh Mbah Jarwo kue siji-sijine umah sing wani njejeri Kali Pucung. Tapi, saiki umaeh wis rata karo lemah, gari mlestere baen sing teksih keton. Mbah Jarwo kue duda nduwe anak wadon siji. Mbah Jarwo, matine kecemplung sumur. Jarene wong tua-tua, Mbah Jarwo sekeluarga kualat merga wani karo sing ngelungguih Kali Pucung. Sauwise Mbah Jarwo mati, anak wadone bunuh diri, kendat nang saka umaeh. Banjur dadi kuntilanak nang Salakan perek Kali Pucung.

Jarene wong tua-tua, setan-setan nang Kali Pucung, Wewegombel, Cengkir Nyengir, karo Kuntilanak kue pada tunduk karo mbaeh Bujungan sing nglenggaih Kali Pucung.

Inyong wis tau takon karo wong tua-tua, asal muasale kali kue kenangapa dijenengi kali pucung. Jarene, nang jaman bahola, gemiyen banget, sing pertama nemokna kali pucung kue jenenge mbah Pocung. Mbah Pocung kue pengembara sing ngeciptakna tembang Macapat Pocung. Embuh kenangapa kali kue saiki dadi kali wingit. Ndean merga ‘Pocung’ kue mirip karo ‘Bujungan’ sing nang basa Indonesia kasebut ‘Pocongan’, banjur setan-setan pada seneng manggon nang ngonoh.

Kali pucung wujude uga mirip karo bujungan utawa pocongan kue mau. Sempit nang mbelike (Hulu) terus tengahe dadi amba, tapi nang ngisor (daerah hilir) malah dadi sempit maning. Padahal, biasane bentuke kali kue sempit nang hulu, amba nang hilir. Soale banyu sing ngalir wis dadi akeh. Tapi, beda karo kali pucung. Ndean merga kue Kali Pucung dianggep wingit.

Kabeh mau kue cerita sing sumbere jarene. Kenyataane durung tau ana wong sing nemui. Percaya ora percaya, kue mau kalebu salah sijine bebudayan nang masyarakat umaeh inyong. Mestine beda karo nang umaeh panjenengan. IB.

[caption id="attachment_290256" align="aligncenter" width="236" caption="Saya copy ni foto dari laptop temen, jadi gak tau sumbernya dari sapa, apalagi nama modelnya"][/caption]